Read KIMERU BIBLE PROTESTANT EDITION Rwî 3 Bible Online

Rwî 3 - KIMERU BIBLE PROTESTANT EDITION bible

Rwî 3

¹Ûtukû nî mamaga ûrûrî bwaakwa, nkaroota na mûnyaanya waakwa ûrîa mpendeete. Mûcwaga kunthe îndî ntîmwonaga; ndamwîta atîmbîtîkaga.

²Naani nî mbûkagîîra ngeetania na ntûûra, na tûjîra tunthe, ngîcwaga mûnyaanya waakwa. Mûcwaga na ntîmwonaga.

³Akaria ba ntûûra nî baambonere bakarîtie ntûûra. Naani ndîrabooria atîrî, “Bûkwona mûnyaanya waakwa?”

⁴Ndîkûbatiga, ntaakarakarîre ntîroona mûnyaanya waakwa, ndîramûkumbatîria, ntîmûrekeerie antiga kaîrî, mwanka ndîramwikia nyomba ya maama, ndîramûkûrûkia kanyomba karîa ndaaciarîrwe.

⁵Ndabwerenca, buî aarî ba Jerusalemu, nciîtîrieni bûmbîre riîtweene rîa kathia na rîa nkûrûngû atî bûtîûkaûkia kana buumbuthûra wendo bûtîrakinyia rîrîa rîagîrîte.

⁶Nîmbi îîrîa yumîte bwa rwanda, îkari ta gîtugî kîa toogi, îkîeeraga ta ubaani kana manemane, irîa cieendagua nî abiashara?

⁷Tegeeni! Nî Solomoni ûkamati akarîrîte gîtî kîaawe kîa ûnene. Athiûrûkîri nî asikarî mîrongo îtaantatû barîa bamûkaragia. Nabo nî asikarî barîa nchamba cia ndwaa ndeene ya Israeli.

⁸Bonthe nî boogeete nchiû tuuna, na nî nchamba cia ndwaa. Bakarîtie mûnene ûtukû atîkoone ûgwati.

⁹Mûnene Solomoni nî akamatagwa arî gîtîîne kîa ûnene kîthithîtue na mbaaû injega cia kuuma Lebanoni.

¹⁰Magûrû ja gîtî kîu jeereretue na fetha bwa nyuma ya gîtî kîereereetue na thaabu. Arîa gwakaragîrwa gwakunîki na gîtambaa kîa rangi ya mûkû, nakîo gîatumi bûbwega nî aka ba Jerusalemu.

¹¹Buî aarî ba Zaiûni umagareni bûcionere mûnene Solomoni, ekîrîte thirû îrîa ng'ina aamwîkîîre, ntukû îrîa aagûranaga. Ntukû îîu Solomoni nî aagwîrîîtue mono.