Read KIMERU BIBLE PROTESTANT EDITION Isa 1 Bible Online

Isa 1 - KIMERU BIBLE PROTESTANT EDITION bible

Isa 1

¹ Gîkî nîkîo kîoneki kîrîa Isaya mûtaana wa Amozi oonerue kîegiî Juda na Jerusalemu. Oonerue kîo îgiiteene rîa waathani bwa Uzia na bwa Jothamu na bwa Ahazi na bwa Hezekia, barîa baarî anene ba nthîgûrû ya Juda.

²Thikîîra gwe îgûrû, naagwe nthîgûrû ûkinde gûtû; nîkwîthîrwa MWATHANI nî aarîtie auga atîrî, “Ndereete aana mwanka baakûra, îndî nî bandemeete baarega kûmbathîkîra.

³Ndeegwa nî iijî mwene, na ntigiri nî iijî rûkongoro rûrîa îîkagîîrwa îria; îndî Israeli îtî ûûme ta bûu, antû baakwa batî ûmenyo.

⁴Ai! Jûjû nî mûgongo jwa antû barîa beeagia, antû baritûîri nî meeyia, nchiarwa cia barîa bathithagia mantû jamaaî, antû bathwîre ûûma.” Nî baregeete MWATHANI, na bakamena Ûrîa Mûtheru wa Israeli, bagarûka bamuutatîra.

⁵Ûkaaringîkua kaîrî, tontû wîtîte na mbere na îrema? Kîongo gîaaku nî gîkîajie kîonthe, na nkoro yaaku nî îgirîkîte buru.

⁶Kuuma kaara ga kûgûrû mwanka rûchiûri rwa mûtwe gûtî o kûrî thîîria, kunthe no ngûma na iringîrwa na ironda; nabio bitîthambîtue kana biowa kana biorowua na maguta.

⁷Nthîgûrû yeenu îtigi îrî îgaanjo, ntûûra cieenu nî impîîthie na mwanki; mbîji cia kûngî nîcio ikûrîa nthî yeenu o bûkîonaga; nî îmbîrûkîre, ta nthî îînyangîtue nî maitha.

⁸Jerusalemu îîrûkîri ta kîrîngo kîa mûkaria muundeene jwa mîzabibû, ta kaganda muundeene jwa marenge, ta ntûûra încîgîîrie nî maitha.

⁹ Këethîra tîka MWATHANI Mweneinya eendere tûtigara matigari jamakai, tûrîngîkûthirua ta Sodomu, kana ta Gomora.

¹⁰Thikîîreeni rûteto rwa MWATHANI, buî athani ba Sodomu! Igueni ûrîtani bwa Mûrungu weetû buî antû ba Gomora!

¹¹ Igongwana bieenu bionthe tî gîntû kîrî ni, nîu MWATHANI akuuga, Nîng'anîtie igongwana bia gwakîîria bia ntûrûme na mathuunya ja nyomoo irîa noru. Tî tharike ya ndeegwa kana ya ntûrûme kana ya nthenge îngwîragia.

¹²Nûû ûbwîrîte bûkinyangage kîûrû gîaakwa ûjû rîrîa bwîjîte kûnthaathayia?

¹³Bûkáandeetera igongwana bia ûtheri kaîrî kinya yîeera rîa ubaani ntîkwenda kuriigua. Ntîkwenda mambura jeenu ja Mweri jûkîguûka kana mantû jegiî sabatû na biûthûrano birîa bituui; ntîûmba kûmîîria kwona bûkîîja biûthûranoone birîa itheru bûûjûri meeyia.

¹⁴Mambura jeenu ja Mweri jûkîguûka na biatho bieenu birîa bituui, mbithwîre na nkoro yaakwa yonthe. Nîbituîkîte mûrigo kîrî ni, na nî nogete nî kûbikamata.

¹⁵Rîrîa bûgûtambûrûkia njara cieenu bûkîromba ngaikunîka meetho ntîkoone. Kinya bwaromba maromba jamaingî atîa, ntîbûthikîîra nîkwîthîrwa njara cieenu nî ciûjûrî tharike.

¹⁶Thambeni; itherieni bwee babatheru; tigeeni kûthithia mantû jamaaî mbere ya meetho jaakwa. Tigeeni kûthithia mantû jamaaî,

¹⁷iritaneeni kûthithagia mantû jameega; giitanagîreeni mantû na îota, teethagieni barîa bainyîîrîtue, tetagîîreni aana barîa batî na aciari, na bûtetagîîre ntigwa.

¹⁸“Njûûni twaranîrie, nîu MWATHANI akuuga: kinya meeyia jeenu jeethîrwa jarî jamatuune ta tharike, bûkaatherua bûkare ta nkamia; kinya jeethîrwa jarî jamatuune tunî, bûkeerûa bûkare ta bamba.

¹⁹Bwambigua na bwambathîkîra, bûkaarîa biega bia nthîgûrû îîjî.

²⁰Îndî bwarega kûmbigua na kûmbathîkîra, bûkaathirua na rûchiû. Nî ni MWATHANI Mûrungu Mweneinya ndauga mantû jau.”

²¹Nîatîa ntûûra îrîa yatwîre îrî mbîtîkua îete maraya? Yaatwîre îkîthithagia mantû ja îota! Atûûri baayo baarî antû babaagîru, îndî nandî nî ooragani batwîre ku.

²²Gwe Jerusalemu nandî ûkari ta fetha yungene na rûko, kana ta ndibei îîkîri rûûjî.

²³Atongeeria baaku nî ndemi na nî acoore ba aamba. Bonthe beendeete nkukumo; na kûewa biewa. Batîrûagîîra aana barîa batî na aciari kana bateteera ntigwa.

²⁴Tontû bûû, MWATHANI, tawe MWATHANI Mweneinya Ûrîa Mweneinya wa Israeli ariuga ûjû: “Ngaatûrîkîria anthû baakwa mûthûûro jwaakwa ndiirîîrie kîrî barîa banthwîre.

²⁵Nkaabûgarûka mbûkanûkie; nkaabûkerûra ta ûrîa chuuma îkerûragwa îkîtherua mbûrite rûko runthe rûrîa bûrî naru.

²⁶Ningî ngaacokia agambi ta barîa bwaarî nabo mbereene, na aeejani kîrîra ta barîa bwaarî nabo kîambîrîriene. Nyuma ya mantû jau, Jerusalemu îgaatua gwîtagwa ntûûra ya waagîru ntûûra îrîa mbathîki.”

²⁷MWATHANI akoonokia Zaiûni na îota rîaawe nabo atûûri baayo barîa bakairira, akaabakûûra nîûntû bwa waagîru bwaawe.

²⁸Îndî barîa ndemi na eeyia, bakaathirîrua amwe barîa baregeete MWATHANI bakooragwa bathire.

²⁹Bûcokeerwe nî nthao nîûntû bwa miuuru[1] îrîa bwagwîragîrua mono, no mwanka bwirire nîûntû bwa miuunda[2] miuunda îrîa bwaithuurîre.

³⁰Bûgaakara ta muuru jûrûrûki mabûûra, kana ta muunda jûtî rûûjî.

³¹Barîa barî inya bagaakara ta ndagara, îrîa îîthagua nî nthande îmwe ya mwanki; bonthe bakaaya bathire, gûtî we ûkabooreria mwanki.