Read KIMERU BIBLE PROTESTANT EDITION Isa 17 Bible Online

Isa 17 - KIMERU BIBLE PROTESTANT EDITION bible

Isa 17

¹ Bûbû nîbu ûroria bwegiî Damaski: “Atîrî, ntûûra ya Damaski îkaamomorangwa îtuîke kîthûmba kîa maiga.

²Ntûûra cia Sîria ikeerûkîrwa nî antû; ng'ondu na mbûri nîcio ikaangaangaga ku itîgûkîra.

³Nthingo cia ntûûra irîa irî Efuraimu ikamomorangwa na waathani bwa Damaski bûthirue. Nabo antû ba Sîria barîa bagaatigara bakaaga îgweta o ta antû ba Israeli. Ûu nîu MWATHANI Mûrungu Mweneinya augîîte.

⁴Îgiita rîu rîakinya, nkuma ya Israeli îkaûra, nabu ûthinyaari bwayo bûthire.

⁵Rîkeethîrwa rîkari ta îgiita rîa maketha ûrîa mûkethi atemaga nkano irîa irûngi muundeene, agacoka agaketha biongo birîa birî na mpîndî. Rîkeethîrwa rîkari ta îgiita rîa kûringa rûûa kîguuruune kîa Refaimu ûrîa mûringi rûûa eetaga akîgiitaga biongo bia nkano birîa birî na mpîndî.

⁶Antû barîa bagaatigara ku bakeethîrwa barî babakai mono; bakeethîrwa barî babakai ta ûrîa nzeituni ijîîrî kana ithatû itigaraga kathûûmbî ka mûzeituni rîrîa jwakethwa, kana ta ûrîa nzeituni inya kana ithaano itigaraga mpang'iine cia mûtî ta jûu.” Ûu nîu MWATHANI Mûrungu wa Israeli augîîte.

⁷Îgiita rîu rîakinya, antû bakaaririkana Mûûmbi waao, nabo bagaacoka kûthaathayia Ûrîa Mûtheru wa Israeli.

⁸Bagaatiga gwîka wîrîgîîro kîrî iritîro bia igongwana, birîa baakîte na njara ciaao. Ningî bagaatiga kûthaathayia mîrungu ya mîng'uanano ya Ashera îrîa baithithîrîtie bongwa, na bakoorîrua nî iritîro biaao bia ubaani.

⁹Îgiita rîu rîakinya, ntûûra ciaao irîa mbirigîre na nthingo ikeerûkîrwa itigwe ikari ta ntûûra cia Ahivi na Aamori irîa beerûkîîre nîûntû bwa gûkîra antû ba Israeli. Kîrîa gîkeethîrwa kîrî ku no maganjo.

¹⁰Buî antû ba Israeli, nî bûûrîrîtue nî Mûrungu ûrîa ûbwonokagia bwatiganîria Mûrungu ûrîa bûmatûkaga gwiciitha kîrî we. Tontû bûû, kinya këethîra bûkaanda mîzabibû îmîthongi, na bwaathûrîre mûrungu ûngî miuunda yeenu;

¹¹bûtûme imera bikûra na ntukû îmwe, na îgîa na maciara rûûnene, gûtîkîo bûgaaketha ku nîûntû ntukû o îîu nîyo bûkaagîa na mîthangîko îtîkûthira na kwithikîîra gûkûnene.

¹²Igua majû ja antû babaingî; mûrurumo jwaao nî ta jwa rûûjî rûrûnene! Igua îgondoka rîa mîgongo ya anthû; bagondokaga ta mîgombe îmînene ya îria!

¹³Anthû beejaga na mûrurumo jûmûnene ta jwa rûûjî rûrûnene. Îndî Mûrungu aabagondokera bakamatûka; bakamatûka bakathirîkîria buru ta ûrîa mauuti jakamatagwa nî ruuo jageeta gûtewa irîmeene, kana ta ûrîa tîîri yûmbûkagua nî ruuo rwa kîbuubani.

¹⁴Batwithûkagîra ûgoro bagatûmakia, îndî gûgîkinya rûkîîrî, batî o. Kîu nîkîo kiigai kîa barîa batwithûkagîra; nîkîo kiigai kîa barîa batûthangîkagia.