Read KIMERU BIBLE PROTESTANT EDITION Isa 10 Bible Online

Isa 10 - KIMERU BIBLE PROTESTANT EDITION bible

Isa 10

¹Wûi kîrî buî barîa bûthithagia waatho bwa kûinyîîria antû baakwa, na kîrî buî aandîki barîa bakaraga bakîandîkaga waatho bwa kûinyîîria bangî.

²Bûgarûraga Waatho nîkenda barîa barî na ûbatu batîthithîrua mantû ja îota, na bûkagiria nkia ithithîrua mantû jarîa jagîrîte. Bûtûmaga ntigwa ithangîkua, na aana barîa batî aciari bainyîîrua.

³Nîatîa bûkaathithia ntukû ya îkanûkia yakinya? Nîatîa bûkaathithia thîîna inyingî ciabwîjîîra kuuma kûraaja? Nî kîrî û bûkaaamatûka gûcwaa ûteethio? Nîkû bûkaaitha mootonga jeenu?

⁴Bûtîîthîrwa bûrî na bwa kûthithia tiga gûkara nthî amwe na barîa bagwati kana bwîthîrwe bûûragi. Îndî amwe na jau jonthe rî, MWATHANI atîthûûrûka, ageeta o na mbere na îkanûkia rîaawe.

⁵ Mûrungu ariuga ûjû, “Asîria nîbo rûturo rwaakwa rîrîa nthûûri; nîbo mûregi jwaakwa rîrîa ndî na marûrû.

⁶Nî ni mûtûmîte kîrî mûgongo jûrîa jûregeete Mûrungu; nî ni mwîrîte akaithûkîre antû barîa banthûûrîtie, na atae into biaao na abatuunye ûtonga bwaao, ningî abakinyangîre nthî ta ntaka.

⁷Îndî mûnene wa Asîria we arî na mîbango yaawe; atîkwenda kûmenya këethîra nî ni nkûmûtumîra. Îndî mathûgaanioone jaawe arîciîra atî akaaithûkîra mîgongo îmiingî na amîthirie.”

⁸Ariuga atîrî, “Anga atongeeria baakwa ba njûûrî bonthe tî anene!

⁹Nkathiria ntûûra ya Kalino ta ûrîa ndaathirîrie Karikemishi. Nkathiria ntûûra ya Hamathi ta ûrîa ndaathirîrie Aripadi. Nthirie ntûûra ya Samaria ta ûrîa ndaathirîrie Damaski.

¹⁰Nîndûîte na moonene ja mîrungu ya mîng'uanano, îrîa yaarî îmînene nkûrûki ya mîrungu îrîa yaarî Jerusalemu na Samaria.

¹¹Ga nkaaremwa nî kûthithîria Jerusalemu na mîrungu yaao ta ûrîa ndaathithîîrie Samaria na mîrungu yaayo ya mîng'uanano?”

¹²Rîrîa MWATHANI akathiria kûthithia mantû jarîa akwenda kûthithîria kîrîma kîa Zaiûni na ntûûra ya Jerusalemu, nîrîo agaakanûkia mûnene wa Asîria nîûntû bwa rwikumio rwaawe na gûciîkîîra kwaawe.

¹³Nîkwîthîrwa mûnene ûu augaga atîrî, “Nthithîtie mantû jau na inya yaakwa na ûûme bwaakwa, nîûntû ni ndî na ûmenyo. Nîntharîtie mîanka ya mîgongo na ndaataa mîthithû yaao. Mbakirimûrîte ta ndeegwa, ndaarûkia barîa batwîre bakarîrîte itî bia ûnene.

¹⁴Mbikîtie njara ndaagwata ûtonga bwa mîgongo, ta ûrîa muntû aikagia njara akîrita nkara kiuruune. O ta ûrîa muntû oothûranagia nkara ciîrûkîri, no ta u mbûthûranîtie ûtonga bwa nthî yonthe; na gûtî we wabatabatia îthagu kana atumûra kanyua kana agamba.”

¹⁵Îndî MWATHANI arîûria atîrî, “Ntûûru yomba gwikumîria ûrîa ûtemaga nayo? Mûchumeno jwoomba gûciîkîîra îgûrû rîa ûrîa waatûraga naju? Rûturo rwoomba kwinainia ûrîa ûrûgwete? Nchûgûma no yûkîîrie ûrîa ûmîgeraga?”

¹⁶Tontû bûû rî, MWATHANI Mûrungu Mweneinya, akaareetera nchamba cia ndwaa cia Asîria mûrimo jûmûthûûku. Mwago jwaao jûthire ta jûîîthîtue nî mwanki.

¹⁷Mûrungu, tawe weerû bwa Israeli, akaa mwanki; Ûrîa Mûtheru wa Israeli aee rûmûrî rwa mwanki. Naju jûkaîîthia na jûthirie mîtî yaawe ya miigua na ithaka biaawe ntukû îmwe.

¹⁸MWATHANI akathiria ûthongi bwa mwitû jwaawe na ûnoru bwa nthîgûrû yaawe, ningî athirie antû bonthe, bakoorûrûka ûrîa muntû aceng'aga aajîtue.

¹⁹Mwitû jwaawe junthe jûkathira atigare na tûmîtî tûtûkai tûûmba gûtarwa nî kaana.

²⁰Îgiita rîgaakinya rîrîa antû barîa bakeethîrwa batigeere ba Israeli, tabo matigari ja rûrîîjo rwa Jakubu bagaatiga gwîka wîrîgîîro bwaao kîrî muntû ûrîa ûboombîte ndweene; nabo bageeka wîrîgîîro bwaao kîrî MWATHANI, Ûrîa Mûtheru wa Israeli batî na nkaanja.

²¹Antû barîa bagatigara nîbo bagaacoka, bau nî ba rûrîîjo rwa Jakubu, nîbo bagaacoka kîrî Mûrungu Mweneinya.

²² Nîkwîthîrwa antû baaku gwe Israeli kinya bëethîrwa baingîi ta mûthanga jwa îria, nî babakai bagaacoka. Nî batuîri atî bakathirua buru; bakanûkue ûrîa kwagîrîte.

²³MWATHANI, tawe MWATHANI Mûrungu Mweneinya, no mwanka oojûrie jarîa augîîte mbere ya antû bonthe.

²⁴Tontû bûû, MWATHANI, tawe MWATHANI Mûrungu Mweneinya ariuga ûjû, “Buî antû baakwa barîa bûtwîre Zaiûni; tigeeni gûkîra antû ba Asîria barîa babûûraga na nturo na mîreegi ta ûrîa antû ba Misri baathithagia.

²⁵Nîkwîthîrwa îgiita rîtî thau, mûthûûro jûrîa bûthûûrîtie jûkathira, naani mbagarûkîre mbathirie.

²⁶Naani MWATHANI Mûrungu Mweneinya nkaabaûûra na kîboko, ta ûrîa ndaaûûrîîre antû ba Midiani iigeene rîa Orebu. Naani ngookîîria rûturo rwaakwa îgûrû rîa îria o ta ûrîa ndaathithîrie Misri.

²⁷Îgiita rîu rîakinya, nkaabwaûra mûrigo jûrîa mûnene wa Aramu aabûkamatithîtie, na mbûrite gîchooki kîrîa abwîkîrîte nkingo.

²⁸Anthû baagûtaa ntûûra ya Aiathi; baagûkûrûkîîra Migironi, baatiga mîrigo yaao Mikimashi.

²⁹Baakûgiitania na njîra ya mûcîcîbîro baararîrîîre Geba. Antû ba Rama ka bakwinaina; atûûri ba Gibea, ntûûra ya Saûlû baakûmatûka.

³⁰Ugeeni mbu buî antû ba Galimu! Thikîîreeni buî ba Laisha! Naabuî ba Anathothi beetîkeeni!

³¹Antû ba Madimena baakûmatûka; atûûri ba Gebimu ka bakwithara bacionokia.

³²Naarua îîjî anthû bakaarûngamîra Nobu bainainîrie kîrîma kîa Zaiûni nkuundi, bamakie ntûûra ya Jerusalemu.”

³³Atîrî, MWATHANI, tawe MWATHANI Mûrungu Mweneinya akaabaringa nthî mpu ta mîtî agûkiinda. Barîa anene buru bakaarîîkwa bagwîthue; nabo barîa barî îgweta bakeenîkwa mwanka mûthetuune.

³⁴MWATHANI akaabarîîka ta ûrîa mîtî ya mwitû îrîîkagwa; akaabaringa nthî ta ûrîa mîtî îrîa mînene ya Lebanoni îkiindagwa.