Read KIMERU BIBLE PROTESTANT EDITION Isa 25 Bible Online

Isa 25 - KIMERU BIBLE PROTESTANT EDITION bible

Isa 25

¹MWATHANI, gwe nîgwe Mûrungu waakwa; ngaagûkumia na ngûkaathe, nîûntû gwe nîûthithîtie mantû ja kûrigaria; mîbango îrîa wabangîre karaaja, nî ûmîûjûrîtie yonthe.

²Nîkwîthîrwa gwe nî ûeethetie ntûûra kîthûmba kîa maiga, wamomoranga kinya nthingo ciaayo; ntûûra irîa ageni baaciakîrîte itî o kaîrî, na itîkorocoka gwakîka kaîrî.

³Tontû bûû, mîgongo îrîa îrî inya îgaagûkumagia; ûgaakîragwa ntûûreene cia antû ba mîgongo îrîa îtî kîaao.

⁴Nîkwîthîrwa gwe nîgwe kîmatûkîro kîa barîa nkîa, na nîgwe ûteethio bwa barîa barî thîîneene; nîgwe giitumo kîaao îgiita rîa ngai, na nîgwe mûng'unye jwaao rîrîa kwarîte. Îgondoka rîa barîa batî kîaao nî ta ruuo rûkîringa rûthingo.

⁵Kana ta riûa gûntû gûkûûmo. Gwe nî ûûmbanîte kîrî anthû waabakiria; ta ûrîa îtu rîthiragia mwanki jwa riûa, no ta u rwîmbo rwa barîa batî kîaao rûkirîtue.

⁶MWATHANI Mûrungu Mweneinya akaathithîria antû ba mîgongo yonthe kîatho gîkînene gûkû kîrîmeene gîkî. Nakîo kîatho kîu gîkeethîrwa kîrî kîa irio birîa biega buru na ndibei; kîa nyama irîa noru na ndibei îrîa nthongi buru.

⁷Gûkû kîrîmeene gîkî nîku MWATHANI akaaritîra antû bonthe kîthiîki kîrîa kîîthagîrwa kîbathiîkîte, eebeerie gîtambaa kîrîa kîîthagîrwa gîkunîkîrîte antû ba mîgongo yonthe.

⁸ MWATHANI Mûrungu akeebeeria gîkuû nthîgûrûûne mwanka kenya na kenya. Akaangûra antû bonthe meethori na athirie rûmena rûrîa antû baawe bamenetwe kunthe nthîgûrûûne. Nî MWATHANI warîîtie mantû jau.

⁹Îgiita rîu rîakinya antû bagatûmîîria bakiugaga atîrî, “Ûûjû nîwe Mûrungu weetû. Nîwe tûtwîre tweteerete atwonokia. Ûûjû nîwe MWATHANI ûrîa tûtwîre tweteerete. Gatûgwîrîrue wonokio bwaawe.”

¹⁰ MWATHANI akaamenyeera kîrîma kîa Zaiûni. Îndî antû ba Moabu akaabakinyanga bathire ta ûrîa ng'ombe ikinyangaga nyaki îkaûrîra ntakeene.

¹¹Nabo bakaageria gwiteethia bakîgeraga njara ciaao îgûrû ta antû bakûthambîra rûûjîîne; îndî MWATHANI akaathiria njara ciaao inya na atîreka boombana.

¹²Ningî akaamomoranga nthingo ciaao, iu ndaaja, igwee nthî mûthetuune.