Read KIMERU BIBLE PROTESTANT EDITION Isa 11 Bible Online

Isa 11 - KIMERU BIBLE PROTESTANT EDITION bible

Isa 11

¹ Gûkaauma nchebua gîtineene kîa Jesii; mûnene ûmwerû akaauma ta rwang'i mîriine yaawe.

²Roho wa MWATHANI akeethîrwa arî ndeene yaawe; nîwe roho wa ûûme na ûciûku. Nîwe roho wa kîrîra na ûûmbani; nîwe roho wa ûmenyo na kwathîkîra MWATHANI;

³Kwathîkîra MWATHANI nîku gûkethagîrwa kûrî kûgwîrua kwaawe. Atîtua kûgiitaga magamba kûringana na ûrîa akwigua gûkîarua, kana atuujanîra kûringana na woni bwa meetho,

⁴ Îndî we akaagiitagîra nkîa îgamba na îota, na aatujagîre barîa batî na inya bwega. Kiugo kîaawe nîkîo gîkethagîrwa kîrî rûturo rwa gûkanûkia nthîgûrû yonthe, nabo barîa bathithagia ûûî nteto ciaawe nîcio ikaabathiria.

⁵ Waagîru nîbu bûkethagîrwa bûrî mûcibi jwaawe jwa kauna; agaikundîkaga ûûma magiita jonthe.

⁶ Mbûee îgaatua gûkaranagia amwe na kang'ondu nayo nkarî îgaatua kûmamaga amwe na kabûri. Njaû cia ng'ombe na biana bia ngatûnyi bikaarîîjaga amwe na ngatûnyi, na twaana tûnyi nîtu tûkaabitongagîîria.

⁷Ng'ombe na ndû ikaarîîjaga irî amwe, nabio biana biaacio bikaamamaga amwe; nayo ngatûnyi îgaatua kûrîîjaga nyaki ta ng'ombe.

⁸Mwana ûtîtigîte gwonka akaathaakagîra îgûrû rîa îrinya rîa njoka; mwana mûnyi agaikagia njara îrinyeene rîa kiua.

⁹ Kîrîmeene kîa Mûrungu gîkîtheru, antû batîtua kûthithanagîria moothûûku kaîrî, nîkwîthîrwa antû bonthe nthîgûrûûne bakeethîrwa boojûri ûmenyo bwa MWATHANI o ta ûrîa îria rîîthagîrwa rîûjûri rûûjî.

¹⁰ Îgiita rîu rîakinya, mûnene ûu ûkaaumania na rûrîîjo rwa Jesii nîwe ûkeethîrwa arî ngerekano kîrî antû bonthe. Antû ba mîgongo yonthe bagaacwaga kîrîra kîrî we, nakîo gîkaro kîaawe gîkethagîrwa kîrî na mwago mono.

¹¹Îgiita rîu rîakinya, MWATHANI agaatambûrûkia njara yaawe o kaîrî oothûranie antû baawe barîa bakeethîrwa batigeere nthîgûrû ya Asîria, na ya Misri, na ya Pathirosi, na ya Ethiopia, na ya Edomu, na ya Shinari, na ya Hamathi, na nthîgûrû irîa irigeenie na îria.

¹²Mûrungu akaamba bendera mîgongo yonthe yone akîûthûrania antû ba Israeli kuuma nthî ingî irîa batwîre. Ningî agaacokanîîria antû ba Juda barîa baaragene kuuma nteere cionthe cia nthî.

¹³Rûriitho rwa Efuraimu rûkaathira, nabo barîa batwîre kûthangîkia Juda beebue. Efuraimu îgaatiga kwigîîrua Juda rûriitho, nayo Juda îgaatiga kûthangîkia Efuraimu.

¹⁴Îndî antû ba Juda na ba Efuraimu bakaagwatanîra baithûkîre Afilisti bwa rûgûrû; ningî bagaataa antû ba bwa gaiti. Bakaaithûkîra Edomu na Moabu, nabo Aamoni bakaabaathîkîra.

¹⁵ MWATHANI akaanyaaria Îria Îtuune buru; ningî agookîîria njara yaawe îgûrû rîa rûûjî rwa Eufurate, areete ruuo rûrî na mwanki, arûgaanie rûtuîke tûmîberethi mûgwanja nîkenda antû boomba kuuna na magûrû.

¹⁶Tontû bûû, MWATHANI akaathithîria matigari ja antû baawe njîra îmbariî ya kuuma nayo nthîgûrû ya Asîria, o ta ûrîa aathithîîrie Aisraeli rîrîa baaumaga nthîgûrû ya Misri.