Read KIMERU BIBLE PROTESTANT EDITION Rwî 4 Bible Online

Rwî 4 - KIMERU BIBLE PROTESTANT EDITION bible

Rwî 4

¹Atîrî mûnyaanya, ûrî ûmûthongi! Ndakwîra ûrî ûmûthongi mono Meetho jaaku jakengakengaga nî wendo wikunîkîte na gîtambaa. Mûtuundu jwaaku jûminyûkaga ta gîkundi kîa mbûri ciînami ibariine bia Gileadi.

²Maîgo jaaku nî jameerû cwaa gûtî noo rîmwe rîaajo rîkûûki, jonthe jarî o.

³Mîromo yaaku nî îmîthongî ta rûrigi rûrûtuune na kanyua gaaku nî gakeega. Makai jaaku nî jamathongi na nî jamateenderu Jeenaenagia kinya wikunîkîte na gîtambaa.

⁴Nkingo yaaku nî înthongi ta mûnaara jwa Daudi, jûrîa jûgemetue na rong'o inyiingî.

⁵Nyoonto ciaaku ikari ta nthia ijîîrî ikîrîîjaga maûeene ja bûûrî.

⁶Ngeeta kîrîmeene kîrîa kîeeraga manemane, nkare kîrîmeene kîrîa kîîthagîrua ubaani mwanka gûkie rûkîîrî.

⁷Mûnyaanya waakwa, ûrî ûmûthongi mono! Ûrî ûmwega mantûûne jonthe.

⁸Njû gaciere gaakwa, tuume kîrîmeene kîa Lebanoni, tuume ku tûciîtîre; twîname kuuma kathûmbîne ga kîrîma kîa Amana na kîa Seniri, na kîa Herimoni, kûrîa ngatûnyi na nkarî itûûraga.

⁹Gwe gaciere gaakwa ûrî waakwa buru mûtegere jwaaku jwa meetho na mwîkîîre jwaaku jwa mûkathî nî bimbunîte buru.

¹⁰Gwe gaciere gaakwa ûrî waakwa buru! Wendo bwaaku nî bûbwega nkûrûki ya ndibei, maguta jarîa waakaga nî jaeeraga nkûrûki ya marashi jangî.

¹¹Gwe gaciere gaakwa, mîromo yaaku îrî mûrîo ta nainchû, na rûûme rwaaku rûkari kîrî ni ta îria kana nainchû. Nguû ciaaku cieeraga bwega ta yeera rîa Lebanoni.

¹²Gaciere gaakwa, ûrî waakwa buru ûkari ta kamuunda kairigîri kana kathima ka mwene akî.

¹³Mîtî ya mîkukumanga nî îkûraga kamuundeene kau, najo matuunda jaayo nî jamathongi mono. Gûtî rîo jwaagaga maûa kana mîtî îrîa yumaga maguta jarîa jaeeraga.

¹⁴Ningî jûrî ndago, na mûthemba jwa matûngûrû na ndalasini, na mîtî ya ubaani, na mîtî ya manemane na ya udi, na mûtî jûrîa jumaga into birîa biîkagîra biakûrîa yeera.

¹⁵Gwe ûkari ta muunda jûrî na kîthima kîa rûûjî rûrwega ûkari ta tûmîuro twa rûûjî rûrûkembûku kuuma Lebanoni.

¹⁶Gwe ruuo rwa bwa ûrîo, ûkîîra, naagwe ruuo rwa bwa ûmotho njû! Njûûni buurutane kamuundeene gaakwa nîkenda bûtaambia yeera rîaako kûraaja. Mûnyaanya waakwa akeeja kamuundeene kaawe, arîe ntuunda ciaako irîa nthongi.