Read KIMERU BIBLE PROTESTANT EDITION Isa 34 Bible Online

Isa 34 - KIMERU BIBLE PROTESTANT EDITION bible

Isa 34

¹Îjaîjeni akuî bûthikîîre buî mîgongo; igueni buî antû ba mîgongo yonthe. Nthîgûrû nî îthikîîre amwe na barîa bonthe batûûraga ku; nthîgûrû yonthe nî iigue amwe na kîrîa kîonthe kîrî ku.

²MWATHANI nî athûûri mono nî mîgongo yonthe; arî na marûrû nîûntû bwa njûûrî ciaao cionthe. Nî arîîkîtie kûbatuîra atî no mwanka bathirue buru.

³Biimba biaao bitîthikwa; kîrumba kîabio gîkoojûra kunthe, na tharike yaabio yunûkage ta mûguû kuuma irîmeene.

⁴ Riûa na mweri na njota bikaarerûka bithire buru, narîo îgûrû rîkûnjakûnjwe ta yuku. Into bionthe bia îgûrû bikaagwa nthî ta ûrîa mabûûra ja mûzabibû kana ja mûkûû joorûrûkaga.

⁵ Rûchiû rwa MWATHANI nî rûrîîkîtie kûthuranîrwa kûu îgûrû. Nandî nî rwînamîîrîte Edomu gûkanûkia antû barîa arîîkîtie gûtuîra atî bathirue buru.

⁶Rûchiû rwa MWATHANI rûûjûri tharike na maguta; rûûjûri tharike ta ya ng'ondu na ya mbûri na maguta ta ja ntûrûme. Nîkwîthîrwa MWATHANI nî arîîkîtie gûtua atî Bozira gûkaaritwa ta kîgongwana, ningî nthî ya Edomu gûgaatuîka ta kîritîro kîa igongwana.

⁷Antû barîa barî înya mono ta ndeegwa cia kîthaka bagaacindwa; na nchamba na nthaka igacindwa. Nayo nthîgûrû yaao îkoojûra tharike na îkunîkwe nî maguta jaao.

⁸Nîkwîthîrwa MWATHANI nî atuîte ntukû ya îkanûkia; nî abangîte îgiita rîa kûrîîria Zaiûni mantû jamathûûku jarîa yaathithîrue.

⁹Ndûûjî cia Edomu igaatuîka rami, naju mûthetu jwakane mwanki jwa ûbiriti; nthîgûrû îîu yonthe îgaatuîka rami îrî na mwanki.

¹⁰ Mwanki jûtîkoroora ku ûtukû kana mûthenya; gûgaatûûra kûûmbûkaga toogi kenya na kenya. Mîaka yonthe, nthî îîu îgaatûûra îrî întheri; gûtî muntû ûkorogiitanîîria ku mwanka kenya.

¹¹Îgaatuîka nthîgûrû ya ndwîgî na ncheege; ntuntuguru na nkûngûrû nîcio igaatûûraga ku. Mûrungu agaatûma îtûûre îrî întheri kaîrî îkare ûrîa yaatwîre tene.

¹²Gûtî mûnene ûngî ûkamîatha nîûntû nî întheri, na atongeeria baayo bonthe bakaa ba ûtheri.

¹³Nthingo ciaayo igaakunîkanua nî matî ja miigua na mîgaa, nacio nyomba ciaayo cia gwitiira ikunîkwe nî ithaka birî na miigua. Mbîrwa nîcio ikaangaga ku; nîku thirai ikamamaga.

¹⁴Nyamû cia kîthaka amwe na mbiti igaatûûra ku, nacio nkûrûngû na nthia ikaathaakanagîria ku, ningî gûgaatuîka kîmamo kîa nyamû irîa ciîtaga ûtukû.

¹⁵Ntuntuguru igaakaga itara ikarekagîria nkara ku, ikaguîkîra nkara ciaacio mwanka bianaana bikaguûka bikabuurûka. Ndwîgî ikoojûra ku o ndûme na nka yaayo.

¹⁶Raitheni yukuune rîa MWATHANI bûthome ûrîa kwandîki: gûtî kinya îmwe ya nyomoo iu îkaûra gûntû kûu, na gûtî yo îkeethîrwa îtî na îngî ya mûthemba jwaayo. Nîkwîthîrwa MWATHANI nîwe uugîîte mantû jau, na Roho waawe agaaciûthûrania.

¹⁷MWATHANI nî aathimîte nthîgûrû îîu wengwa, na amîgaanîria nyomoo iu; nayo yaatuîka yaacio buru, itûûraga ku kenya na kenya.