Read KIMERU BIBLE PROTESTANT EDITION Rwî 6 Bible Online

Rwî 6 - KIMERU BIBLE PROTESTANT EDITION bible

Rwî 6

¹Gwe ûrî ûmûthongi nkûrûki ya aka bangî rî, nîkû mûnyaanya waaku eetîre? Twîre eetîre na njîra îrîkû tûkûgwatie kûmûcwaa.

²Mûnyaanya waakwa eetîre muundeene jwaawe, kûrîa kûrî na mîtî îrîa yumaga into biagwikîra biakûrîa yeera. Nîkû arîthîtie ndîîthia ciaawe agîtuujaga maûa ja bûûrî.

³Mûnyaanya waakwa nî waakwa, naani ndî waawe. Arîthagia ndîîthia ciaawe gûntû kûrî na maûa ja bûûrî.

⁴Mûnyaanya mwendwa waakwa, gwe ûrî ûmûûthongi ta Jerusalemu, ûbuîte ta ntûûra ya Tiriza ûrî na inya ta atongeeria ba njûûrî.

⁵Tiga gûntega ûu ûnthîînia, mwîrî jûtîkeeje kwîngana. Mûtuundu jwaaku jûminyûkaga ta gîkundi kîa mbûri ciînami ibariine bia Gileadi.

⁶Maîgo jaaku nî jameerû cwaa gûtî noo rîmwe rîaajo rîkûûki jonthe jarî o.

⁷Makai jaaku nî jamathongi na ni jamateenderu jeenaenagia kinya wikunîkîte na gîtambaa.

⁸Mûnene no eethîrwe arî na aka-anene mîrongo îtaantatû na eethîrwe arî na aka ba gwîka mîrongo înaana, na aarî babaingî.

⁹Îndî nî ûmwe akî mpendeete nawe nî ûmûthongi mono Nîko gonka kaarî ka ng'ina, karîa ng'ina eendeete mono. Aka bonthe bamwonaga bakamûkathîrîîria, aka-anene na aka ba gwîka nî bamûkumagia.

¹⁰Nûû ûûjû ûkari ta riûa rîkiuma? Athongi ta mweri na akathaara ta riûa. Athaaraga ta njota.

¹¹Nî ndeetîre mûûndeene jwa mituunda, nîkenda mbona ûrîa mîtî îgûkûra kûu kîguuruune na nîkenda këethîra mîzabibû nî îkûtheûka, na këethîra mîkukumanga nî îkûraa.

¹²Mbere ya menya naarîa ndî, ndîroona ndî ngaarîîne ya ûnene.

¹³Mwarî wa Shulamu njû, coka kîrî tuî coka tûkwoone bwega. Nîkî tontû bûkwenda kûmbona, ni kaarî ka Shulamu teka nkwina antû bantegeete?