Read KIMERU BIBLE PROTESTANT EDITION Isa 16 Bible Online

Isa 16 - KIMERU BIBLE PROTESTANT EDITION bible

Isa 16

¹“Antû ba Moabu barîa batûûraga ntûûreene ya Sela, îrîa îrî rwanda baagûtûmanîra kîewa kîa tûng'ondu kîrî mûnene wa Juda kûu Jerusalemu kîrîmeene kîa Zaiûni.

²Aka ba Moabu barîonekana bakari ta tûnyoni tûgwîte kuuma kiuruune, bakîgeria kuuna rûûjî rwa Arinoni.

³Barîîra antû ba Juda atîrî, Twîreni ûrîa tûkûthithia; tûteethieni kîrî anthû beetû ta ûrîa mûng'unye jûgiragia antû batîkaaye nî riûa rîa mûthenya. Twitheni tûtîkoonwe nî anthû beetû nîûntû gatûmatûkîte tûtîkooragwe.

⁴Rekeni tuî, barîa tûmatûkîte kuuma Moabu tûtûûre amwe naabuî; tuîkeni giiciitho gîeetû kuuma kîrî ooragani.” Rîrîa mûiinyaniîria akeebua o wînyangia bûkaathira, na mûkinyangani aume nthîgûrû.

⁵Tontû bwa kîaao kîrîa gîtîthiraga, gîkaagîa na waathani bûbwerû, gûkaagîa na mûnene ûmwagîru wa rûrîîjo rwa Daudi. We agaatuujanagîra na îota na athithanagîrie ûrîa kwagîrîte.

⁶Nîtwigîtue ûrîa antû ba Moabu baikumîtie; nî tûîjî ûrîa baciigagua na bagaciîkîîra; îndî rwikumio rwaao nî rwa ûtheri.

⁷Tontû bûû, antû ba Moabu bakaarîra; bonthe bakaarîra banoge; Bakaithikîîra nîûntû bwa mîthangîko mwanka baririkane mîgaate ya kwimbithia îrîa baatwîre kûrîa ntûûreene ya Kiriharisethi.

⁸Miuunda ya Heshiboni na mîzabibû ya Sibuma îtîcoka kuuma gîntû, nîûntû îkeenyangua nî athani ba nthîgûrû ingî. Kûrî rîo miuunda yaao ya mîzabibû yataambîte îgakinya ntûûra ya Jazeri na îgatonya rwanda; yataambîte mwanka îrieene rîa Chumbî.

⁹Nkaarîra amwe na antû ba Jazeri, nkîrîrîra mîzabibû ya Sibuma; nkaarîra amwe na antû ba Heshiboni na Eleale. Nîkwîthîrwa kûu miuundeene yaao nîku ndwaa îkûrûîrwa.

¹⁰Gûtî gîkeno kana kûgwîrua kaîrî miuundeene îrîa mînoru; miuundeene ya mîzabibû, gûtî ndwîmbo ikwinwa kana gûkûngûîra; gûtî muntû ûgwotora nzabibû imiiriine na majû ja kûgwîrua nî jakirîtue.

¹¹Nkoro yaakwa nî îkûrîrîra Moabu ta kînanda kîa ndigi gîkîringa rwîmbo rwa mathiko; ndî na kwithikîîra nîûntû bwa Kiriheresi.

¹²Antû ba Moabu bariitia tûrîmeene kûrita igongwana, îndî no kwinogia bakwinogia ûtheri; barîîta iromberoone biaao gûcierencanîîra, îndî gûtî we ûkûbaigua.

¹³Nteto iu nîcio MWATHANI aarîtie ciegiî Moabu mbereene.

¹⁴Îndî nandî MWATHANI ariuga atîrî, “Mîaka îthatû îkîthira kuuma nandî, nkuma ya Moabu îkaathira; kinya këethîra njûûrî yaao nî înene, nî antû babakai mono bagaatigara, na kinya bo bakeethîrwa barî bionje.”