Read KIMERU BIBLE PROTESTANT EDITION Isa 26 Bible Online

Isa 26 - KIMERU BIBLE PROTESTANT EDITION bible

Isa 26

¹Îgiita rîgaakinya rîrîa rwîmbo rûrû rûkainwa nthîgûrû ya Juda: “Ntûûra yeetû nî ntûûra îrî inya! Mûrungu nî atûkarîtie na nthingo na biitiiro.

²Rugûra mpingîro cia ntûûra, nîkenda mûgongo jûrîa jwîtîkîtie Mûrungu jûkûrûka ndeene; taju jûrîa jûthithagia ûrîa kwagîrîte.

³Gwe MWATHANI nî weejanaga thîîrî ya mma, kîrî barîa batîûragîrua nîgwe, nîûntû bo beekaga wîrîgîîro bwaao ndeene yaaku.

⁴Tûûreni bwîtîkîtie MWATHANI, nîkwîthîrwa MWATHANI Mûrungu akaabûmenyagîîra mwanka kenya.

⁵Akûthiria rwikumio rwa barîa batwîre baikumûtie, abekîrithie nthao; akûmomoranga ntûûra yaao buru, amîkinyanga yaa tîîri.

⁶Nkîa na barîa batwîre bainyîrîtue nîka bakûmîkinyanga na makinya na gwîtîîra ku.”

⁷Ûtûûro bwa barîa baagîru nî bûbûthongi; gwe MWATHANI nî ûtemagîra barîa baagîru njîra itî kathikî.

⁸Tuî MWATHANI tweteerete ûthithia wendi bwaaku; kîrîa gîkenagia nkoro cieetû nî gûgûkumia gunka.

⁹Nkoro yaakwa nîgwe gwenka irîragîria; ûtukû kana mûthenya, gûtî rîo mbûragîrua nîgwe, nîkwîthîrwa rîrîa gwe wonania matuîro jaaku, barîa bonthe batwîre nthîgûrû nîrîo bamenyaga kûthithia ûrîa kwagîrîte.

¹⁰Kinya ûkaigîîrua barîa baaî kîaao, gûtî rîo bamenyaga kûthithia ûrîa kwagîrîte. Kinya bakëethîrwa barî nthîgûrû ya antû babaagîru, bo batûûraga kûthithia mantû jatîagîrîte, na gûtî rîo bamenyaga atî MWATHANI arî inya.

¹¹ Nandî ka wengeerie kûbakanûkia gwe MWATHANI, îndî bo batîkwona. Boonie ûrîa wendeete antû baaku baigue nthoni. Bakanûkie na îkanûkia rîrîa ûthuranîrîrîte barîa batîgwîtîkîtie.

¹²Tûe thîîrî gwe MWATHANI, nîûntû nîgwe ûtûûmbithîtie kûthithia mantû jonthe.

¹³Gwe MWATHANI Mûrungu weetû, tûraathwa nî athani bangî babaingî, îndî noogwe gwenka twijî.

¹⁴Nandî nî baakuû na batîûmba kûriûka kaîrî; kinya irundu biaao bitîonekana kaîrî, nîkwîthîrwa gwe nî ûthirîtie kûbathiria, wabeegera buru ûntû batîkororirikanwa kaîrî.

¹⁵Îndî gwe MWATHANI nî ûthegeetie mûgongo jûjû; nî ûthegeetie antû baaku waikumithia; ningî nî waramîtie nthîgûrû yaao.

¹⁶Gwe MWATHANI nî wakanûkîrie antû baaku, nabo baragûkaîra barî thîîneene bagîcwaa ûteethio bwaaku.

¹⁷Twathangîkîte ta mûka ûmûrito, ûrîa athangîkaga agiikaagîra nî rwaakaî, rîrîa arî akuî kûewa mwana; nîu watûmîre tûrakara gwe MWATHANI.

¹⁸Mîthangîko ta îîu nîyo twaarî nayo, îndî kîrîa twaciarîre no ruuo. Tûtaaciûmbanîra kîrî antû bangî barîa batwîre nthîgûrûûne, kana twonokia nthîgûrû yeetû.

¹⁹Antû baaku barîa bakuîte bakaariûka na mîîrî yaao îtûûre mwoyo kaîrî. Buî barîa bûrî mbîrîreene, ûkîîreeni bwine bûgwîrîtue; nîkwîthîrwa îme rîa MWATHANI rîgûûjaga gûgîkia, nawe agaatûma rîgwe kinya gwa akuû.

²⁰Toonyeni nyomba cieenu antû beetû bûciingîre ku; iciitheni nyomba cieenu kagiita gagakai mwanka mûthûûro jwa Mûrungu jûkûrûke.

²¹Tontû rî, MWATHANI arî akuî kuuma gîkaroone kîaawe, eeje gûkanûkia atûûri ba nthîgûrû, nîûntû bwa meeyia jaao. Nayo nthîgûrû îkaumbûra barîa bonthe booraganaga ku; îtîcoka kwitha ooragani kaîrî.