Read KIMERU BIBLE PROTESTANT EDITION Isa 32 Bible Online

Isa 32 - KIMERU BIBLE PROTESTANT EDITION bible

Isa 32

¹Atîrî, îgiita rîgaakinya rîrîa mûnene akaathanaga ûrîa kwagîrîte, na atongeeria ba nthîgûrû bathanage na îota.

²O mûtongeeria wonthe akethagîrwa akari kîrî antû ta gîntû gîa kûrigîîria ruuo, kana ta antû a gwiciitha kîbuubani; akethagîrwa akari kîrî antû ta kîthima kîa rûûjî rwanda, kana ta mûng'unye jwa iiga rîrînene gûntû gûtî mîtî.

³Îgiita rîu antû bagaaciûkagîrwa nî jarîa bakoonaga, na beerwa ûntû bakaigua.

⁴Barîa bathithangagia mantû o ûu batîthûgaanîtie bwega bakaagîa na mathûgaanio jaboorerete, nabo barîa baarangagia na gîûtû bagaatua kwaragia bwega batarîîrîtie.

⁵Biaa bitîcoka kûeejagwa gîtîîo, kana barîa baaî bacoka gûkumagua.

⁶Nîkwîthîrwa kîaa kîaragia nteto cia waa, na mathûgaanioone jaakîo nî mîbango ya ûmaramari îîthagîrwa îrî ku. Kîritaga ngûgî o irîa Mûrungu athwîre, ningî gîkagwetanagîria MWATHANI na mantû jatîmwegiî. Gîtîrûmagia muntû ûrî na mpara irio, kana gîkundia muntû ûnyonti rûûjî.

⁷Mîbango ya muntû ûmûûî rîonthe nî îmîthûûku; abangagîra bangî mîbango îmîthûûku, akathûûkia muntû ûiinyîîrîtue na nteto cia ûrongo, kinya aijî atî ûu ûiinyîîrîtue nîwe ûrî ûûmeene.

⁸Îndî muntû ûmwega athûgaanagia na akathithia mantû jameega, na akarûngamîîra ûûma.

⁹Ûkîîreeni buî aka, buî bûtûûraga bûnthinyaarîte, thikîîreeni bwigue ûrîa nkuuga. Buî aka, buî bwonaga teeka bwakinyîre, kindeni matû bwigue ûrîa nkûbwîra.

¹⁰Mwaka jûkîthira kuuma nandî bûkamaka bûrigare, buî aka, buî bûtûûraga kiindajî. Nîkwîthîrwa mîzabibû îkooma, na gûtî maketha bûkoona.

¹¹Bûbuîrîte kwimakîra buî aka, buî bûtûûraga bûnogokete, bûbuîrîte kwinaina nî kîmako buî bwonaga teeka bwakinyîre. Riteeni nguû cieenu, bwîkîre mathango bûrî na kwithikîîra.

¹²Iringaringeeni ibara na kîeba nîûntû bwa miuunda yeenu îrîa mîthongi; rîreeni nîûntû mîzabibû yeenu nandî îtî maciara.

¹³Rîreeni nîûntû bwa nthîgûrû ya antû baakwa, nîûntû nandî yûjûri miigua na nkonko. Rîreeni nîûntû bwa ntûûra îrîa yaatûûraga na thîîrî, na nyomba ciaayo, kûrîa gwatûûraga gîkeno.

¹⁴Gîkaro kîa mûnene gîgaatigwa kîrî gîkîtheri; antû bakaamatûka bathire ntûûreene îrîa îrî atûûri babaingî. Ntûûra îrîa mbirigîre na mînaara ya gwiciitha igaatigwa kîthakeene; ntigiri cia kîthaka nîcio ikaamamaga ku, nacio mbûri na ng'ondu nîku ikaarîîjaga.

¹⁵Gûgaakara ûu mwanka rîrîa Mûrungu agaatwînîkîra Roho waawe. Naru rwanda rûgaatuîka muunda jwa irio, nayo miuunda ya irio îgaatuîka mwitû.

¹⁶Rwanda gûkoojûra îota na waagîru bûûjûre miuundeene.

¹⁷Waagîru bûkaareta thîîrî umithio bwa waagîru bûkeethîrwa bûrî ûkiri na gwîtîkania mwanka kenya.

¹⁸Antû baakwa bagaatûûraga ntûûreene irî na thîîrî; batûûrage nja ciaao batî na ûgwati bathinyaarîte.

¹⁹Îndî mwitû jûgatûgûtwa jûthire na ntûûra îkaathirua buru.

²⁰Naabuî bûkethagîrwa bûrî na kûgwîrua nîkwîthîrwa irio bieenu bikoonaga ngai ya kûng'ana, nacio ng'ombe cieenu na ntigiri cieenu ikaarîîjaga kûrîa ikwenda.