Read KIMERU BIBLE PROTESTANT EDITION Isa 20 Bible Online

Isa 20 - KIMERU BIBLE PROTESTANT EDITION bible

Isa 20

¹Îgiita rîmwe, mûnene wa njûûrî cia ndwaa cia Asîria nî aaithûûkîîre ntûûra ya Ashidodi na aramîtaa atûmi nî Saragoni mûnene wa Asîria.

²Îgiita rîu MWATHANI nî aarî akwarîria Isaya mûtaana wa Amozi aamwîra atîrî, “Rita mathango jau wîkîrîte na ûrite iraatû birîa wîkîrîte.” Nawe nî aathithîrie u, aratua gwîtaga arî kîthûnû, na magûrû jamatheri.

³Mwakeene jûrîa ntûûra Ashidodi yaataîrwe, MWATHANI nî aarîrie arauga atîrî, “Nthûûmba yaakwa Isaya eethîîrîtwe îgîtaga îrî kîthûnû, na magûrû jamatheri îgiita rîa mîaka îthatû. Kîu nî kîonanîîria kîa ûrîa Misri na Ethiopia ikaathithîrua.

⁴Ûu nîu mûnene wa Asîria agaataa antû ba Misri na ba Ethiopia ndweene babeethî na babakûrû amwe, eete nabo barî kîthûnû na magûrû jamatheri. Nabo Amisri bakaaigua nthoni imbîî nîûntû bwa kwonwa kîthûnû.

⁵Antû bakaamaka mono nî ûntû bûu mwanka baame, nîûntû batwîre beetîkîtie Ethiopia na baikumagîria Misri.

⁶Îgiita rîu, atûûri ba nthîgûrû irîa irigeenie na îria bakeerana atîrî, ‘Tegeeni antû barîa tûtwîre twîtîkîtie na barîa tûtwîre kûmatûka kîrî bo gûcwaa ûteethio tûtîkaathirue nî mûnene wa Asîria! Keethîra nîu bathithîrîtue ûjû rî, nîatîa tuî tûkoonoka?’”