Read KIMERU BIBLE PROTESTANT EDITION Isa 19 Bible Online

Isa 19 - KIMERU BIBLE PROTESTANT EDITION bible

Isa 19

¹ Bûbû nîbu ûroria bwegiî Misri: “Atîrî, MWATHANI nî eejîte na mpwîî arî îtuune, nawe eetîte Misri. Nayo mîrungu ya mîng'uanano ya Misri îkainaina yamwona, nabo antû ba Misri bagwatwe nî ûguaa bûbûnene.”

²MWATHANI ariuga atîrî, “Ngaatûma Amisri bookanîîre kûgîe ndwaa gatîgatî ka muntû na mûtaana wa ng'ina, na gatîgatî ka muntû na mûtûûri waawe, na gatîgatî ga ntûûra na îngî, na gatîgatî ka mûnene na mûnene ûngî.

³Ngaatûma Amisri bakue nkoro buru, na mbaraganie mîbango yaao. Nabo bagaacwaa ûteethio kîrî mîrungu ya mîng'uanano, na aringia na barîa baaragia na roho cia antû baakuû.

⁴Nkaarekeeria Amisri baathwe nî muntû ûmûthûûku baathwe nî mûnene ûkûiinyanîîria, nîu MWATHANI akuuga, MWATHANI Mûrungu Mweneinya akuuga.”

⁵Naru rûûjî rwa Naili rûkaawa, mûuro jûûme mwanka jûkue nkuû.

⁶Rûûjî rwa mîberethi rûkaanunka; mîberethi îrîa yumîte rûûjîîne yûûme; nacio nthanje na matî jangî ja mûuro jakoora jathire.

⁷Matî jakooma nteere cia Naili gûtigwe kûrî gûkûtheri; Kinya imera bia miuunda îrîa îrî nteere cia Naili bikooma buru, biurutwe nî ruuo biteewe kûraaja.

⁸Ategi makûyû bakaagîa na kwithikîîra, barîa bonthe bageraga ndwano rûûjîîne rwa Naili bakarîra. Ningî barîa batambûrûkagia ngara ku bakaagwatwa nî kîeba.

⁹Barîa batumaga nguû na ndigi cia mîtî bagaakua nkoro buru; wîrîgîîro bwa barîa batumaga nguû cia bamba bûkaathira.

¹⁰Barîa barî îgweta nthîgûrû ya Misri bagaakinyangwa buru, nabo ariti ngûgî ba kîbaarûa bagwatwe nî kîeba.

¹¹Atongeeria ba ntûûra ya Zoani bariiti bagakua; aeejani kîrîra ba Farao barîmwaa mataaro ja waa. Nîatîa boomba kwayia Farao atî, “Tuî tûrî nchiarwa cia antû baboome; tuî tûrî ba rûrîîjo rwa anene ba karaaja?”

¹²Barîkû antû baaku barîa boome? Nî bakûee nteto na bakûmenyithie ûrîa MWATHANI Mûrungu Mweneinya abangîte kûthithîria Misri.

¹³Atongeeria ba ntûûra ya Zoani batuîkîte biaa, nabo atongeeria ba ntûûra ya Memufisi barîciayia atî nî baijî; barîa babuîrîte gûtongeeria antû ba Misri bwega, nîbo bongwa babaatithîtie njîra.

¹⁴MWATHANI abeekîrîte roho ya kîrigicano, baatûma Misri îtûgûûga mantûûne jonthe ta ûrîa mûrebi atûgûûgaga agiitaîkagîra.

¹⁵Nandî Misri îtî na kîguni; gûtî muntû ûûmba kûmîteethia, arî ûmûnene kana arî ûmûnini.

¹⁶Îgiita rîu rîakinya, antû ba Misri bakeethîrwa barî iguaa ta aka. Ka-bakainainaga nî ûguaa boona MWATHANI Mûrungu Mweneinya akîenda kûbakanûkia.

¹⁷Antû ba nthîgûrû ya Juda bakamakia Amisri. O muntû akaigagua îkîgwetwa akamaka nîûntû bwa kûmenya ûrîa MWATHANI Mûrungu Mweneinya augîîte.

¹⁸Îgiita rîu, ntûûra ithaano cia Misri ikeethîrwa ikîaragia rûthiomi rwa Kîhibirania, nabo atûûri baacio bakeethîrwa beekîte mûciîtio na MWATHANI Mûrungu Mweneinya. Îmwe ya ntûûra iu îgeetagwa Ntûûra ya Riûa.

¹⁹Îgiita rîu gûkeethîrwa kûrî na kîritîro kîa igongwana kîa MWATHANI ndeene ya nthîgûrû ya Misri. Ningî mwankeene jwa nthîgûrû ya Misri, gûkeethîrwa gwaki gîtugî kîa iiga kîathûrîri MWATHANI.

²⁰Biu nîbio bikaaririkanagia antû na bikabamenyithia atî MWATHANI Mûrungu Mweneinya arî nthîgûrû ya Misri. Rîrîa bagaakaîra MWATHANI nîûntû bwa kûiinyîîrua, MWATHANI akaabatûmîra muntû wa kûboonokia, ûrîa ûkaabarwîîra na abarite Misri.

²¹Îgiita rîu, MWATHANI akaaimenyithania kîrî Amisri, nabo Amisri bakamûmenya, batue kûmûthaathayia bakîmûritagîra igongwana na biewa. Bagaatua gwîkaga irîîkanîro na MWATHANI na bakabiûjûria.

²²MWATHANI akaaringa Misri na acoke amîorie. Antû ba Misri baamûthaathayia akaigua maromba jaao na aboorie.

²³Îgiita rîu, gûkeethîrwa kûrî na njîra îmbariî yumîte Misri mwanka Asîria. Tontû bûû, antû ba Asîria bageetaga Misri nabo Amisri bageetaga mwanka Asîria. Ningî Amisri na antû ba Asîria bakathaathayia Mûrungu barî amwe.

²⁴Îgiita rîu, Aisraeli na antû ba Asîria na Amisri bakaagwatanîra, nayo ngwatanîro yaao îtuîke kîtharimo kîrî antû bonthe nthîgûrûûne.

²⁵MWATHANI Mûrungu Mweneinya akaabatharimaga akiugaga atîrî, “Jûkieni kîtharimo; buî Amisri burî antû baakwa, naabuî antû ba Asîria mbûûmbîte na njara ciaakwa; ningî buî Aisraeli bûrî kiigai gîaakwa.”