Read KIMERU BIBLE PROTESTANT EDITION Isa 35 Bible Online

Isa 35 - KIMERU BIBLE PROTESTANT EDITION bible

Isa 35

¹Rwanda na gûntû kûrîa kûûmû gûkaagwîrua; nthî îrîa îtîonaga ngai îgakena na yuume ithaka.

²Îkoojûra maûa, iine îgîkûngûagîra nî kûgwîrua. Îkaathongoma îkare ta Lebanoni, îkare ta Karimeli kana ta Sharoni. Nabo antû bonthe bagaacionera ûkumio bwa MWATHANI, bamenye Mûrungu weetû arî inya.

³ Îkîreeni njara irîa igogoi inya; na maru jarîa jagûteetema jagîe inya.

⁴Îreni barîa barî na ûguaa nkoroone atîrî, “Ûmîîrieni, bûgáakîreni; Mûrungu weenu nî eejîte gûkanûkia anthû beenu; nawe akaabûrîîria na akaabwonokia.”

⁵ Atumuumu bakaaingûrwa meetho, nabio itaigua bikaarugûrwa matû.

⁶Ithua bikaathûngathûngûtha ta nthia, nabo barîa batwîre batîaragia baine na kûgwîrua. Ndûûjî igaatûrîka rwanda na ithima bitûrîke kûrîa gûtîonaga ngai.

⁷Kûrîa kûrî mûthanga jûîîthanagia gûkoojûra tûmaria twa rûûjî, nayo nthîgûrû îrîa îtwîre îng'aarûki yûjûre ithima bia rûûjî. Kûrîa mbîrwa itûûraga kwanga gûgaatuîka marimba, kûûjûre nyaki na nthanje.

⁸Gûkeethîrwa kûrî na barabara îmbariî gûntû kûu, nayo îgeetagwa “Njîra ya Ûtheru.” Barîa batîtheri batîtua kûmîîtagîîra, ningî biaa bitîkoromîkinya.

⁹Gûtî ngatûnyi îkethagîrwa îrî ku, na gûtî nyamû ndîîjani îkaamîkinyaga. Itîkoroonwa ku, îndî no antû barîa Mûrungu akûûrîte bageetaga nayo.

¹⁰Antû barîa MWATHANI aakûûrîre bagaacoka, batonye Zaiûni bakiinaga ndwîmbo, barî na gîkeno gîkînene na kûgwîrua gûtîkorothira mwanka kenya na kenya, na kîeba na mîthangîko bikaathira buru.