Read KIMERU BIBLE PROTESTANT EDITION Isa 23 Bible Online

Isa 23 - KIMERU BIBLE PROTESTANT EDITION bible

Isa 23

¹ Bûbû nî ûroria bwegiî Tiro. Rîreni mono buî eetithia ba meri cia Tarishishi! Nîkwîthîrwa Tiro nî îmbînyangie buru; gûtî kanyomba gatigeere, na kinya mpwîro cia îria nî inthûûkangîtue! Nîcio nteto ikûbatûnga beejîte kuuma nthî ya Saiprasi.

²Kireni buî bûtûûraga nteere cia îria; kireni buî aringi biashara ba Sidoni. Eetithia beenu ba meri nîbo batûmîte bûtonga.

³Bagiitanagia îria bageeta mwanka Misri îgiita rîa maketha, bakabûreetera irio bia miuunda ya Naili, naabuî bûkeenderia mîgongo îngî.

⁴Igua nthoni gwe ntûûra ya Sidoni nîûntû îria nî rîarîîtie; Îria rîrîa rîorokeru buru nî rîarîîtie rîkauga atîrî, “Gûtî rîo ndeethîrwa ndî na îu kana nciara mwana; ntaarera kaîjî kana kaarî.”

⁵Kinya antû ba Misri nî bamakîte; nî bamakîte baigua ûrîa Tiro îthithîrîtue.

⁶Rîreni mono buî bûtûûraga nteere cia îria; îteeni bûgacûe gîkaro Tarishishi.

⁷No ntûûra îrîa yeenu ya ikeno îîjî, îrîa îtwîre o kuuma karaaja? Nooyo îrîa îtwîre yumaga antû bageeta kwigwatîra nthî cia kûraaja?

⁸Nûû ûrabangîîre Tiro mantû jaja Tiro îrîa îtwîre yaandaga moonene gûntû kûu kûngî; îrîa aringi biashara baao batwîre baeetwe gîtîîo ta kîa anene kunthe nthîgûrûûne!

⁹MWATHANI Mûrungu Mweneinya nîwe wendeete mantû jaja jakarîka, nîkenda athiria rwikumio rwa barîa baikumîtie, na akinyanga îgweta rîa barîa barî îgweta nthîgûrûûne.

¹⁰Taambeni bûûjûre nthîgûrû yeenu buî atûûri ba Tarishishi, ta ûrîa rûûjî rwa Naili ruunûkaga rûkoojûra Misri. Gûtî we ûgaakûgiria kaîrî.

¹¹MWATHANI nî ookîîrîtie njara yaawe îgûrû rîa îria, na ainainia moonene. Nî aritîte Waatho auga atî ntûûra cia Kanaani irîa mbirigîre cimomorangwe.

¹²Augîîte atîrî, “Bûrî babathiru inya buru buî atûûri ba Sidoni na bûtîkoroona gîkeno kaîrî. Kinya bûgeeta gûcwaa gîkaro nthîgûrû ya Saiprasi, bûtîona thîîri kinya ku.”

¹³Atîrî, tî antû ba Asîria; nî Ababiloni. Nî Ababiloni batûmîte Tiro yaa gîtûûro kîa nyamû cia kîthaka. Nîbo baamîcîgîrîîrie, baramomoranga nthingo ciaayo, baraîîthia ikaro bia anene, bareenyangia ntûûra buru.

¹⁴Rîreni mono buî eetithia ba meri cia Tarishishi, nîkwîthîrwa giiciitho kîeenu nî gîkîthûkangie buru.

¹⁵Îgiita rîgaakinya rîrîa Tiro îkoorîria îthirie mîaka mîrongo mûgwanja ta îrîa anene batûûraga mwoyo. Mîaka mîrongo mûgwanja yathira, gûgaakarîka kûu Tiro mantû ta jarîa jainagwa rwîmboone rwa mûka-mûmaraya:

¹⁶“Jûkia kînanda kîa ndigi, ûthiûrûke ntûûra yonthe, gwe mûmaraya ûûrîrîtie! Ringa kînanda bwega, na wine ndwîmbo inyiingî nîkenda ûririkanwa.”

¹⁷Nyuma ya mîaka mîrongo mûgwanja, MWATHANI akaaririkana Tiro, nayo yambîîrie kûringa biashara kaîrî na antû ba mîgongo yonthe ya nthîgûrû.

¹⁸Îndî ûtonga bûrîa bûkaumanagia na biashara ciaao bûtîtua gwîkagwa bûrî mûthithû. Bûkaathûragîrwa MWATHANI nîkenda barîa batuungatagîra MWATHANI boonaga irio bia kûng'ana na nguû inthongi cia gwîkîra kuumania nabu