Read KIMERU BIBLE PROTESTANT EDITION Isa 38 Bible Online

Isa 38 - KIMERU BIBLE PROTESTANT EDITION bible

Isa 38

¹Îgiita rîu, Hezekia nî aajîrue mono mwanka areethîrwa arî akuî gûkua. Kîroria Isaya mûtaana wa Amozi nî eetîre kîrî we aramwîra, “MWATHANI ariuga atîrî, ‘Igae nîûntû ûgaakua, ûtîora.’”

²Rîu Hezekia aaragarûka areerekera rûthingo araromba MWATHANI.

³Arauga atîrî, “Ndakwerenca nandî gwe MWATHANI ûririkane ûrîa ntwîre ngwîtîkîtie na nkoro yaakwa yonthe na jarîa jonthe ntwîre kûthithia mbere yaaku.” Hezekia ararîra arî na kwithikîîra gûkûnene.

⁴Rîu MWATHANI aracoka araarîria Isaya aramwîra atîrî,

⁵“Îta kîrî Hezekia ûmwîre MWATHANI, Mûrungu wa abaagu Daudi ariuga atîrî, nî mbigîtue maromba jaaku na nî mboneete meethori jaaku. Ngaakwongeera mîaka îngî îkûmi na îtaano.

⁶Nkoonokia ntûûra îîjî na amwe naagwe kuuma kîrî mûnene wa Asîria.

⁷“Rûrû nîru rwano rûrîa ûûni MWATHANI ngûkûa rwa gûkûmenyithia atî nkaathithia ûntû bûu ndakwîra:

⁸Nî ûkwona kîrundu kîrîa kîonekaga riûa rîkîthûa nkinyone irîa ciaaki nî mûnene Ahazi? Ngaagîcokia nyuma makinya îkûmi.” Tontû bûû, riûa rîracoka nyuma, nakîo kîrundu kîu kîaarî nkinyoone iu kîracoka nyuma makinya îkûmi.

⁹Nyuma ya kworua mûrimo jûu jwamwajîtie, Hezekia mûnene wa Juda nî aandîkîre rwîmbo rûrû:

¹⁰Ndîraijî atî ndîgûkua ndeeta kûingîrwa gwa akuû matukû jaakwa jatîthiri ntûûra ku mîaka îrîa ntigeerie yonthe.

¹¹Ndîraugaga ntîona MWATHANI ndî nthî ya barîa barî mwoyo; ndîraugaga ntîkoroona antû kaîrî barîa batûûraga gûkû nthîgûrû.

¹²Gîkaro gîaakwa nî gîkûûri kîaritaritwa kîrî ni ta îema rîa mûrîîthi. Ûtûûro bwaakwa nî bûgiiti ta ûrîa nguû îgiitagwa kuuma mûrigiine jwa charani. Ndîrathûgaania atî Mûrungu nî aarî agûkinyithia ûtûûro bwaakwa mûthia.

¹³Ndaaraga gwikaîra mwanka gûgakea, nawe no kûmbunanga ta ngatûnyi. Ûtukû na mûthenya nthûgaanagia ûtûûro bwaakwa bûgûkinya mûthia.

¹⁴Ndîraga ta kînyoni; ndiikaagîra ta kîjea. Meetho jaakwa nî janogi nî gûtega îgûrû nkiugaga, Itû MWATHANI, nkwinya nî thîîna, nteethia!

¹⁵Îndî mbuge atîa? Nî aambîrîre ûrîa gûgaakarîka na nî athithîtie u. Nî mbagîte toro buru nîûntû bwa ûrûrû bûrîa bûrî nkoroone yaakwa.

¹⁶Itû MWATHANI, antû batûûraga nîûntû bwaaku, naani nî kîrî gwe gwenka mbîkîte mwoyo jwaakwa. Itû ncokeria inya yaakwa na ûreke ntûûre mwoyo.

¹⁷Mîthangîko yaakwa îkwaa ya gûnteethia Nîkwîthîrwa nî ûmbonoketie kuuma gîkuûne na wandekera meeyia jaakwa jonthe.

¹⁸Nîkwîthîrwa barîa bakuîte batîûmba gûgûkumia; barîa batî mwoyo batîûmba gûgûcokeria nkaatho. Barîa barî mbîrîreene batîûmba kwîrîgîra wîtîkîkua bwaaku.

¹⁹Îndî muntû ûrî mwoyo nîwe ûûmba gûgûkumia ta ûjû ngûgûkaatha naarua; ûu nîwe ûûmba kwîraga aana baawe atî gwe ûrî mwîtîkua.

²⁰MWATHANI akambonokia, naatuî tûkaamwinagîra na inanda bia ndigi ntukû cionthe cia ûtûûro bweetû tûrî kîûrûûne kîa MWATHANI.

²¹Îgiita rîu Isaya nî aarî akuuga atîrî, “Jûkieni nkûû inkonyorange bûmwake kîronda nîkenda oora.”

²²Hezekia nawe aarî akûûria, “Nîatîa nkaamenyamenya atî nkoomba gûûkîîra mbîte kîûrûûne?”