Read KIMERU BIBLE PROTESTANT EDITION Isa 30 Bible Online

Isa 30 - KIMERU BIBLE PROTESTANT EDITION bible

Isa 30

¹MWATHANI ariuga atîrî, “Wûi kîrî antû baba ndemi; bathingataga mîbango îtî yaakwa, bakathithia ngwatanîro na mîgongo îngî batîûrîtie këethîra nîbu wendi bwaakwa, nîkenda bongeera meeyia îgûrû rîa meeyia.

²Baumagaraga bakeenama Misri batîmbûûrîtie, bageeta gwiciitha Misri nîkenda batethua nî Farao.

³Îndî ûteethio bûu bwa Farao nîbu bûgaatûma bûcokeerwa nî nthao; gwîta gwiciitha Misri nîku gûkaabûthaithia.

⁴Tontû kinya këethîra thirikarî yaawe nî îkinyîte Zoani, na arî na atûmwa Hanesi,

⁵no nthao ikaabacokeera nîûntû bwa gwîtîkia antû batîûmba kûbateethia; antû batîûmba kûbaguna noo atîa, tiga kûbeekîrithia nthao na kûbathaithia.”

⁶Iji nî nteto ciegiî nyamû cia nthîgûrû irîa îrî bwa ûmotho bwa Juda. Atûmwa ba Juda bagiitagîîra gûntû kûrî moogwati jamaingî, kûrîa ngatûnyi ndûme na nka itûûraga; kûrîa njoka inthûûku na nchûaana itûûraga. Bakamatithagia ntigiri ciaao na nkamîîra ciaao into bibingî bia goro, baikîrîtie antû batîûmba kûbateethia.

⁷Ûteethio bûrîa Misri îeejanaga nî bwa ûtheri buru. Tontû bûû, bûtûmîte mîîta “Njoka îtîûmba kûrûma muntû.”[7]

⁸Nandî rî, îta ûbaandîkîre mantû jaja kîbaûûne, na ûjeekîre yukuune, nîkenda matukûûne ja nyumeene rîkethagîrwa rîrî ûkûûjî.

⁹Nîkwîthîrwa antû baba nî ndemi na nî antû ba ûrongo; nî antû batiigagua ûrîa MWATHANI akûbeera.

¹⁰Beeraga ooni atîrî, “Tigeeni gûtwonera mantû kaîrî,” nabio iroria bakabiîra, “Tigeeni gûtûroragîria mantû ja mma; twîrageni mantû jarîa meega jonka; tûroragîrieni mantû ja gûtûgwîria.

¹¹Twebeereni njîreene bûtige gûtûingîîra. Tûtîkwenda kwigua kaîrî mantû jegiî Ûrîa Mûtheru wa Israeli.”

¹²Tontû bûû, Ûrîa Mûtheru wa Israeli ariuga ûjû, “Tontû nî bûreganîte na nteto ciaakwa, na bûgeetîkia waayia na mantû ja kûiinyanîîria, na bûkajeerigîîra rî,

¹³meeyia jaja jagaatûma bûkare ta rûthingo rûrûraaja rûkuîte rûkuû na rûrî akuî kûmomoka, rwatua kûgwa rûgûûjaga o rîmwe.

¹⁴Rûkaaragana ta nyongû ya yûmba îringithanîtue nthî na inya îkauma ncere, gûkaaga noo karûgîo koomba gûkamata îkara rîa mwanki, kana koomba gûtaîîra rûûjî kuuma kîthimeene.”

¹⁵MWATHANI Mûrungu, Ûrîa Mûtheru wa Israeli augîîte atîrî, “Bwambigua na bwancokeera, bûkoonoka; bwainyiiyia na bwambîtîkia bûkaagîa na inya.” Îndî buî nî bûregeete kûthithia ûu.

¹⁶Uugaga atîrî, “Tuî tûkaamatûka na mbarathi,” na ûu noou gûgaakara. Buugaga, “Tuî tûkaamatûka na mbarathi irîa irî rwîro mono,” îndî cia anthû beenu nîcio ikeethîrwa irî na rwîro nkûrûki.

¹⁷Mûnthû ûmwe akaamakia antû beenu ngiri îmwe bamatûke; bwamakua nî anthû bataano bûmatûke bwinthe, mwanka bûtîgwe bwanîki ta bendera yambi karîmeene îgûrû.

¹⁸Îndî MWATHANI no eeteerete bwîta kîrî we nîkenda abwonia kîaao kîaawe; na nî acieejanîte kûbwonia kîaao kîaawe. Nîkwîthîrwa MWATHANI nî Mûrungu wa îota; kûgwîrua nî barîa bonthe bakaraga bamweteerete abateethia.

¹⁹Atîrî buî antû ba Zaiûni; buî bûtûûraga Jerusalemu; bûtîkororîra kaîrî nîûntû MWATHANI akaigua kîrîro kîeenu na abwigîîrue kîaao. Akaigua kîrîro kîeenu na abwîtîke.

²⁰MWATHANI nîwe ûkethagîrwa arî Mûritani weenu na atîkorobwiciithîra kaîrî. Kinya aareka bwîjîîrwa nî ndwaa na mîthangîko, agaacoka acionanie kîrî buî.

²¹Rîrîa bwata njîra bweeta rûteere rûrû kana rûrîa rûngî, bûkaigagua mûgambo jwaawe nyuma yeenu jûkîbwîra, “Njîra nî îîjî, îteeni nayo.”

²²Naabuî bûkaathûkangia mîrungu yeenu ya mîng'uanano îrîa îthithîtue na fetha na thaabu bûmîte ta into bibioru bûkiugaga, “Bûroûra!”

²³MWATHANI akaabuurithagîria ngai ya gûkûria birîa bûaandîte na agatûma miuunda yeenu yuma maketha jamaingî na jamathongi. Ningî nyomoo cieenu cia ndîîthia ikethagîrwa irî na nyaki înyiingî ya kûrîa.

²⁴Ndeegwa na ntigiri cieenu cia mûraû ikaarîîjaga nyaki îrîa nthuranîre bwega buru na îîkîri chumbî.

²⁵Îgiita rîu rîakinya, anthû beenu bakooragwa na wingî na biitiiro biaao bimomorangwe. Rîu nîrîo ithima bia rûûjî bigaatûrîka irîmeene birîa iraaja bionthe na tûrîmeene tunthe.

²⁶Naju mweri jûkagîa na weerû bûbûnene ta bwa riûa, nabu weerû bwa riûa bwongeereke mainda mûgwanja, ta weerû bwa ntukû mûgwanja bûringanîri. Îgiita rîu rîakinya, MWATHANI akaaoga antû baawe ironda na aboorie ngûma irîa abeekîrîte.

²⁷Tegeeni kûraaja bwoone MWATHANI nî eejîte na ûkumio bwaawe; mûthûûro jwaawe ka jûgwakana mwanki jûgiitagia îgûrû ta toogi, mîromo yaawe yûjûri marûrû naru rûûme rwaawe nî ta rûmûrî rwa mwanki.

²⁸Mîrukî yaawe îrîkondoria ta rûûjî rwimbi rûgakinya muntû nkingo. Eejîte kûretera mîgongo îrîa îtîmwîtîkîtie îkanûkia rîa mûthiro na gwîkîra antû baayo gîchooki gîa kûbaatithagia njîra.

²⁹Îndî buî antû ba Mûrungu, bûkaaina ndwîmbo bûgwîrîtue ta ûrîa kwinagwa ûtukû bwa mambura. Bûkeethîrwa bûrî na kûgwîrua ta ûrîa antû bagwîragua beetîte kîûrûûne kîa MWATHANI, we inya ya Israeli.

³⁰MWATHANI akaagondoka atûme antû bonthe baigue kajû kaawe na boone akîreeta îkanûkia rîaawe rîa inya. Nîkwîthîrwa akeeja na mûthûûro jûmûnene jûgwakana ta rûmûrî rwa mwanki na toogi înyiingî na kîbuubani na ngai ya nchûgû.

³¹Antû ba Asîria bakaagwatwa nî kîmako gîkînene baigua kajû ka MWATHANI akîîja kûbakanûkia.

³²Antû ba MWATHANI nabo bagaakûngûagîra o îringa rîonthe rîa îkanûkia rîrîa akaaringaga antû ba Asîria bakiinaga na tamburini na inanda bia ndigi. MWATHANI agaatambûrûkia njara yaawe arwee nabo na inya yonthe.

³³Riiko nî rîrîîkîtie kûthuranîrwa, rîrî nkû inyiingî na mwanki jûmûnene. Rîthuranîri nîûntû bwa mûnene waao, na nî rîrîraaja kwînama bwa nthî na nî rîrîariî. Narîo rîgaakanaga ta mwanki jwa ûbiriti nîûntû bwa mîrukî ya MWATHANI.