Read KIMERU BIBLE PROTESTANT EDITION Isa 24 Bible Online

Isa 24 - KIMERU BIBLE PROTESTANT EDITION bible

Isa 24

¹Atîrî, MWATHANI akeenyangia nthîgûrû amîtige îrî întheri; akaamîkinyanga buru na anyaganie atûûri baayo.

²Narîo îkanûkia rîu rîkeethîrwa rîkari ûmwe kîrî antû bonthe: bûrîa kîrîndî gîkoona, noobu athînjîri-Mûrungu bakoona; bûrîa nkombo ikoona, noobu eene cio bakoona; bûrîa nthûûmba cia aka ikoona, noobu aka-aathi baacio bakoona; bûrîa agûri bakoona, noobu eendia bakoona; bûrîa barîa bakoobithanagia bakoona, noobu barîa bakoobaga bakoona; bûrîa barîa baeejanaga marandû bakoona, noobu barîa barîîjaga marandû bakoona.

³Nthîgûrû îkeenyangua yonthe, îtigwe îrî întheri buru nîkwîthîrwa nî MWATHANI uugîîte mantû jaja.

⁴Nthîgûrû îkûûma mono na yakîûnkanga na kwagîa na kîeba; nthîgûrû yonthe îkûûmagara na kwojûra mîthangîko; kinya îgûrû na nthîgûrû nî bikwangaîka.

⁵Nthîgûrû nî îgîîte mûgiro, kuumania na atûûri baayo; nîûntû nî baunîte Waatho bwa Mûrungu baaregana na mooritani jaawe, na baathûûkia kîrîkanîro kîrîa gîa kenya na kenya.

⁶Tontû bûû, nthîgûrû nî îndume, na atûûri baayo nî bagûkanûkua nîûntû bwa meeyia jaao. Tontû bûû, atûûri ba nthîgûrû yonthe bakaaîthua na mwanki, batigare antû babakai.

⁷Mîzabibû îkûûma, na ndibei îtîkwonora; barîa bonthe batûûraga bagwîrîtue bakûgîa na kwithikîîra.

⁸Tamburini irîa iringaga ndwîmbo inthongi igûkira; inanda bia ndigi birîa biinaga ndwîmbo cia kûgwîrua bigûkira, nakîo gîtuma kîrîa antû baringaga bagîkûngûîra gîkûthira.

⁹Gûtî kûnyua ndibei kaîrî bûkiinaga; kinya muntû aamîkunda, îtîkûmerûka.

¹⁰Ntûûra îkûînyangua buru îtigwe îtî gîntû; antû barîkara baingîte nyomba ciaao batîgaatonyeerwe.

¹¹Njîra ikûûjûra gîtuma nîûntû bwa wagi bwa ndibei; ikeno bionthe bigûkinya mûthia; gûtî kûgwîrua gûtigeere nthîgûrûûne.

¹²Ntûûra nî îtigi îrî întheri, na mpingîro ciaayo irî intharie.

¹³Ûu nîu gûgaakarîka nthîgûrûûne yonthe na kîrî mîgongo yonthe. Nthîgûru îgaatigwa îkari ta mûzeituni jûmûkethe, kana ta mûzabibû jûmûringe rûûa.

¹⁴Barîa bakoonoka bakaina na kajû gakanene bagwîrîtue; barîa barî bwa rûgûrû bagaatûmîîria ûrîa MWATHANI arî ûmûnene.

¹⁵Antû ba bwa gaiti bagaakumia MWATHANI; barîa barigeenie na îria bageekîîra riîtwa rîa MWATHANI, Mûrungu wa Israeli.

¹⁶Ndwîmbo ikaaigîîgua ikiinwa nteere cionthe cia nthîgûrû, cia gûkumia Ûrîa Mwagîru. Naani noo ngwikaîra, “Wûi nkûthira! Wûi nkûthira! Ndaûra-û! Nîkwîthîrwa barîa bagûnkunyanîra noo bagûnkunyanîra nkûrûki; muntû atîûmba gûcionokia nandî.”

¹⁷Atîrî buî atûûri ba nthî, imakania, na marinya, na mîtego nîbio bibweteerete.

¹⁸Muntû ûrîa ûkamatûka aigua kîmakania kîîjîte, akagwa îrinyeene; na ûrîa ûkairita îrinyeene, akagwa mûtegoone. Îgûrû rîkaaurithia ngai înene mono, nayo mîsingi ya nthîgûrû îkaainaina.

¹⁹Nthîgûrû nî îgûteetema na inya mono, yatûkana gatîgatî na yaragana buru.

²⁰Nthîgûrû nî îgûtûgûûga ta mûrebi; îkeegeega ta kagaanda kauruti nî ruuo rwa kîbuubani. Meeyia jaayo nîjo jamîritûîrîte, na yaagwa, îtîûkîîra kaîrî.

²¹Îgiita rîu rîakinya, MWATHANI agaakanûkîria biûmbe bia îgûrû o kûu îgûrû, na akanûkîrie anene ba nthîgûrû o gûkû nthîgûrû.

²²Bakoothûranua amwe ta ûrîa abuungwa boothûranagua îrinyeene rîmwe. Bakaaingîrwa ncheera bakare ku îgiita rîrîraaja, na nyumeene bacoke bakanûkue.

²³Naju mweri jûgatiga kûthaara, na riûa rîtige kwara; nîkwîthîrwa MWATHANI Mûrungu Mweneinya nîwe ûkeethîrwa arî mûnene. Akaathanaga arî Jerusalemu, kîrîmeene kîa Zaiûni, na akoonanagia inya yaawe kîrî atongeeria ba antû baawe.