Read KIMERU BIBLE PROTESTANT EDITION Rwî 5 Bible Online

Rwî 5 - KIMERU BIBLE PROTESTANT EDITION bible

Rwî 5

¹Gaciere gaakwa, ûrî waakwa buru nkwîja kamuundeene gaakwa, nîkenda ntua manemane na into birîa biîkagîra biakûrîa yeera. Nî nkûrîa nainchû yaakwa amwe na magoa ningî ni nî nkûnyua ndibei yaakwa na îria. Buî acoore rûmeeni na bûkuunde, mwanka bwogitue nî wendo.

²Îgiita rîmwe nî ndamami, îndî ntaakiindi nî toro, ndîraroota nkiigagua mûnyaanya waakwa akîringaringa mûrango akiugaga atîrî, Ndugûrîra, gwe mûnyaanya waakwa gwe waakwa wa nkoro, ûkari ta kajea. Nkûûmîra oome nî mpio, mûtuundu jwaakwa nî jûgwetie îme.

³Nî nditîte nguû Ga-ngacoka gwîkîra cio kaîrî? Nî nthambîte magûrû, gangakinya nthî kaîrî?

⁴Mûnyaanya waakwa araambîrîria kûrugûra mûrango, naani ndîraigua nkoro yarûngama.

⁵Ndîrookîîra ndîreeta kûrugûrîra mûnyaanya waakwa. Naani nî ndaakîte njara manemane mwanka îkanyûrûkîîra biareene, na îreetîkîra konji nkîrugûra.

⁶Nî ndaarugûrîîre mûnyaanya waakwa mwari îndî we nî aarî agûciîtîra. Naani nî ndeendaga kwigua akîaria îndî ndîramûcwaa ntîmwoone, ndîramwîta îndî ataambîtîkîre.

⁷Akaria ba ntûûra nî baambonere rîrîa baakarîtie ntûûra. Barampûûra, barambîkîra ngûma, barandita nguû yaakwa ya îgûrû.

⁸Î-buî aka ba Jerusalemu, nî nkûbûromba atî bwona mûnyaanya waakwa, bûmwîre nîka nkûgirîka nî wendo.

⁹Gwe ûrî ûmûthongi nkûrûki ya aka bangî rî, nîka mûnyaanya waaku akûrûkîte arûme bangî na mbi? Tontû ûgûtûûria ûu rî, nîka mûnyaanya waaku akûrûkîte bangî na mbi?

¹⁰Mûnyaanya waakwa akeengakeengaga na arî inya înene akûrûkîte arûme babaingî mono.

¹¹Ûthiû bwaawe bûkari ta thaabu mûtuundu jwaawe nî jûmwirû na nî jûmûtaambûrûku.

¹²Meetho jaawe nî jamathongi ta kîjea kîrî akuî na karûûjî. Najo jathambîîtue na îria jeekîrwa arîa jabuîri kwîthîrwa jarî.

¹³Ûthiû bwaawe bûkari ta kamuunda kaandi into birîa biîkagîra biakûrîa yeera, mîromo yaawe nî ta maûa, nîka înyûûrûkaga manemane.

¹⁴Njara ciaawe nî ta mîreegi ya thaabu îgemetue na twiga twa goro. Mwîrî jwaawe jûteenderi ta mûgwongo, jûgemetue na twiga twa goro twa wiirû bwa îgûrû.

¹⁵Magûrû jaawe nî ta itugî bia nkoronyangwe bikinyithîtue antû kûthithîtue na thaabu. Mwonekere jwaawe nî ta kîrîma kîa Lebanoni, kîrî mîtarakwa îrîa mîeega mono.

¹⁶Rwaria rwaawe nî rûrwega ûntû muntû eendekia kûrwigua kaîrî na kaîrî. Ûu nîu mûnyaanya waakwa akari, buî aka ba Jerusalemu.