Read KIMERU BIBLE PROTESTANT EDITION Isa 37 Bible Online

Isa 37 - KIMERU BIBLE PROTESTANT EDITION bible

Isa 37

¹Rîrîa mûnene Hezekia aigîrue mantû jau, aratambûranga nguû ciaawe, areekîra mathango, na areeta nyomba ya MWATHANI.

²Aratûma Eliakimu ûrîa waarî mûrûngamîîri wa gîkaro kîa mûnene, na Shebuna ûrîa waarî karani, na athînjîri-Mûrungu barîa batongeeragia bangî, kîrî kîroria Isaya mûtaana wa Amozi. Bareeta beekîrîte mathango

³bareera Isaya atîrî, “Hezekia ariuga ûjû: ‘Ntukû ya naarua nî ntukû ya mîthangîko na îkanûkia na nthao. Tûkari ta mûka akinyîtie îgiita rîa kûewa mwana îndî akaaga inya ya gûciara.

⁴Mûnene wa Asîria nî atûmîte mûtongeeria wa njûûrî ciaawe eeja kûthûmbia Mûrungu ûrîa ûtûûraga mwoyo. Kwombîka MWATHANI Mûrungu waaku ageetîkîra kwigua mantû jau jaarîîtue na agakanûkia barîa bajaarîtie. Tontû bûû, romba MWATHANI nîkenda gûtigara matigari.’”

⁵Rîrîa atûmwa bau ba mûnene Hezekia baakinyîre kîrî Isaya,

⁶Isaya nî aabeerîre atîrî, “Îteeni bwîre mwathi weenu MWATHANI ariuga ûjû: ‘Ûgákîra nîûntû bwa nteto iu waigua nthûûmba cia mûnene wa Asîria ciaaria cia kûmbagîra nthoni.

⁷Atîrî, ngatûma mûnene wa Asîria aigue nguutû na eende gûcoka nthîgûrûûne yaawe. Naani ngaatuma akuîre ndweene kûu nthîgûrûûne yaawe.’”

⁸Mûtongeeria wa njûûrî ya Asîria nî aaigîrue atî mûnene wa Asîria nî araumîre Lakishi eeta. Tontû bûû, aracoka areethîra mûnene akîrûjaga na ntûûra ya Libuna.

⁹Nacio nteto nî ciakinyîîre mûnene wa Asîria, araigua atî Tirihaka mûnene wa Ethiopia arî njîreene eejîte kûrwaa nawe. Aigua nteto iu aratûma antû kîrî Hezekia arabeera,

¹⁰“Bweta bwîre Hezekia mûnene wa Juda atîrî, ‘Ûkáreka Mûrungu waaku ûrîa wîtîkîtie akwaîrîîria akwîra atî Jerusalemu îtîtawa nî mûnene wa Asîria.

¹¹Nî bwigîtue bwega ûrîa anene ba Asîria bathithîrîtie nthîgûrû ingî cionthe. Bûrîthûgaania noo buî bûkoonoka?

¹²Rîrîa biûjûjû biaakwa biarwîre na antû ba Gozani na ba Harani na ba Rezefu na ba Edeni barîa baatûûraga Telasari boonokerue nî mîrungu yaao?

¹³Nîatîa mûnene wa Hamathi kana mûnene wa Aripadi kana mûnene wa ntûûra ya Sefarivaimu kana mûnene wa Hena kana mûnene wa Iva baakarîre?’”

¹⁴Hezekia nî aajûkîrie barûga îîu kuuma kîrî atûmwa bau, na aramîthoma. Areeta nyomba ya MWATHANI na aramîtambûrûkia mbere ya MWATHANI.

¹⁵Hezekia araromba MWATHANI akiugaga,

¹⁶ “Gwe MWATHANI Mweneinya, Mûrungu wa Israeli; gwe ûkaragîra rûriga rwa ûnene ûrî îgûrû rîa akerubimu; gwe gwenka nîgwe Mûrungu wa moonene jonthe ja nthî, na nîgwe ûûmbîte îgûrû na nthî.

¹⁷Kinda gûtû gwaaku gwe MWATHANI wigue. Ingûra meetho jaaku gwe MWATHANI woone. Îtîkîra kwigua nteto cionthe irîa Senakeribu atûmanîte nacio cia kûthûmbia Mûrungu ûrîa ûtûûraga mwoyo.

¹⁸MWATHANI, nî mma anene ba Asîria nî bathirîtie gûkinyanga antû ba mîgongo yonthe amwe na nthîgûrû ciaao.

¹⁹Nî bathirîtie gwakîîria mîrungu ya nthîgûrû iu na mwanki nîûntû îtîîthagîrwa îrî mîrungu ya mma, nî mîrungu ya kwithithîria na njara ciaao bongwa ya mîtî na ya maiga.

²⁰Tontû bûû, gwe MWATHANI, Mûrungu weetû, nandî twonokie kuuma kîrî mûnene wa Asîria nîkenda moonene jonthe ja nthî jamenya atî gwe gwenka nîgwe MWATHANI.”

²¹Isaya mûtaana wa Amozi nî aatûmanîre kîrî Hezekia aramwîra atîrî, “MWATHANI Mûrungu wa Israeli ariuga ûjû: Tontû ûkûndomba nîûntû bwa Senakeribu mûnene wa Asîria rî,

²²ûjû nîu mbugîîte mantû jamwegiî: ‘Antû ba Zaiûni baagûkûthaa, ka bagûkûthûmbia; antû ba Jerusalemu ka bagûkûthekera ûmatûkîte.’

²³Nî wiijî nûû ûthûmbagia na ûkaruma? Nî wiijî nûû ûmenagîîria na ûgaikumîria? Nî Ûrîa Mûtheru wa Israeli!

²⁴Nî ûtûmaga nthûûmba ciaaku ciîja kûthûmbia MWATHANI. Uugaga, ‘Ngaarî ciaakwa cia ndwaa nî inyiingî, nî mbitîtie irîma birîa biraaja. Nî mbitîtie kîrîma kîa Lebanoni mwanka ngakîthiria; nî nkindîte mîtarakwa ya Lebanoni îrîa mîraaja buru, na mîthithinda ya Lebanoni îrîa mîthongi buru. Nî mbitîtie mwanka kûrîa antû batîkinyaga, ndaatonya Mwitûûne jwa Lebanoni jûrîa mûnene buru.

²⁵Nî mpînjîte ithima nthîgûrû ngeni na ndaanyua rûûjî ku. Nî nkinyangîte tûrûûjî tunthe twa Misri na magûrû jaakwa mwanka twanyaara.’”

²⁶“Gwe mûnene wa Asîria, gûtî nkaanja nî wigîtue atî, mantû jaja ndaajabangîre karaaja; jaja nkûthithia nandî ndaajathuranîîre tene. Nî ni ndaabangîre atî ûgaatûma ntûûra imbirigîre ciee ithûmba bia maiga,

²⁷nabo atûûri baacio bakaagaga inya, bakagwatwa nî ûguaa bakoombwa. Bakaraga ta imera rîrîa bikuuma muundeene, kana ta nyaki yumîte o rîo; bakaraga ta nyaki yumîte îgûrûgûrû rîa nyomba, îrîa îringagwa nî riûa, îkooma îtîrakûra.

²⁸Nî mbijî rîrîa ûnogokaga, na rîrîa uumagaraga, na rîrîa ûcokaga, na ûrîa ûng'entaga nîûntû bwaakwa.

²⁹Tontû bwa kûng'enta kûu ûng'entagîîra, na nîûntû nîmbigîtue nteto ciaaku cia rwikumio, ngaagwîkîra mûkang'i jwaakwa nyiûrû, na ngwîkîre rûgoti rwaakwa kanyua gaaku, nkûgarûre ngûcokie na njîra o îrîa weejîre nayo.”

³⁰“Rûrû nîru rwano rûrîa ngûkûa rwa ûrîa gûgaakarîka: mwaka jûjû, bûkaarîa birîa bigaakûra na bwaabio bitîaandi na mwaka jûu jûngî o ta u. Îndî mwaka jûrîa jûkathingata, bûkaanda irio na bûkethe; bûkaanda mîzabibû miuundeene yeenu na bûrîe maciaro jaayo.

³¹Najo matigari ja antû ba Juda jakairikîria kaîrî na jathegee.

³²Nîkwîthîrwa Jerusalemu gûgaatigara antû; Kîrîma kîa Zaiûni gûkeethîrwa kûrî na matigari. Kîaao kîa MWATHANI Mweneinya gîgaatûma mantû jau jakarîke.

³³“Ûjû nîu MWATHANI augîîte mantû jegiî mûnene wa Asîria: atîtonya ntûûreene îîjî, kana agera mûgwî ku, kana amiithûkîra arî na rong'o, kana oombaûmbania mûtaro amîcîgîîria.

³⁴O njîra îrîa eejîre nayo, nooyo agaacoka nayo, îndî atîtonya ntûûreene îîjî. Ûu nîu MWATHANI akuuga.

³⁵Nkaamenyeera ntûûra îîjî na mîonokie nîûntû bwa riîtwa rîaakwa, na nîûntû bwa nthûûmba yaakwa Daudi.”

³⁶Mûraîka wa MWATHANI nî eetîre kambîîne ya antû ba Asîria, arooraga antû ngiri îgana rîa mîrongo înaana na ithano (185,000). Rûkîîrî antû bagîûkîîra, no biimba akî beethîîre.

³⁷Senakeribu mûnene wa Asîria nî aumîre gûntû kûu, aracoka kwaao areeta gûtûûra Nineve.

³⁸Kûrakara atîrî, ntukû îmwe Senakeribu akîthaathagîria mûrungu jwaawe jûrîa jweetagwa Nisiroki arî kîûrûûne kîa mûrungu jûu, ataana baawe Adrameleki na Sharezeri nî baamûûragîre na rûchiû na baramatûka bareeta gwiciitha nthîgûrû ya Ararati. Esari-hadoni mûtaana waawe ûngî araambîrîîria kwaathana.