Read KIMERU BIBLE PROTESTANT EDITION Isa 14 Bible Online

Isa 14 - KIMERU BIBLE PROTESTANT EDITION bible

Isa 14

¹MWATHANI akaaigîîrua nchiarwa cia Jakubu kîaao. Akaathuura antû ba Israeli kaîrî na abeeke nthîgûrû yaao yongwa. Nabo antû batî ba Israeli bakaairinganîra nabo batuîke ba mwîrîga jwa Jakubu.

²Antû ba mîgongo îngî bakaaringîîria Aisraeli babaanie nthîgûrû yaao îrîa baaerwe nî MWATHANI. Îndî antû ba Israeli bakaabaeethia nkombo ciaao cia arûme na cia aka. Bagaataa barîa batwîre kûbataa na baathe barîa batwîre kûbaatha.

³Rîrîa MWATHANI akeebeeria Aisraeli mîthangîko yaao yonthe na abanogokie ngûgî indito na abarite ûkomboone,

⁴bakaathûmbagia mûnene wa Babiloni bakiugaga ûjû: “Mûnene ûrîa ûtwîre kûiinyanîîria nî aroombîrwe; waathani bwaawe bûbûthûûku nî bûbûthiru.

⁵MWATHANI nî aunangîte rûturo rwa barîa baaî; na abatuunya inya yaao ya waathani.

⁶Nîkwîthîrwa bo batwîre baûûraga antû na marûrû bakathangîkia antû batîkûnoga batwîre baathaga mîgongo îngî na mûthûûro, bakîmîinyagîîria magiita jonthe.

⁷Îndî nandî nthîgûrû yonthe îrî na thîîrî na ûkiri, antû bonthe ka bagûkûngûîra.

⁸Kinya mîtî nî îgwîrîtue nî mantû jau; mîtarakwa ya Lebanoni îrîkûngûîra îkiugaga atîrî, ‘Nandî tûtîona wa gûtûtema nîûntû nî ûmûûmbe.’

⁹Barîa barî gwa akuû nî beeteerete rîrîa mûnene wa Babiloni agaakinya; mîoyo ya barîa baarî anene nthîgûrûûne nî yûkîîrîte kûmûthagaana.

¹⁰Nabo bonthe baramwarîria bakiugaga atîrî, ‘Kinya gwe nandî ûrî wa ûtheri o ta tuî! Ûtî na nkûûrani naatuî!’

¹¹Îgweta rîaaku rîonthe rîkûthirîra gwa akuû, amwe na ndwîmbo irîa winagîrwa cia inanda bia ndigi. Ing'inyo nîbio gîtanda gîaaku, nacio nthingiiri nîcio mûrîngîti jwaaku.

¹² Uumîte îgûrû wagwa nthî, gwe mûnene wa Babiloni, gwe njota ya rûkîîrî. Gwe ûtwîre ûkinyangaga mîgongo îngî, nandî ûrî ûmûringe nthî.

¹³ Ûtwîre uugaga atîrî, ‘Ndîtaambia ûnene bwaakwa mwanka îgûrû kwa Mûrungu, mbathanage kinya îgûrû rîa njota. Ngaakaragîra gîtî gîaakwa kîa ûnene kîrîmeene kîrîa mîrungu îcemanagia, mbathanage ndî bwa rûgûrû buru.

¹⁴Ngaitia îgûrû buru mwanka nkûrûke matu, mbîthîrwe ng'aneene na Mûrungu Ûrîa Ûrî Îgûrû buru.’

¹⁵Îndî nandî wînîki nthî mwanka îrinyeene, wînîki nthî mwanka gwa akuû.

¹⁶Barîa bagûkwona barîgûtega barigari bagaciûria, ‘Ûûjû noowe ûrîa ûrainainagia nthîgûrû yonthe na moonene?

¹⁷Noowe ûrîa ûreenyangagia ntûûra mwanka nthîgûrû îgatigwa îkari ta rwanda? Noowe ûrîa ûrataaga antû ndweene atîreke bacoka kwaao kaîrî?’

¹⁸Anene bangî bonthe ba mîgongo bamami mbîrîreene ciaao inthongi,

¹⁹îndî gwe ûringi nthî kûraaja na mbîrîra yaaku, ta muntû ûtî na gîtûmi. Ûguîkîri nî biimba bia antû, bia barîa booragîri ndweene. Ûgeri amwe nabo mbîrîreene ya maiga, ningî wakinyangîrwa nthî.

²⁰Ûtîthikwa ta anene bangî, nîkwîthîrwa nî wînyangîtie nthîgûrû yaaku na wooraga antû beenu. ‘Nchiarwa cia eeyia irothira ikoorîria!

²¹Ithuranîreni bûûrage aana baawe, nîûntû bwa meeyia ja biûjûjû biaao. Menya beeja gûûkîîra bamamîra nthîgûrû, bataambia waathani bwaao kaîrî ntûûreene cionthe.’”

²²MWATHANI Mûrungu Mweneinya ariuga atîrî, “Nkaaithûkîra antû bau; nkaathiria Babiloni amwe na antû baayo, na aana baao, na aana ba aana baao. Ûu nîu MWATHANI augîîte.

²³Nkaamîethia marinya ja ncheege na mîûjûrie marimba. Nkeegera Babiloni na kîegeri gîa kûthirania îtigwe îrî întheri buru.” Nîu MWATHANI Mûrungu Mweneinya akuuga.

²⁴ MWATHANI Mûrungu Mweneinya aciîtîtie auga atîrî, “Ûrîa mbangîte nîu gûgaakarîka; ûrîa nkwenda no mwanka bûûjûre.

²⁵Nkaathirîria antû ba Asîria nthîgûrû yaakwa ya Israeli, mbakinyangîre irîmeene biaakwa. Nkaarita gîchooki kîrîa beekîrîte antû baakwa nkingo na mbaaûre mûrigo jûrîa babakamatithîtie.

²⁶Ûjû nîu mbangîte kûthithîria nthîgûrû yonthe nayo njara yaakwa nî îtambûrûkîtue nîûntû bwa gûkanûkia mîgongo yonthe.”

²⁷Nûû ûûmba kûthûûkia mûbango jûrîa MWATHANI Mûrungu Mweneinya abangîte? MWATHANI agaceema agûtambûrûkia njara yaawe rî, nûû ûûmba kûmîcokia?

²⁸ Nteto iji ciaeejanîrwe mwakeene jûrîa mûnene Ahazi aakuîre:

²⁹ “Tigeeni kûgwîrua buî antû ba nthîgûrû ya Filisti kinya këethîra mûnene ûrîa ûrabûûraga nî arakuîre. Nîkwîthîrwa mbeeû ya njoka îng'entu nîyo îîthagîrwa îng'enti nkûrûki.

³⁰Îtîkieni atî antû baakwa, kinya barîa nkîa buru, bakaarîjaga na banyunyage, na barîa batûûraga thîîneene bagaikaragîra majîîga. Îndî buî nkaabûthiria na mpara, na mbûrage matigari jeenu.

³¹Ambîîrieni kuuga mbu buî ntûûra cia Filisti; ûkieni kîrîro bwinthe nîûntû bwa kîmako. Nîkwîthîrwa njûûrî îrîa îîjîte yumîte bwa ûrîo gaîgûûkia tîîri; nî njûûrî itî kûguaa noo kîmwe, nî ya nchamba cia ndwaa akî.”

³²Nîatîa tûgûcokeria atûmwa barîa beejîte kuuma Filisti? Bacokerieni atîrî, “MWATHANI nî arîîkîtie gwîkîra Zaiûni inya; nandî nîkîo kîmatûkîro gîa antû baawe barîa batwîre kûthangîkua.”