Read KIMERU BIBLE PROTESTANT EDITION Isa 15 Bible Online

Isa 15 - KIMERU BIBLE PROTESTANT EDITION bible

Isa 15

¹ Bûbû nîbu ûroria bwegiî Moabu. Moabu nî înthiru nîûntû ntûûra ya Ari nî îmbînyangie na ûtukû bûmwe; Moabu nî înthiru nîûntû ntûûra ya Kiri nî îmbînyangie na ûtukû bûmwe.

²Atûûri ba Diboni baitîtie tûrîmeene tûrîa tûritagîrwa igongwana kûrîrîra ku; bakîrîragîra ntûûra ya Nebo na ya Medeba; beenjete mîtuundu na ireru bonthe nîûntû bwa kwithikîîra.

³Bamwe barîîta na njîra beekîrîte mathango; bangî barî nyomba îgûrûgûrû na biaragoone bia ntûûra; bonthe barîrîte meethori jakathira.

⁴Atûûri ba Heshiboni na ba Eleale no mbu bakuuga, nakîo kîrîro kîaao kîriigîgua mwanka Jahazi. Kinya antû ba njûûrî ya ndwaa ba Moabu barî na kwithikîîra gûkûnene; bakuîte nkoro buru nî ûguaa.

⁵Ndî na kwithikîîra gûkûnene nkoroone yaakwa nîûntû bwa antû ba Moabu, ndoona ûrîa bakûmatûka beetîte gwiciitha Zoari na Egilathi-shelishiya. Bamwe bariitia bwa Luhithi bakîrîraga; bangî beerekerete bwa Horonaimu bagiikaagîra.

⁶Îndî karûûjî ka Nimurimu nî kawîte gakoomagara; nyaki nî îrîîkîtie kuuma na matî joorûrûka; na nandî gûtîkîo gîkûriiba.

⁷Tontû bûû, antû barîjûkia mîthithû yaao, na into birîa bionthe bamaathîte, bakauna nabio karûûjî karî mîtî nteere ciaako beetîte.

⁸Kûrî na kîrîro kunthe nthîgûrûûne ya Moabu; kîriigîgua kûraaja mwanka ntûûra ya Egilaimu gîgakinya mwanka Beeri-elimu.

⁹Rûûjî rwa ntûûra ya Diboni rûûjûri tharike; îndî amwe na bûu, ûûni MWATHANI nkaareetera Diboni mantû jamanene nkûrûki antû ba Moabu barîa bagatigara nthîgûrûûne na barîa bakamatûka, nkaabatûmîra ngatûnyi cia kûbathiria.