Read KIMERU BIBLE PROTESTANT EDITION Isa 36 Bible Online

Isa 36 - KIMERU BIBLE PROTESTANT EDITION bible

Isa 36

¹Mwakeene jwa îkûmi na îna jwa waathani bwa mûnene Hezekia, Senakeribu mûnene wa Asîria nî aaithûkîîre ntûûra irîa mbirigîre cionthe cia Juda na araitaa.

²Mûnene ûu wa Asîria nî aatûmîre mûtongeeria wa njûûrî ciaawe kîrî mûnene Hezekia. Arauma Lakishi areeta Jerusalemu na njûûrî înene. Ararûngama akuî na mûberethi jûrîa jwînîkaga rûûjî kuuma karieene karîa karî bwa rûgûrû, akuî na njîra îmbariî îrîa îîtaga kîeniine kîa Mûûri wa Nguû.

³Eliakimu mûtaana wa Hilikia, ûrîa waarî mûrûngamîîri wa gîkaro kîa mûnene, na Shebuna ûrîa waarî karani, na Joaha mûtaana wa Asafu, ûrîa waarî mwandîki, baraumagara bareeja kîrî we.

⁴Mûtongeeria ûu wa njûûrî ya Asîria arabeera atîrî, “Îreni Hezekia mûnene wa anene, tawe mûnene wa Asîria ariuga ûjû: ‘Nîmbi ûrî nayo ya gûtûma ûciîtîkia ûjû?

⁵Gaûkûthûgaania atî biugo bibitheri nî ûmwe na kuibanga na kwîthîrwa ûrî na inya ya kûûmbana ndweene? Nûû nandî ûgwîkîrîte inya tontû ûregete kûmbathîkîra?

⁶ Nî mbijî nî Misri îgwîkîrîte inya. Îndî Misri nî rûturo rûruunîku na ka rûmuntaga njara ya muntû ûrîa wonthe wikinyagîîria naru. Ûu nîu Farao mûnene wa Misri akari kîrî barîa bonthe bacwaga ûteethio bwaawe.

⁷Noo bûûmbîîre atîrî, “Nî MWATHANI Mûrungu weetû ûtûteethagia.” Îndî tî tûrîma twa kûritîra igongwana na iritîro bia igongwana birîa Hezekia aakoborangîre akîîraga antû ba Juda na ba Jerusalemu atîrî, “Bûrîtua kûthaathagîria MWATHANI kîritîroone kîa igongwana gîkî gîonka?”

⁸Nandî rî, aranîria na mwathi waakwa mûnene wa Asîria: ngaakûnenkera mbarathi ngiri ijîîrî wëethîrwa ûkoona antû ba kûng’ana ba gûciîtithia.

⁹Nîatîa ûûmba kûûmba mûtongeeria ûmwe akî wa barîa baniini ba njûûrî cia Asîria ndweene këethîra nî Misri wîrîgîrîte îgûteethia na ngaarî cia ndwaa na eetithia mbarathi?

¹⁰Ningî rî, gaûkûthûgaania atî mbîjîte kwithûkîra nthîgûrû îîjî ntîîri u nî MWATHANI? MWATHANI nîwe ûmbîîrîte nthirie nthîgûrû îîjî.”

¹¹Rîu Eliakimu na Shebuna na Joaha bareera mûtongeeria ûu wa njûûrî ya Asîria atîrî, “Itû twarîrie na rûthiomi rwa Kîaramu tuî nthûûmba ciaaku, nîûntû nîtûrwijî. Tiga gûtwarîria na rûthiomi rwa Kîhibirania antû baba barî rûthingoone bakiigagua.”

¹²Îndî mûtongeeria ûu wa njûûrî ya Asîria arooria atîrî, “Ka-mwathi waakwa antûmîte mbîja kûbwîra nteto iji bwinka, amwe na mwathi weenu, antû baba bakarîrîte rûthingo batîkwigua? Uga kinya bo batîrîa mai jaao bûkîrîa na banyue maumago jaao bûkînyua?”

¹³Rîu mûtongeeria ûu wa njûûrî ya Asîria ararûngama aratûmîîria na rûthiomi rwa Kîhibirania arauga, “Thikîîreeni bwigue nteto cia mûnene wa anene, tawe mûnene wa Asîria!

¹⁴Mûnene ariuga atîrî: Bûgeetîkîreni kwaîrua nî Hezekia nîûntû atîûmba kûbwonokia.

¹⁵Bûkaarekeni Hezekia atûma bwîka wîrîgîîro bweenu kîrî MWATHANI akîbwîraga, ‘Gûtî nkaanja MWATHANI agaatwonokia; atîrekeeria ntûûra îîjî njareene cia mûnene wa Asîria.’”

¹⁶Bûkaathikîîreeni nteto cia Hezekia. Nîkwîthîrwa mûnene wa Asîria ariuga atîrî, “Tumeni thîîrî naani, buumagare bwîje kîrî ni, naabuî bûgeetîkîîrua kûrîîjaga matuunda ja mîzabibû yeenu na ja mîkûû yeenu na kûnyunyaga rûûjî rwa ithima bieenu,

¹⁷mwanka rîrîa nkaabwîjîra mbwikie nthîgûrû ingî o ta yeenu; nthîgûrû yûjûri maketha ja irio na biakûrîa; nthîgûrû yûjûri miuunda ya mîzabibû na ndibei.”

¹⁸Menyeereeni bûtîkeeje kwaîrîîrua nî Hezekia akîbwîraga atî, “MWATHANI agaatwonokia.” Kûrî mîrungu ya mîgongo noo îrîkû bwaigua yonoketie nthîgûrû yaayo kuuma njareene cia mûnene wa Asîria?

¹⁹Îrîkû mîrungu ya Hamathi na Aripadi? Îrîkû mîrungu ya Sefarivaimu? Nî yûmbîte kwonokia Samaria kuuma njareene ciaakwa?

²⁰Nî jûrîkû kîrî mîrungu îîu yonthe ya nthîgûrû iu bwaigua jûûmbîte kwonokia nthîgûrû yaaju kuuma njareene ciaakwa nîkenda bwîtîkia atî MWATHANI akoomba kwonokia Jerusalemu kuuma njareene ciaakwa?

²¹Îndî barakira. Bataamûcokeria kiugo noo kîmwe, nîkwîthîrwa mûnene Hezekia nî aabeerîte, “Bûtîkaamûcokerie.”

²²Eliakimu mûtaana wa Hilikia, ûrîa waarî mûrûngamîîri wa gîkaro kîa mûnene, na Shebuna ûrîa waarî karani, na Joaha mûtaana wa Asafu, ûrîa waarî mwandîki, bareeta kîrî Hezekia batambûrangîte nguû ciaao, baramwîra mantû jarîa mûtongeeria ûu wa njûûrî ya Asîria aarîtie.