Read KIMERU BIBLE PROTESTANT EDITION Isa 21 Bible Online

Isa 21 - KIMERU BIBLE PROTESTANT EDITION bible

Isa 21

¹Bûbû nî ûroria bwegiî rwanda rûrîa rûrigeenie na îria. Thîîna nî îîjîte yumîte bwa rwanda; îîjîte îkîegeraga ta kîbuubani kîa nthîgûrû îrîa îrî bwa ûmotho bwa Juda, nayo yumîte nthîgûrû îmbîî.

²Kîoneki kîrîa mbonetue nî gîkîthûûku mono; mboneete antû bakûgarûkîte bagagûkunyanîra, na ndoona bangî bagîtaa into biaaku. Gwe njûûrî ya Elamu, umagara ûkabaithûkîre; gwe njûûrî ya Media, îta ûbacîgîîrie; Nîkwîthîrwa kûthangîkua kûrîa Babiloni îtwîre îthangîkanagia nandî gûgûkinya mûthia.

³Tontû bwa mantû jau, nandî gankwangaîka; mpangaîkîte o ta mûka akîeewa mwana. Jarîa mbigîtue janthirîtie inya buru, najo jarîa mboneete jamakia ndaarigicana.

⁴Gûtî ûntû nkûûmba kûthûgaania bwega; kîmako kîndigicanîtie buru; kinya ûgoro bûrîa ntwîre kwirirîria, nandî bûrîkinya nkaambîrîria kwinaina nî ûguaa.

⁵Mbonetue bathuranîrîte kîatho na baatandîka meetha Baambîrîria kûrîa na kûnyua, ndaigua, “Ûkîîreeni buî atongeeria! Thuranîreni rong'o cieenu!”

⁶MWATHANI nî aambîrîre atîrî, “Îta ûcûe mûrangîri, ûmwîre bûrîa akoona atûmîîrie.

⁷Oona eetithia mbarathi beejîte baîrî baîrî, na eetithia ntigiri, na eetithia nkamîîra nî beejîte, nî akinde matû na amenye bwega.”

⁸Mûrangîri nawe arauga atîrî, “Mwathi waakwa, ûûni ntiumaumaga mûnaareene jwaakwa mûthenya kana ûtukû.”

⁹ O ntûti îîu arauga, “Tî baba eetithia mbarathi beejîte baîrî baîrî.” Aratûmîîria akiugaga atîrî, “Babiloni îkûthira! Îkûthira buru amwe na mîrungu yaayo ya mîng'uanano.”

¹⁰Thikîîreeni buî antû beetû ba Israeli; buî bûtwîre bûgîkinyangagwa; nteto iji nkûbûa nî irîa mbîîri, nî MWATHANI Mweneinya wa Israeli wengwa.

¹¹Bûbû nî ûroria bwegiî Edomu. Kûrî we ûkûmbarîria arî Edomu. Arîmbîta, “Mûrangîri! Mûrangîri!” Akambûûria, “Ûtukû bûrî akuî kûthira? Nî mathaa jang'ana jatigeere bûthira?”

¹²Naani nkamûcokeria nkamwîra atîrî, “Kûrî akuî gûkîa, îndî gûgaacoka gûtuke kaîrî. Weenda kûûria kaîrî no wîje.”

¹³Bûbû nî ûroria bwegiî Arabia. Buî ikundi bia antû ba Dedani, buî bwambaga maema rwanda rwa Arabia,

¹⁴kundieni bau banyonti rûûjî, buî atûûri ba nthîgûrû ya Tema, thagaaneni barîa bamatûkîte ndwaa na biakûrîa.

¹⁵Ndwaa îng'enti mono; nîkîo gîtûmi bamatûkîte, batîkooragwe nî nchiû, kana barathwa na mîgwî.

¹⁶MWATHANI ambîîrîte atîrî, “Mwaka jûmwe jûkîthira, ûûmbani bunthe bwa antû ba Kedari bûkeethîrwa bûkûthira.

¹⁷Nî antû babakai mono bakeethîrwa batigeere ba nchamba ciaao cia ndwaa, irîa irûaga na ûta na mîgwî. Bûu nî uuge bwa MWATHANI Mûrungu wa Israeli.”