Read KIMERU BIBLE PROTESTANT EDITION Isa 22 Bible Online

Isa 22 - KIMERU BIBLE PROTESTANT EDITION bible

Isa 22

¹Bûbû nî ûroria bwegiî Mûguuru jwa kîoneki. Ka gwakara atîa rûûi? Nîatîa bwaitia nyomba îgûrûgûrû bwinthe?

²Naabuî barîa bûtwîre gûciîkîîra? Anga ntûûra îîjî tîyo îtwîre îringaga gîtuma gîkînene îgîkûngûîra ûûmbani? Nandî antû beenu nî baakuû, îndî batîûragi na rûchiû kana bakuîra ndweene.

³Atongeeria beenu bonthe bamatûkîte barî amwe, îndî baagwatwa batîgerete noo mûgwî. Naabuî kinya këethîra nî bwaarî bûkûmatûka kûraaja, nî bwagwatîrwe bwinthe.

⁴Nîkîo gîtûmi nkuuga atîrî, “Rekana naani, na ûkainogia ûkîmboreria; rekana naani ndîre meethori, nîkwîthîrwa ndî na marûrû nîûntû bwa kwînyangua kwa Jerusalemu ntûûra ya antû beetû.”

⁵Nîkwîthîrwa îgiita nî rîkinyîte rîrîa MWATHANI Mweneinya atuîrîte Mûguuru jwa kîoneki. Narîo nî îgiita rîa kîmako gîkînene na kwangaîka na kîrigicano. Nî îgiita rîa nthingo kûmomorangwa, antû kwirîrîra mwanka kajû ga kîrîro gagakinya irîmeene îgûrû.

⁶Njûûrî ya Elamu îîjîte îgwete moota, îîtithîtie mbarathi na ngaarî cia ndwaa. Njûûrî ya Kiri nayo nîîrîîkîtie gûûkîîria rong'o ciaao.

⁷Iguuru bieenu birîa biega buru biûjûri ngaarî ndwaa, nabo eetithia mbarathi nî bakabîte, mpingîroone cia ntûûra.

⁸Nthingo cia Juda ikamomorangwa. Îgiita rîu bûrarita mathaga ja ndwaa jarîa jeeki nyomba ya mwitû.

⁹Naabuî bûkwoona ûrîa nthingo cia ntûûra ya Daudi cimomorangi gûntû gûkwingî, bûraingîîra rûûjî ndieene ya gaiti.

¹⁰Ningî bûratara nyomba cia Jerusalemu, bûramomoranga imwe nîkenda bwaka nthingo kûrîa ciamomorangi na maiga jaacio.

¹¹Ningî bûraathithia îrinya rîa kûgwatia rûûjî gatîgatî ka nthingo cio-ijîîrî nîkenda bûgwatia rûûjî kuuma ndieene îrîa nkûrû. Îndî bûteetîkîrie Mûrungu ûrîa wathithîtie mantû jau; kana bûaa ûrîa wajabangîre karaaja gîtîîo.

¹²Îgiita rîu MWATHANI Mweneinya nî aabwîraga bwirîrîre na bwithikîîre; bwenje mîtuundu na bwîkîre mathango.

¹³ Îndî antû a kûthithia ûu, buî no kûgwîrua na gûkena, bûkîthînjaga ndeegwa na ntûrûme, bûkîrîjaga nyama na kûnyua ndibei, bûkiugaga, “Gatûrîe na tûnyue, nîûntû twengeerie gûkua.”

¹⁴MWATHANI Mûrungu Mweneinya nî aarîtie naani aambîîra atîrî, “Bûtîkororekerwa meeyia jaja mwanka rîrîa bûgaakua; nîu ni MWATHANI Mûrungu Mûûmbi wa bionthe mbugîîte.”

¹⁵MWATHANI Mweneinya ambîîrîte atîrî, “Ûkîîra wîte kîrî nthûûmba îgwîtwa Shebuna, ûrîa mûrûngamîîri wa gîkaro kîa mûnene ûmwîre atîrî,

¹⁶‘Nî ngûgî îrîkû ûrî nayo gûkû na nûû ûkwîrîte withithîrie mbîrîra gûkû tontû ûkwînja iiga kîrîmeene ûkiithithîria mbîrîra?

¹⁷Menya atî MWATHANI agaagûta gûkûraaja gwe muntû ûrîa ûrî inya. Agaakûgwata akûrikie,

¹⁸akûthiûrûkie biû-biû, akûgere ta mûbiira, wîte ûkagwe nthîgûrû ya kûraaja. Naagwe kûu nîku ûgaakuîra, na nîku ngaarî ciaaku cia mbarathi cia ndwaa igaatigwa, gwe wîkîrithagia nyomba ya mwathi waaku nthao!

¹⁹MWATHANI agaagûkuruthûra akûrite gîtîîne gîaaku gîa ûtongeeria na agûtuunye gîtîîo.’”

²⁰Ningî MWATHANI areera Shebuna atîrî, “Îgiita rîu rîakinya, ngeeta nthûûmba yaakwa, Eliakimu mûtaana wa Hilikia,

²¹mwîkîre rwambambio rwaaku rwa ûnene, na ûmûoge mûcibi jwaaku na mûnenkere ûnene bûrîa ûtwîre nabu. We agaakara ta îthe wa antû kîrî atûûri ba Jerusalemu na antû ba Juda.

²² Ngaatûma eethîrwe nîwe ûkaugaga jarîa jonthe jathithagua gîkaroone kîa mûnene wa rûrîîjo rwa Daudi. Bûrîa aakûrûkia, gûtî we ûkaareganaga nabu, nabu bûrîa aaregana nabu, gûtî we ûkaabûkûrûkagia.

²³Nkaamwînjîra ta gîtugî mwanka airikîrie buru, naju mwîrîga jwaao jûkaeejagwa gîtîîo nîûntû bwaawe.

²⁴“Îndî antû ba mwîrîga jwaao bagaatuîka mûrigo jûmûrito kîrî we nîûntû bwa kûmûrekeeria mathîîna jaao bonthe, kuuma ûrîa mûnini mwanka ûrîa mûnene. Bagaatûma arituîrwe ta gîtugî gîcuurîtue into bia mîthemba yonthe, kuuma tûkombe mwanka nyongû irîa nene.

²⁵Îgiita rîu rîakinya, nîrîo gîtugî kîrîa kîenjîri bwega gîkaunîka, kîgwe amwe na into bionthe birîa bikeethîrwa bicuuri kîrî kîo. Bûu nî uuge bwa MWATHANI.”