Read KIMERU BIBLE PROTESTANT EDITION Isa 41 Bible Online

Isa 41 - KIMERU BIBLE PROTESTANT EDITION bible

Isa 41

¹Kireni bûnthikîîre buî antû ba nthîgûrû cia kûraaja; gîteeni inya buî antû ba mîgongo. Nî beejaîje akuî rîu baarie tûthûraneeni amwe tûtuee nî ûrîkû ûrî ûûmeene.

²Nûû wookaûkîrie ûrîa weejîre kuuma bwa gaiti, ûrîa ûûmbanaga ndweene kûrîa kunthe eetaga? Anenkanagîra mîgongo njareene ciaawe, agakinyangîra anene nthî tîîriine Akabatemaga na rûchiû rwaawe bagakara ta tîîri, akabarathanga na mîgwî yaawe bakanyagana ta mauuti.

³Eenganaga nabo kinya gûntû ataakinya kaîrî, na gûtîkîo kîmûringithagia.

⁴Nûû waabangîre mantû jau na aajathithia? Nûû ûbangaga jarîa jakarîkaga kuuma rîrîa nthîgûrû yoombîrwe? Nî ni MWATHANI; nî ni ndaarî o kîambîrîriene, na kinya mûthia nooni nkeethîrwa ndî o.

⁵Antû ba nthîgûrû cia kûraaja nî bagwati nî ûguaa boona mantû jarîa nthithîtie; barîa batûûraga matura nthî ka bakwinaina. Tontû bûû, nî barîîkîtie kwîja akuî.

⁶Bonthe barîteethania o muntû akîîraga ûngî, “Gîa na inya!”

⁷Mûbundi wa mbaaû arîûmîîria mûturi wa thaabu, nawe mûturi wa chuuma akoomîîria ûrîa ûthithagia mîng'uanano ya chuuma, akamwîra mûng'uanano jûrîa aathithia, “Nî jûmûthongi”; nabo bakajûangîîra na mîchumaarî ûrîa jûtîûmba kwebaeba.

⁸ “Îndî buî antû ba Israeli, buî nthûûmba ciaakwa; buî rûrîîjo rwa Jakubu, barîa ndaathuurîre; buî nchiarwa cia Abrahamu, mûcoore waakwa;

⁹buî barîa mbûthûranîtie kuuma nteere cionthe cia nthîgûrû, ndaabûcokanîîria kuuma ituri bionthe bia nthî; ga nkûbwîra atîrî, ‘Bûî bûrî nthûûmba ciaakwa. Nî mbûthuurîte, na ntîkorobûta.’

¹⁰Tontû bûû, bûgáakîreni, nîkwîthîrwa ndî amwe naabuî; bûkaamakeni nîûntû ndî Mûrungu weenu. Nkaabwîkîra inya na mbûteethie; nkaabûgwatîîra na njara yaakwa ya ûrîo mbûe ûûmbani.

¹¹Atîrî, barîa bonthe bathûûri nî buî bakoombwa buru bacokerwe nî nthao; barîa barûjaga naabuî bakaathîrua boorîrîe buru.

¹²Barîa bacindanaga naabuî, bûgaacûaga ûrîa beetîre bûkaaga; barîa barûjaga naabuî bakoorîria buru.

¹³Nîkwîthîrwa ûûni MWATHANI Mûrungu weenu, nkaabûtongagîîria na mbûmenyagîîre. Nî ni ningwa nkûbwîra, ‘Bûgáakîreni, nkaabûteethia.’”

¹⁴Buî nchiarwa cia Jakubu; kinya bwëethîrwa bwagîte inya ta kang'inyo bûgáakîreni! Bûgáakîreni buî antû ba Israeli! Nkaabûteethia. Nîu MWATHANI akuuga; Ûrîa Mûtheru wa Israeli nîwe Mwonokia weenu.

¹⁵Ngaatûma bûkare ta kîthii gîkîerû na kîrî na maîgo jamoogî; naabuî bûkaathia irîma bûbithirie; na bûkinyange tûrîma twee tîîri.

¹⁶Bûkaabiûûnga ta mauuti biîtithue nî ruuo, nakîo kîbuubani kîbikamate kîbite kûraaja. Naabuî bûkaagwîragua nîûntû bwa MWATHANI; bûgaakenagîra Ûrîa Mûtheru wa Israeli.

¹⁷“Barîa nkîa na barîa barî na thîîna baacwa rûûjî, baarwaga, kana ndûûme ciaao ciomagara nî nyoonta rî; ûûni MWATHANI nkaabeetîka. Ntîbarekeeria ûûni Mûrungu wa Israeli.

¹⁸Ngaatûma ndûûjî itûrîke tûrîmeene gûntû gûkûûmo, na ithima bitûrîke mîuroone. Nkaagarûra rwanda rûûjûre rûûjî, ntûme kûrîa kûng'aarûku kûûjûre ithima.

¹⁹Nkaaumithia rwanda mîtî ya mîtarakwa na mîgaa na makûri na mîzeituni. Nkaumithia gûntû gûkûûmo Mîkîma na Mîbaaû, na Mîbaaû-maguta.

²⁰Antû boona mantû jau, bakaathûgaania bwega na baicokere. Nabo bagaaciûkîrwa, atî nî inya ya MWATHANI îtûmîte jau jakarîka; bakaamenya atî Ûrîa Mûtheru wa Israeli nîwe ûjathithîtie.

²¹MWATHANI ariuga ‘Njûûni bwiteteere.’ Mûnene wa rûrîîjo rwa Jakubu ariuga ‘Onanieni ûûma bweenu.’”

²²Twîreni mantû jarîa jagaakarîka nyumeene; tûtaûrîreni jarîa jarîkîtie gûkarîka, tûûmbe gûciûkîrwa na kûjeetîkia; tûrorerie mantû jarîa jakoonora nyumeene.

²³Twîreni mantû jarîa jagaatwîjîîra kuuma nandî, gwîta na mbere nîkenda twîtîkia atî bûrî mîrungu; thithieni ûntû bûbwega kana bûbûûî bûtûmakie nabu.

²⁴Ûrîa kûrî nî atî buî bûrî gîntû gûtîkîo, na gûtî ûntû bûûmba kûthithia. Barîa babûthaathagia batîbuîri nî gûciîta antû.

²⁵“Nî mbûkaûkîtie muntû kuuma bwa ûrîo, nawe akeeja aumîte bwa gaiti na nî ambîtîkîtie. We agaakinyangîra athani nthî ta ntaka, kana ta ûrîa mûûmbi wa nyongû akinyangaga mûthetu jwa yûmba.

²⁶Nûû watûroreria ûntû bûu mbereene? Këethîra kûrî we watwîra bu mbere ya bûkarîka, tûrîngîuga atî nî aarîtie ûûma. Îndî gûtî wa cieenu waroria ûntû bûu na gûtî we wabûgweta; gûtî ûntû bwaigîîwua bwarîîtie.

²⁷Ûûni MWATHANI nî ni ndaamenyithîrie Zaiûni nteto injega o mbere; nî ni ndaatûmîre mûtûmwa kîrî antû ba Jerusalemu eeta kûbeera atî antû baao nî baanîte.

²⁸Kîrî mîrungu îîjî ya mîng'uanano, ndîtega nkoona atî gûtî ju jûûmba kweejana mataaro; gûtî ju mpûûmba kûûria kîûria jûncokeria.

²⁹Ûrîa kûrî nî atî yonthe nî ya ûrongo, na gûtî ûntû yûmba kûthithia; nî mîng'uanano o ûu ya ûtheri.”