Read KIMERU BIBLE PROTESTANT EDITION Isa 13 Bible Online

Isa 13 - KIMERU BIBLE PROTESTANT EDITION bible

Isa 13

¹ Jaja nîjo mantû jarîa Isaya mûtaana wa Amozi oonerue nî Mûrungu jegiî Babiloni.

²“Amba bendera karimene gatî mîtî, îta njûûrî na kajû gakanene; mîenerie na njara iithûkîre ntûûra cia barîa barî îgweta.

³Nî ni ningwa mbîîrîte antû baakwa barîa nciathûrîrîte ûrîa bathithia; nî ni mbugîîte nchamba ciaakwa cia ndwaa ikanûkie barîa banthûûrîtie, nîcio irîa îgwîragîrua kûûjûria wendi bwaakwa.”

⁴Thikîîra wigue gîtûma kîrîa gîkuuma irîmeene gîa antû babaingî; thikîîra kîrûngûûjû kîa moonene na mîgongo îkîûthûrana amwe; Nî MWATHANI Mûrungu Mweneinya ûkûûthûrania njûûrî ya ndwaa.

⁵Baumîte kûraaja, matura nthî; nîbo MWATHANI akwenda gûtumîra gûkanûkia nthîgûrû yonthe nîûntû bwa mûthûûro jwaawe.

⁶ Rîreni na inya nîûntû ntukû ya MWATHANI ya îgamba îrî akuî; nîyo Mweneinya akaareta îkanûkia rîa kûthirania.

⁷Nacio njara cia antû bonthe ikaaga inya na antû bonthe bagaakua nkoro.

⁸Antû bakaagwatwa nî kîmako gîkînene, baigue ûrûrû na bathangîke mono; bakaathangîke ta mûka akîgîa na mwana, bategane baami nî kwaga bwa kûthithia.

⁹Tega, ntukû ya MWATHANI ya îgamba îrî akuî, nayo nî ntukû înthûûku mono îrîa Mûrungu akoonania mûthûûro jwaawe. Akeenyangia nthîgûrû buru, amwe na eeyia barîa barî ku.

¹⁰ Njota igaatiga kûthaara; riûa rîgaakunîkîrwa rîtîkaare, naju mweri jûtîmûrîka.

¹¹MWATHANI ariuga atîrî, “Ngaakanûkia nthîgûrû nîûntû bwa ûthûûku bwaayo, na eeyia nîûntû bwa meeyia jaao. Nkaathiria rwikumio rwa barîa baikumîtie na nthirie ûchamba bwa barîa batî kîaao na bangî.

¹²O ta ûrîa thaabu îrîa nthongi îrî inya kwoneka, nou gûkeethîrwa kûrî na inya kwona kinya muntû ûmwe. Ngaatûma antû batuîke babakai nkûrûki ya thaabu ya Ofiri.

¹³Ngaatûma îgûrû rîteteme na ndeete kîthingithia nthîgûrûûne ntukû îrîa nkoonania mûthûûro jûmûnene ûûni MWATHANI Mweneinya.

¹⁴Nabo antû bakaaragana ta ng'ondu itî na mûrîîthi, kana ta nkûrûngû imakîtue. O muntû akaaririkanaga gwa antû baao, akamatûka gwiciitha nthîgûrû îrîa aumîte.

¹⁵Ûrîa wonthe ûkoonekana nooka akaamûntwa na îtumo; ûrîa wonthe ûkaagwatwa nooka akooragwa na rûchiû.

¹⁶Twaana twaao tûkaathetherangwa bakîonaga; into bia nja ciaao bikaajûkua bionthe, nabo aka baao bakathengeerwa kwa inya.

¹⁷Atîrî, ngookaûkia Amedia babaithûkîre Bau batîtindanagîra na fetha, na batîonaga thaabu ta gîntû.

¹⁸Nabo bakaathiria nthaka cionthe na mîgwî, ningî batiigîîrua twaana kîaao, kana bamakîra tûkenke.

¹⁹ Kinya këethîra Babiloni nîyo nthîgûrû îrîa îrî nkuma nkûrûki ya ingî cionthe, na nîyo Akalidea batûûraga gûciîkîîra na gwikumia nayo. Îgaakara ta ûrîa Sodomu na Gomora ciakarîre rîrîa ciaithûkîîrwe nî Mûrungu.

²⁰Îtîkarocoka gûtûûrwa nî antû kaîrî; gûtî Mwaarabu ûkoroamba îema rîaawe ku, na gûtî mûrîîthi ûkororîîthia ng'ondu na mbûri ciaawe gûntû kûu.

²¹ Nyamû cia kîthaka nîcio cionka igaatûûraga ku, nacio nyomba cia gûntû kûu îgaatûûraga ciûjûri nyomoo ndîîjani. Kûu nîku thirai igaatûûraga, na nîku mbûri cia kîthaka igaatûûatûûaga.

²²Mbiti nîcio ikagambaga mînaareene ya akaria ba gûntû kûu, nacio mbîrwa nîcio ikagambaga nyomba irîa nthongi cia anene. Îgiita rîa Babiloni nî rîrîthiru, naku kwînyangua kwaayo kûrî akuî.”