Read KIMERU BIBLE PROTESTANT EDITION Isa 3 Bible Online

Isa 3 - KIMERU BIBLE PROTESTANT EDITION bible

Isa 3

¹Atîrî, MWATHANI, MWATHANI Mweneinya, agaatuunya Jerusalemu na Juda kîrîa kîbatûûragia kîonthe; na abatuunye rûûjî runthe.

²Akaabatuunya antû barîa barî îgweta na abatuunye nchamba cia ndwaa; na abatuunye agiiti magamba na abatuunye iroria, na abatuunye aringia na abatuunye atongeeria ba kîrîndî.

³Akaabatuunya atongeeria ba njûûrî cia antû mîrongo îtaano na abatuunye antû ba yuga; na abatuunye aejani kîrîra na aringi-biama na abatuunye agaa barîa boome.

⁴Nkaaeethia tûîjî anene baao, baathagwe nî twaana tûnyi.

⁵Antû bagaatua kûinyanagîîria, muntû ainyagîîrie muntû ûngî, mûtûûri ainyagîîrie mûtûûri waawe na aana baagaîre antû babakûrû nthoni na antû ba ûtheri baagaîre barîa barî îgweta gîtîîo.

⁶Îgiita rîgaakinya rîrîa muntû akaagwataga ûmwe wa mûciî jwaao ûmwe wa mwîrîga jwaao, amwîre: “Gwe ûrî na rwambambio; nîgwe ûkaa mûtongeeria weetû, Wathage ntûûra îîjî îtuîkîte îgaanjo.”

⁷We akaamûcokagîria amwîre: “Arî ni ntîûmba kûbûteethia; nja yaakwa îtî na irîo kana nguû; ntîîtîkîra bûmpeethia mûtongeeria weenu.”

⁸Nîkwîthîrwa Jerusalemu nî îgiitarîte, na Juda yaagwa; nîûntû ndwaria ciaao na mathithio jaao jatîgwîtania na wendi bwa MWATHANI, jatîkûgwatanîra na ûkumio bwaawe.

⁹Kwathûra bamwe kwaao bongwa nî gûkûbeendia barîtûmîîria meeyia jaao ta Sodomu, batîûmba kûjaitha. Wûi kîrî bo! Tontû nî bairetereete ûthûûku bongwa.

¹⁰Îreeni barîa baagîru atî gûtî ûthûûku bûkaabeejîîra, nîkwîthîrwa bakoona îrîi nîûntû bwa mathithio jaao.

¹¹Wûi kîrî barîa baaî! Tontû bakoona thîîna; nîkwîthîrwa ûrîa bathithanagîria noou bakaathithîrua.

¹²Antû baakwa, twaana nîtu tûbainyagîîria, na aka nîbo babaathaga. Itû antû baakwa, atongeeria beenu nî babûrigicanîtie, na nî babûatithîtie njîra.

¹³MWATHANI nî akarîrîte gîtî nîkenda agambithia antû, nî aithuranîrîte nîûntû bwa gûtuîra kîrîndî.

¹⁴MWATHANI akaagambithia akûrû na atongeeria ba antû baawe abeere: “Nîbuî bwînyangîtie muunda jwaakwa jwa mîzabibû, into birîa bûtuunyîte nkîa birî nyomba cieenu.

¹⁵Nîatîa bûkwenda kwonania rîu bûkûthia antû baakwa ûjû bûkîinyagîîria barîa batî inya?” Nîu MWATHANI Mûrungu Mweneinya akûûria.

¹⁶MWATHANI augîîte atîrî, “Tontû aka ba Zaiûni nî aikumia, na beetaga bakûûrîte nkingo, bakiunagîra antû meetho, bakiithioraga beetîte, bagîkinyaga na rwikumio bakîringithanagia bangiri cia magûrû,

¹⁷MWATHANI agatûma aka ba Zaiûni baume mathainya mûtwe, akaabarita nguû batigwe barî kîthûnû.

¹⁸Îgiita rîgaakinya rîrîa MWATHANI akaabatuunya bangiri irîa baigemagia nacio magûrû, na ikabi bia mûtuundu, na mînyoro;

¹⁹na mîkathî ya nkingo, na bangiri cia njara, na itambaa bia kwigerera;

²⁰na itambaa bia mîtwe na mîkang'i ya njara na mîcibi na twondo twa marashi, na tûgwîria na ithitû birîa baogereete njara na tuuna twaao,

²¹na mbete cia biara na cia nyiûrû;

²²na nguû ciaao irîa beetaga nacio biathoone, na ndwambambio, na nguû cia îgûrû na twondo;

²³na nguû ciaao irîa ithaaraga, na cia bamba, na iremba, na itambaa bia gwikunîka ûthiû.

²⁴Antû a kûeera marashi, ka bakaanunkaga; na antû a gûcioga mîcibi, bagaaciogaga mîrigi; antû a mîtuundu îîndi bwega, bakethagîrwa beenji ng'arûrû, antû a nguû cia goro, bageekagîra mathango; na antû a ûthongi nî ndworo bakethagîrwa barî nacio.

²⁵Arûme beenu bakaathirua na rûchiû, nacio nchamba cieenu ithirîrue ndweene.

²⁶Mpingîro cia Zaiûni ikaarîra na ciithikîîre; ntûûra îkaagîa na kwithikîîra ta kwa mûka ûriti nguû aatigwa arî kîthûnû.”