Read KIMERU BIBLE PROTESTANT EDITION Isa 29 Bible Online

Isa 29 - KIMERU BIBLE PROTESTANT EDITION bible

Isa 29

¹Wûi kîrî gwe Jerusalemu, gwe kîritîro kîa igongwana kî Mûrungu; gwe ntûûra îrîa Daudi aambîre kambî; tara mîaka jûmwe kwa jûmwe mwanka mambura jaaku jakûrûkane.

²Nkaaithûkîra Jerusalemu, naku gûkoojûra mbu na kîrîro, mîeethie ta kîritîro kîa igongwana.

³Ngaatûma njûûrî igûcîgîîrie gwe Jerusalemu, mbake mînaara gûkûthiûrûkîra, na mpînje mîtaro ya gwitiira gûkûthiûrûkîra.

⁴Naagwe ûkaaragia ûrî îrinyeene; ûkaigîgagua ûkîaria ûrî nthî mûthetuune; mûgambo jwaaku jûgaitagia kuuma nthî mûthetuune jûtîkuumîra bwega; ûkaaigagîgua ta muntû ûkwaria na kîoe.

⁵Îndî anthû baaku bau baingî bagaakinyangwa bakare ta tîîri; njûûrî ya barîa batî kîaao îkaagûrûkua nî ruuo ta mauuti. Mantû jagaakarîka ta kûmincia na kûmincûria;

⁶MWATHANI Mweneinya rîrîa akeeja gûtûteethia, Ngorogoro îkaagamba na inya mono na nthîgûrû iinaine; Akeeja na kîbuubani na ngai înene na mwanki jwa rûmûrî jûkûîîthania.

⁷Nacio njûûrî cionthe cia mîgongo îrîa îrûaga na Jerusalemu, îtîcoka kûririkanwa kaîrî; barîa bonthe baithûkagîra Jerusalemu bakamîthangîkia bakoorîria ta kîrooto.

⁸Bagaakara ta muntû ûrî na mpara ûrootete akîria irio, agîûkîîra akeethîrwa arî o na mpara. Kana ta muntû ûrî na nyoonta arootete akînyua rûûjî, agîûkîîra akeethîrwa arî o na nyoonta na angaarûki. Ûu nîu gûgaakarîka kîrî mîgongo yonthe îrîa iithûkagîra kîrîma kîa Zaiûni.

⁹Bûrîriita mwanka bûe biaa; bûrîtumuumara buru bûtige kwona. Bûrîaa areebi kinya bûtînyuîte ndibei; bûtûgûûgage na bûtîogiti.

¹⁰ MWATHANI nî abûmamîtie toro îndito, aatumuumaria iroria bieenu, na aakunîke ooni beenu meetho.

¹¹Kîrî buî, ûroria bûbû bunthe bwa kîoneki nî bûbwithe ta maandîko jarî yukuune rîrîtumanie. Rîkanenkerwa muntû wiijî kûthoma akeerwa, “Thooma maandîko jaja,” augaga, “Ntîûmba kûjathoma nîûntû yuku nî rîrîtumanie.”

¹²Ningî rîkanenkerwa muntû ûtiijî kûthoma akeerwa, “Thooma maandîko jaja,” augaga, “Ntiijî kûthoma.”

¹³ MWATHANI ariuga atîrî, “Antû baba banthaathagia na tûnyua twaao na bagankumia na mîromo yaao akî, îndî nkoro ciaao ciîthagîrwa irî kûraaja naani. Kinya kûnthaathayia kwaao nî kwotheri na kuumanagia na mawaatho jarîa baritani nî antû bangî jarîa bairitanîte kuuga.

¹⁴ Tontû bûû, rî, nkaathithîria antû baba mantû ja kûmakania na ja kûrigaria kaîrî. Nkaathiria ûûme buru kîrî antû baao barîa boome, na mbithe ûmenyo bwa antû baao barîa aciûku.”

¹⁵Wûi kîrî barîa bageragia kwitha MWATHANI mîbango yaao; barîa bathithagîria mantû muunduune bakiugaga, “Gûtî we ûgûtwona; gûtî we ûkûmenya ûrîa tûkûthithia.”

¹⁶ Ka bûgarûraga mantû ûrîa jatîkari nîî? Kûrî rîo mûûmbi wa nyongû oomba kûng'anana na mûthetu jwa yûmba. Kûrî rîo gîntû kîûmba kuuga atî ûrîa ûkîthithîtie tîwe ûkîthithîtie? Kana kûrî rîo gîntû gîkîûmbe kîûmba gûkaana mûûmbi waakîo gîkiugaga tîwe ûkîûmbîte?

¹⁷Tî îgiita rîrîraaja rîtigeere gûtîroojûrua ûrîa kwîragwa, atî, “Mwitû jwa Lebanoni jûgatuîka muunda jwa irio naju muunda jwa irio jûtuîke mwitû.”

¹⁸Îgiita rîu rîakinya, itaigua bikaaigua nteto irîa ciaandîki yukuune ikîthomwa, najo meetho ja atumuumu jakaingûka, baume muunduune jûrîa batûûraga bacoke kwona.

¹⁹Barîa bainyiiîtie bakaagwîragîrua MWATHANI; nkîa irîa itwîre iinyagîîrua gatîgatî ka mîgongo igaakenaga nîûntû bwa Ûrîa Mûtheru wa Israeli.

²⁰Barîa batî kîaao bagaakinyua mûthia, aikumia bathirue, nabo barîa batûûraga bacûîte kûthithia ûthûûku booragwe.

²¹MWATHANI akaathiria barîa bakûûjagîîra bangî mantû ja ûrongo; na barîa barigicanagia magamba ja bangî, bakagiria muntû ûrîa ûrî ûûmeene agitîrwa ûrîa kwagîrîte nîûntû bwa nteto ciaao cia waayia.

²²Tontû bûû, MWATHANI ûrîa wonokerie Abrahamu nî aarîtie mantû jegiî antû ba Israeli akauga atîrî, “Nchiarwa cia Jakubu itîkorocoka kwigua nthoni kana beenîka ûthiû nîûntû bwa nthao.

²³Tontû rîrîa bakoona Aisraeli bangî barîa mbaeete barî gatîgatîîne kaao, bagampa gîtîîo kîrîa kîmbagîrîte. Bagaakumia Ûrîa Mûtheru wa Jakubu, na batûûre beetîkîtie Mûrungu wa Israeli.

²⁴Barîa batwîre beeagia nî kwaga ûmenyo bagaaciûkîrwa, na barîa batwîre baregete kwigua beetîkîre kûritanwa.”