Read KIMERU BIBLE PROTESTANT EDITION Isa 2 Bible Online

Isa 2 - KIMERU BIBLE PROTESTANT EDITION bible

Isa 2

¹Bûbû nî ûntû bûrîa Isaya mûtaana wa Amozi oonere bwegiî Juda na Jerusalemu.

²Gûgaakara atîrî, matukû ja nyumeene, kîrîma kîa nyomba ya MWATHANI gîkaa gîkîraaja nkûrûki ya irîma bionthe, kîthûngûûrwe îgûrû rîa irîma bingî; nayo mîgongo yonthe îgaakuûkagîra kîrîma kîu.

³Antû ba mîgongo îmiingî bakeeranaga: “Njûûni twitie kîrîmeene kîa MWATHANI, twîteni nyomba ya Mûrungu wa Jakubu; nîkenda atwoneeria njîra ciaawe naatuî twithingataga.” Nîkwîthîrwa Zaiûni nîkû Waatho bûkaumaga; rûteto rwa MWATHANI nî Jerusalemu rûkaumaga.

⁴ MWATHANI akaagambagîra antû babaingî, na agiitagîre mîgongo magamba nabo bagaatura nchiû ciaao ciee machembe ja kûrîma, najo matumo jaao jatuîke tûchiû twa gûketha; mîgongo îtîcoka kwithuranîra nîûntû bwa ndwaa kaîrî, kana iithûkanîra kaîrî.

⁵Buî nchiarwa cia Jakubu, njûûni twîte tûmûrîkîri nî weerû bwa MWATHANI.

⁶Gwe nî wîrûkîrîte antû baaku, ba rûrîîjo rwa Jakubu, nîûntû bathingataga nkuagaya cia kuuma bwa gaiti; batuîkîte aringia ta Afilisti, na nî bagwatanagîra na antû batiijî Mûrungu.

⁷Nthîgûrû yaao yûjûri fetha na thaabu, na ûtonga bwaao bûtî mûthia. Nthîgûrû yaao yûjûri mbarathi, na ngaarî ciaao cia ndwaa itîtarîka.

⁸Nthîgûrû yaao yûjûri mîrungu ya mîng'uanano baturagîria maru into bathithîtie na njara ciaao bongwa, bakathaathayia ngûgî cia njara ciaao.

⁹Tontû bûû, antû nî bairingîte nthî, baciîkîrithia nthao; menya ûbarekera.

¹⁰ Toonyeni makurunguune ja maiga; iciitheni marinyeene nthîgûrû, bûmatûke mûthûûro jwa MWATHANI, na inya ya ûkumio bwaawe.

¹¹Antû barîa baineneagia bakeenîkwa naru rwikumio rwa antû rûkaathirua; MWATHANI wenka noowe ûgeekagîîrwa îgiita rîu

¹²Nîkwîthîrwa MWATHANI Mweneinya nî atuîte ntukû ya îkanûkia nîûntû bwa aikumia na aciîkîîri bonthe, nîûntû bwa barîa baciûkagîîria na barîa baineneagia;

¹³nîûntû bwa mîtarakwa yonthe ya Lebanoni, îrîa îreete, îgaitia îgûrû; nîûntû bwa miuuru îrîa mînene yonthe ya Bashani;

¹⁴nîûntû bwa irîma birîa biraaja bionthe, na nîûntû bwa tûrîma tunthe tûrîa tûthûngûki;

¹⁵nîûntû bwa mînaara îrîa mîraaja yonthe na nîûntû bwa nthingo irîa ndikie cionthe;

¹⁶nîûntû bwa meri cionthe cia Tarishishi na nîûntû bwa itarû birîa bithongi bionthe.

¹⁷Antû barîa baineneagia bakeenîkwa naru rwikumio rwa antû rûkaathirua; MWATHANI wenka noowe ûgeekagîîrwa îgiita rîu.

¹⁸Mîrungu yonthe ya mîng'uanano îkaathira buru yûrîrie.

¹⁹Antû bagaatonya makurunguune ja maiga na marinyeene nthîgûrû, bamatûkîte mûthûûro jwa MWATHANI na inya ya ûkumio bwaawe, rîrîa agookîîra gûkanûkia nthîgûrû.

²⁰Îgiita rîu antû bakaagerera mpuko na ireere mîrungu yaao ya mîng'uanano ya fetha na ya thaabu îrîa baithithîrîtie nîkenda bamîthaathayia,

²¹nîkenda boomba gûtonya makurunguune ja maiga, na mbatueene cia ndwara cia maiga, bamatûkîte mûthûûro jwa MWATHANI na inya ya ûkumio bwaawe, rîrîa agookîîra gûkanûkia nthîgûrû.

²²Ûgéeka wîrîgîîro kîrî muntû, nîûntû nî gîntû gûtîkîo, naarua arî o, rûûjû atî o.