Read KIMERU BIBLE PROTESTANT EDITION Rwî 7 Bible Online

Rwî 7 - KIMERU BIBLE PROTESTANT EDITION bible

Rwî 7

¹Î gwe mwarî wa mûnene, magûrû jaaku nî jamathongi wîkîrîte iraatû! Biero biaaku ni biithongi ta twiga twa goro, bithithithîtue na ûtea bûbûnene.

²Mûkou jwaaku jûkari ta gapanûri karîa gatîagaga ndibei. Kauna gaaku gakari ta kîthûmba kîa nkano kîthiûrûkîri nî maûa.

³Nyoonto ciaaku ikari ta nthia ijîîrî kana nkûrûngû ijîîrî.

⁴Nkingo yaaku îkari ta mûnaara jûthithîtue na mîgwongo. Meetho jaaku jakari ta tûriaa tûrî ntûûreene ya Heshiboni, akuî na mpingîro ya Bathirabimu. Nyiûrû ciaaku ikari ta mûnaara jwa Lebanoni, jûrîa jwerekeene na ntûûra ya Damaski.

⁵Mûtwe jwaaku jûkari ta kîrîma gîa Karimeli, mûtuundu jwaaku nî jûkucagîîria mûnene nîûntû nî jûmûthongi mono.

⁶Mûnyaanya waakwa ûrî ûmûthongi mono, ûthongi bwaaku nî bûtûmaga ûkeendwa mono.

⁷Mûûmbîre jwaaku nî jûmûthongi ta mûkîndû na nyoonto ciaaku ikari ta imaanja bia ntende.

⁸Ni ngaitia mûkîndû na ncigwatîîre mpang'iine ciaaju. Ndîona nyoonto ciaaku ikari ta imaanja bia nzabibû, na mîrukî yaaku îkari ta yeera rîa matuunda ja apû.

⁹Kûmuumunya mîromo yaaku nî gûkûthongi, nkûrûki ya kûnyua ndibei îrîa njega buru, nkûrûki ya kûmeria ndibei.

¹⁰Ûûni ndî wa mûnyaanya waakwa, nî ni airîragîîria akî.

¹¹Njû Mûnyaanya waakwa, twîte miuundeene tûkaraare nau ntûûreene

¹²Naatuî tûgookîîra rûkîîrî tûkoone këethîra mîzabibû nî îgûkûra kana këethîra nî îkûraa. Ningî tûkoone këethîra mîkukumanga nî îkûtheûka. Au nîo ngaakwoneria wendo.

¹³Mîtî îrîa îtumagîrwa gûteethereria mûka kûgîa îu nî îkweera, na matuunda jamathongi jarî akuî na nyomba yeetû. Mûnyaanya waakwa nî mbîkîte matuunda jamathongi ja mîthemba yonthe nîûntû bwaaku.