Read KIMERU BIBLE PROTESTANT EDITION Isa 33 Bible Online

Isa 33 - KIMERU BIBLE PROTESTANT EDITION bible

Isa 33

¹Wûi kîrî gwe, gwe ûthiragia bangî, kinya këethîra gwe ûtîrarî ûkûthirua; gwe ûkunyanagîra bangî, îndî gwe gûtî we ûgûkunyanagîra! Ûkîrîîkia kûthirania kinya gwe ûkaathirua; ningî warîîkia gûkunyanîra bangî, kinya gwe ûgaakunyanîrwa.

²Itû MWATHANI twigîîrue kîaao nîûntû wîrîgîîro bweetû nî kîrî gwe. Tuîka ûteethio bweetû o ntukû o ntukû; twonokagie magiita ja thîîna.

³Anthû beetû baigagua mûrurumo jwaaku bakamatûka; ûûkagîîra, mîgongo îrîa îtîgwîtîkîtie îkaaragana;

⁴nabio into biaao bikoothûranua bitaawe, antû bakîbithûngûthagîra ta mpandi.

⁵MWATHANI arokumagua, nîkwîthîrwa we nîwe ûtûûraga arî mûnene, nawe akoojûria Zaiûni mantû ja îota na waagîru.

⁶Nîwe ûgaatûma bûkara bûrî kiindajî, nîkwîthîrwa we oojûrîtwe nî wonokio na ûûme na ûmenyo. Gûkîra MWATHANI nî ûtonga bûbûnene.

⁷Tegeeni! Nchamba cia ndwaa gaikûrîra; barîa bacwaga thîîrî ka bagûkaya.

⁸Njîra imbariî nî ciîrûkîri; eeti na njîra gûtî bo. Irîîkanîro ka bikuunangwa; akûûjî batîkûthikîîrwa na antû batîkweejana gîtîîo.

⁹Nthîgûrû nî întiganîrie yoojûra îoru. Mîtî ya Lebanoni nî îmîûmo; nthîgûrû ya Sharoni îrîa noru îtuîkîte rwanda, nayo mîtî ya Bashani na Karimeli îkûûrûrûka mabûûra yathira.

¹⁰MWATHANI ariuga, “Nandî nkaathithia îthithio; ngaacionania nandî bûmenye ndî o.

¹¹Mîbango yeenu nî ta mauuti, na mathithio jeenu nî ta mataaya; bûrîbanga mîbango na nî mwanki bûgûciuîra jwa kûbûîîthia bwingwa.

¹²Bûgaatuntumûka ta ûrîa maiga jakagîîrua na mwanki ja kûthithia cimiti; bûkaaya bûtuîke mûju ta matî ja miigua jatemi jakagerwa mwankiine.”

¹³Buî ba kûraaja, naabuî ba gûkuî; thikîîreeni, bwigue ûrîa nthithîtie bûmenye ndî inya.

¹⁴Eeyia barîa barî Zaiûni nî bamakîte; barîa batîîtîkîtie Mûrungu no kwinaina bakwinaina. Barîûria, “Nûû kîrî baatuî ûûmba gûtûûra mwankiine jûmûnene ûjû? Nûû wa-cieetû ûûmba kûûmîîria mwanki jwa kenya na kenya?”

¹⁵Nonga ûrîa ûrî mîîtîre îmîagîru na waaragia ûûma; ûrîa ûthwîre into birîa biumanagia na kûiinyanîîria. Ûrîa ûtîendaga gûtonga nkukumo na njara ciaawe; ûrîa ûtîgwîragîrua kwigua nteto cia ûûragani, na ûthwîre kwona mantû jamathûûku jakîthithua.

¹⁶Muntû ta ûu nîwe ûgaatûûra arî thîîria; agaatûûraga gûntû gûtî na ûgwati ta ntûûra îmbirigîre îrî kîrîmeene îgûrû; atîkoroaga irio biakûrîa kana rûûjî rwa kûnyua.

¹⁷Bûgaacoka kwona bûkîathwa nî mûnene weenu, na nthîgûrû yeenu îrî înene.

¹⁸Bûkaaririkanaga mathîîna jarîa bwoona bûkoona ta kîrooto, bûkooria, “Barîkû barîa baatwathaga? Barîkû barîa beetagia ûgoti? Barîkû barîa baakaraga mînaareene yeetû ya akaria?”

¹⁹Bûtîcoka kwona aikumia bau ba mîgongo îngî, bau baaragia nthiomi bûtîkûmenya batîbûtantaurîra kaîrî.

²⁰Tegeeni Zaiûni, ntûûra îrîa tûthithagîria mambura ja Mûrungu weetû! Jerusalemu nîku bûkeerekagîra naku gûkaa gîtûûro kîa thîîrî, na îema rîtîûmba kwebaebua. Biango biarîo bitîkorokûûrwa, kana mûkanda noo jûmwe jwarîo jûtuîka.

²¹MWATHANI akoonanagia inya yaawe arî rûteere rweetû. Naku gûntû kûu nîku gûntû kwa ndûûjî inene na iniini; îndî gûtî mûnthû ûkoomba gûkinya ku na gîtarû kana meri.

²²Nîkwîthîrwa MWATHANI nîwe ûmenyaga mantû jeetû, na nîwe ûtwathaga; MWATHANI nîwe mûnene weetû, na agatwonokia.

²³Buî bwithûkanagîra na meri igueni: mîkanda yeenu nî îmîtuîkangu; îtîûmba kûrûngîka gîtugî kîa meri kîa gatîgatî kana îrikia itambaa bia gwîtithia meri. Tontû bûû, into bieenu bigaatawa na wingî; kinya ithua bigataa into.

²⁴Gûtî muntû wa kuuma Israeli ûkorouga kaîrî, “Nî mbajîtue.” Antû barîa batûûraga ku bakaarekerwa meeyia jaao.