Read KIMERU BIBLE PROTESTANT EDITION Isa 28 Bible Online

Isa 28 - KIMERU BIBLE PROTESTANT EDITION bible

Isa 28

¹Wûi kîrî ûnene bwa aikumia ba Efuraimu barîa batûûraga boogiti. Thirû yaao nî ta yûa rîrînyaaru, rîîki karîmeene, îgûrû rîa mûguuru kûrîa gûtûûragwa nî oogiti.

²Atîrî, MWATHANI arî na nchamba îrî na inya; nayo îkeeja îkîegeraga ta kîbuubani, kana ta mûguû jwa îkondoria, îringe ûnene bwa Efuraimu nthî mpu.

³Ûnene bûrîa areebi ba Efuraimu baikumagia nabu bûgaakinyangîrwa nthî mûthetuune.

⁴Ûthongi bwa ûnene bwaao nî ta yûa rîrînyaaru, rîrî gatûmbîîne mûgwanthîîne jûmûnoru. Bûkari ta nkûû cia mbere, irîa igundaga mbere ya ingî antû baaciona bagaitua o rîo bakarîa.

⁵Îgiita rîu MWATHANI Mûrungu Mweneinya nîwe ûgaatuîka thirû ya ûnene; nîwe ûkeethîrwa arî thirû îrîa nthongi matigari ja antû baawe.

⁶Akaeejaga agambi ûûme bwa kûgiita magamba, na akaeejana inya kîrî barîa barwaagîîra ntûûra.

⁷Îndî nandî kinya antû ba MWATHANI nî oogiti; ka bagûtûgûûga nî mbogita; Athînjîri-Mûrungu na iroria ka bagûtûgûûga nî mbogita; barînyua bakoogita mwanka bakarigwa nî njîra, bioneki biaao tî bia mma bakagiitaga magamba ûrîa gûtîagîrîte.

⁸Meetha cionthe ciûjûri mataîka, gûtî antû atî na rûko.

⁹Îndî antû barîûria atîrî, Ariuga nûû akûaa nteto? Ariuga nûû akûritana? Nî twaana tûrîa tûtigîte gwonka rua kana nî twaana tûtîragîa ûûme?

¹⁰Arîritana mantû agîcokagîra ta atîkûmenya ûrîa akuuga; agacokera rîathana nyuma ya rîathana; na rûteto nyuma ya rûteto; na kiugo nyuma ya kiugo.

¹¹ Îndî we MWATHANI akaarîria antû baawe; agaatûmîra antû ba mîgongo îngî; antû bakwaria nthiomi ngeni kûbaa nteto ciaawe.

¹²Mûrungu aabeerîre, “Gîkî nîkîo kînogoko kîeenu; nîkîo kînogoko kîa barîa banogi, na nîo kûrî na thîîrî.” Îndî bo bataamûthikîîra.

¹³Nîkîo gîtûmi nteto cia MWATHANI kîrî bo ikethagîrwa irî rîathana nyuma ya rîathana; rûteto nyuma ya rûteto; kiugo nyuma ya kiugo. Nîkenda beetîte bakagwa na nyuma bakaunîkanga na bakagûjaga mîtegoone, na bakagwatwa.

¹⁴Tontû bûû, thikîîreeni bwigue ûrîa MWATHANI akuuga buî aikumia; thikîîreeni buî barîa bwathaga antû ba Jerusalemu.

¹⁵Nîkwîthîrwa buî buugaga, “Tuî nî tûthithîtie kîrîkanîro na gîkuû, na tûrî na kîrîkanîro na gwa-akuû.” Bûciîraga atî, “Kinya mantû jamaaî buru jeeja jatîtûkinyîra, nîkwîthîrwa tuî nî tuiciithaga na ûrongo bweetû, na tûgaciaîria atî gûtî na ûgwati.”

¹⁶ Tontû bûû, MWATHANI Mûrungu augîîte ûjû, Atîrî, ngaaka mûsingi Zaiûni, jwa iiga rîtîûmba kwinainua kana kûthuthurûka; iiga rîa goro rîa koona, rîrîa rîtûmaga mûsingi jwîthîrwa jûrî jûmûriku: “Ûrîa wonthe ûgeetîkia atîîthîrwa arî na kîa kûmûmakia.”

¹⁷Ngatûma îota rîthîrwe rîrî mûrigi jwa kwerekania mantû jonthe, na waagîru bwîthîrwe bûrî kabirû ga kwerekanagia mantû. Giiciitho kîeenu kîa moorongo gîkaatharua nî ngai ya nchûgû, nakîo kîmatûkîro kîeenu kîa waayia gîgaakondorua nî mûguû.

¹⁸Kîrîkanîro kîrîa bûthithîtie na gîkuû gîkaatharûrua, na ûrîa bûrîkanîtie na gwa-akuû gûtuîke kwa ûtheri. Rîrîa mantû jarîa jamaaî buru jakeeja, kinya buî bûtîtigara.

¹⁹O rîrîa mantû jau maaî jakeejaga, gûtî rîo bûgacaîrwa. Nîkwîthîrwa o rûkîîrî o rûkîîrî jakeejaga; na jeejage mûthenya na ûtukû. Gûkeethîrwa kûrî ûntû bwa kûmakania mono gûciûkîrwa ûrîa Mûrungu akuuga.

²⁰Gûkeethîrwa gûkari ta muntû akîgeria kûmama gîtandeene gîkamûkuîîra, na ageria kwiguîka na mûrîngîti jûkarega kûmûng'ana.

²¹ Nîkwîthîrwa MWATHANI akaaithûka ta ûrîa aaithûkîte kîrîmeene kîa Perazimu; arî na marûrû ta jarîa aarî najo mûguuruune jwa Gibeoni. Mwanka athithie îthithio rîaawe, rîonekane rîtî rîa wîthîre; mwanka arite ngûgî yaawe yoonekane îrî ya mwanya.

²²Tontû bûû, rî, menyeni bwîja kûthûmbia nteto iji, mîkanda îrîa bûtheeki nayo îtîkeeje kûrikarikua. Nîkwîthîrwa ni nî mbîgîtue îtua rîrîa MWATHANI Mûrungu Mweneinya atuîte rîa kûthiria nthîgûrû îîjî yonthe.

²³Kindeni matû bwigue nteto ciaakwa; thikîîreeni bwigue ûrîa nkuuga.

²⁴Ka Mûrîmi atûûraga gûcimba muunda jwaawe? Ka athuranagîra muunda nîûntû bwa kûaanda ntukû cionthe?

²⁵Tîka aaraganagia ntiiro na akaanda ndania na matûngûrû ja gwîkîra îrio mûchemo? Tîka aandaga nkano na mûnyaki ûrîa kwagîrîte amwe na mbeeû ingî?

²⁶Nî amenyithagua ûrîa akûthithia, akaritanwa nî Mûrungu waawe.

²⁷Ndania citîûragwa na gîntû gîkîrito, kana matûngûrû jakinyangwa na ngaarî ya mbarathi; îndî ndania ciûûragwa na karûturo, na matûngûrû yakaûûrwa na kamûtî.

²⁸Ka muntû atumagîra inya inyingî kûûra nkano kana mûnyaki? Arî, atîtûûraga kûmîûûra. Kinya aakinyanga nkano yaawe na ngaarî ya mbarathi, atîrekaga mpîndî ciatûkanga.

²⁹Jau jonthe jaumaga kîrî MWATHANI Mweneinya; MWATHANI nî mweejani kîrîra wa kûrigaria, na nî ûmûûme nkûrûki.