Read KIMERU BIBLE PROTESTANT EDITION Isa 40 Bible Online

Isa 40 - KIMERU BIBLE PROTESTANT EDITION bible

Isa 40

¹Boorereeni, boorereeni buî antû baakwa; nîu Mûrungu weenu akuuga.

²Arîria antû ba Jerusalemu na kanyua gakathongi ûbeere atî ndwaa yaao nî înthiru, na meeyia jaao nî jarekeri. Beere atî MWATHANI nî arîîkîtie kûbakanûkia bwega nîûntû bwa meeyia jaao jonthe, na nî arîîkîtie kûbarekera meeyia jaao jonthe.

³ Kajû nî gagûtûmîîria gakiugaga atîrî, “Thuranîreni njîra ya MWATHANI bûûrîîne; thithîrieni Mûrungu weetû njîra înene na inthongi kûu rwanda.

⁴Mîguuru yonthe îkariindwa, na irîma na tûrîma bithetherwe bing'ananîrue. Kûrîa kûrî na tûbari gûkaang'ananîrua, na kûrîa kûtîbuugi kûthongomue.

⁵Rîu ûkumio bwa MWATHANI bûkaaguûrwa, na antû bonthe bagaacionera, nîkwîthîrwa nî MWATHANI wengwa uugîîte mantû jau.”

⁶ Kajû kariuga, “Tûmîîria!” Maani nkooria, “Nîatîa ngatûmîîria mbuge?” “Uga antû bonthe nî ta nyaki, na ûthongi bwaao bunthe nî ta maûa ja kîthaka.

⁷Nyaki nooka înyaaraga, na maûa jakoorûrûka rîrîa MWATHANI aatûma ruuo kîrî bio; Gûtî nkaanja antû nî ta nyaki.

⁸Nyaki nî înyaaraga, najo maûa jakoorûrûka; îndî rûteto rwa Mûrungu weetû rûgatûûra kenya na kenya.

⁹Gwe Zaiûni, itia kîrîmeene îgûrû ûtûmîîrie nteto injega irîa ûrî nacio; gwe Jerusalemu, tûmîîria na kajû gakanene nteto injega irîa ûrî nacio; tûmîîria na kajû gakanene na ûgákîra. Îra ntûûra cia Juda atîrî, ‘Mûrungu weenu nî eejîte!’

¹⁰ MWATHANI Mûrungu eejîte na inya yonthe, akaathana na inya înene. Eejîte arî na îtuui; areterete antû baawe biewa.

¹¹ Akaamenyeera antû baawe o ta ûrîa mûrîîthi ameenyagîîra ng'ondu ciaawe. Agacokanîîria tûng'ondu amwe, agaatûkamata na njara ciaawe na atongagîîrie ng'ondu irîa iciere mpaara.

¹²Nûû ûûmba gûtaa rûûjî runthe rwa îria na rûî rwaawe? Nûû ûûmba gwîkîra îgûrû rîonthe njareene yaawe rîkang'anîîra? Kûrî we ûûmba kûthima mûthetu jwa nthîgûrû junthe ûrîa jûng'ana? Kûrî we ûûmba kûthima ûrito bwa irîma na tûrîma tûnthe?

¹³ Nûû ûûmba kwîra Roho wa MWATHANI ûrîa abuîrîte kûthithia? Kana amwaa kîrîra na amûritana?

¹⁴Nûû MWATHANI aaromba kîrîra nîkenda oomîa na amenya mantû? Nûû wamûritana kûthithia mantû ja îota kana amûritana kwîthîrwa arî na ûmenyo, na amwoneeria ûrîa oomba gûciûra mantû?

¹⁵Atîrî, kîrî gwe mîgongo yonthe nî ta ntanta îmwe ya rûûjî mûtûngiine; nî ta karûko karîa gatigagwa kagwete ratiri. Kîrî gwe, tûthîgûrû tûrîa tûcîgîîrîîtue nî îria nî ta tîîri îrîa îgûrûkagua nî ruuo.

¹⁶Kîrî gwe, mîtî yonthe ya Lebanoni îtîûmba kûng'ana ya gwakia mwanki kana nyomoo cionthe cia mwitû jwa Lebanoni ing'ana cia gûkûritîra kîgongwana.

¹⁷Kîrî gwe, mîgongo yonthe tî gîntû; amîtaraga îrî gîntû gûtîkîo na kîa ûtheri.

¹⁸ Nûû îndî Mûrungu oomba kûng'ananua nawe? Nîmbi oomba kûng'uanithanua nayo?

¹⁹Nî mûrungu jwa mûng'uanano? Arî, nîûntû nî muntû ûkerûraga chuuma akajûthithia ûrîa akwenda, akajûgemia na thaabu na fetha bwa îgûrû.

²⁰Muntû mûthîîni akeenda kûgîa na mûrungu jwaawe, ajûkagia mûtî jûmûûmîîru, na agacwa mûtea ûmûûme akamwajîra mûrungu jwa mûng'uanano jûrîa jûtîkwebaeba.

²¹Ka bûtiijî? Ka bûtaigua? Ka bûtîtwîre bwîragwa kuuma o kîambîrîria? Ka bûtaciûkîrwa kuuma rîrîa nthî yoombîrwe?

²²MWATHANI nîwe ûkaraga îgûrû rîa matu jamairû, na kîrî gwe, atûûri ba nthî nî ta mpandi. Nîwe ûtambûrûkîtie îgûrû ta gîtambaa, aarîamba ta îema rîa gûtûûraga.

²³Nîwe ûtûmaga anene boorîria, na akaeethia athani ba nthîgûrû gîntû kîa ûtheri.

²⁴Bakaraga ta imera bia mûaando o rîî biambîrîria kuuma mîri; akabiua na mîrukî yaawe bikooma, naru ruuo rûkaurutana rûkabikamata ta mauuti.”

²⁵Mûrungu Ûrîa Mûtheru arîûria atîrî, “Nûû îndî bûûmba kûng'uanithanua nawe kana kuuga nî ng'uaneene nawe?

²⁶Ciûkieni meetho bwa îgûrû bwoone: Nûu ûûmbîte biu bionthe bûkwona?” No Ûrîa ûbitongagîîria bionthe, na ûbiijî na mariîtwa jaabio kîmwe gwa kîmwe. Tontû bwa inya yaawe înene na ûûmbani bwaawe, gûtîkîo kîaabio gîtî o.

²⁷Buî nchiarwa cia Jakubu; buî antû ba Israeli; nîmbi îtûmaga bûnung'una bûkiugaga, “MWATHANI atîonaga mantû jeetû, kana atî Mûrungu weetû atîtindanagîra kinya twathithîrua ûrîa gûtîagîrîte?”

²⁸Ka-bûtiijî? Ka bûtaigua? MWATHANI nîwe Mûrungu ûrîa ûtûûraga kenya na kenya, ûrîa woombîre nthîgûrû yonthe. Atînogaga kana anogoka, na ûmenyo bwaawe bûtîûmba kûmenyeka.

²⁹Nî oombithagia barîa banogi, na akoongeera inya kîrî barîa batî na inya.

³⁰Kinya antû babeethî nî banogaga na bakathirîrwa nî inya, îî, antû babeethî bakagwa nthî nî kwaga inya.

³¹Îndî barîa beekaga wîrîgîîro bwaao kîrî MWATHANI, bakeerûîrua inya; bakaabuurûkaga na mathagu ta ndiiû; bakaamatûkaga batîkûnoga; bageetaga batîkûthirîrwa nî inya.