Read KIMERU BIBLE PROTESTANT EDITION Isa 42 Bible Online

Isa 42 - KIMERU BIBLE PROTESTANT EDITION bible

Isa 42

¹ MWATHANI ariuga ûjû, “Atîrî, tîîjî nthûûmba yaakwa îrîa mbîkîrîte inya; nîyo îrîa nthuurîte, îrîa îngwîragia. Nî mwîkîrîte Roho waakwa, na nîwe ûkaareeta ûûma kîrî mîgongo yonthe.

²Atîtua kwaragia na kajû gakanene kana aigîîwua akîringa gîtuma njîreene.

³Atîtua kûgiitanûraga kinya kamûnyaki gakaunîku kana ooria kamwanki karîa gatîgwakana bwega. Nî mma agaatûma ûûma bwoneke.

⁴Atînoga kana akua nkoro atîreetete ûûma nthîgûrûûne. Nthîgûrû cia kûraaja igeetîkia Waatho bwaawe.”

⁵ Ûjû nîu Mûrungu, MWATHANI akuuga, ûrîa woombîre îgûrû na ararîîka ûrîa rîkari; ûrîa woombîre nthîgûrû na into birîa birî ku; ûrîa ûeejaga antû na biûmbe birîa biîtaîtaga ku mwoyo;

⁶ ariuga, “Nî ni mbwîrîte bûthithagie ûrîa kwagîrîte. Ntwîre mbûtongeeretie mbûmenyeerete; nî buî nthithîtie naabuî kîrîkanîro gîaakwa na antû, na nî buî mpeethetie kîonanîîria kîrî mîgongo îngî.

⁷Nîbuî bûkaarugûra barîa batîonaga meetho; nî buî bûkaarugûrîra barîa barî ncheera bûbaumagarie werûûne.

⁸Nî ni MWATHANI; rîu nîrîo riîtwa rîaakwa. Gûtî we mpûûmba kûreka ajûkia ûkumio bwaakwa; ningî ntîûmba kûreka mîrungu ya mîng'uanano îkumagua antû aakwa.

⁹Atîrî, jarîa makûrû nî jarîîkîtie gûkûrûka; nandî nî jameerû nkûbwîra; ndîenda kûbwîra jo mbere ya jakarîka.”

¹⁰Inîreni MWATHANI rwîmbo rûrwerû; mûkumieni mwanka ituri bia nthî! Nî akumue kûu îrieene, akumue kinya nî biûmbe birîa bikaraga ku; nî akumue nthîgûrû cia kûraaja, akumue nî atûûri baacio.

¹¹Nî akumue kûu rwanda; nî akumue na kajû gakanene ntûûreene irîa irî ku; mûkumieni buî atûûri ba Kedari! Atûûri ba Sela nî bamwinîre na kûgwîrua, bagîtûmagîîria kuuma irîmeene îgûrû.

¹²Antû nî bakumie MWATHANI, batûmîîrie nkuma yaawe nthî cia kûraaja.

¹³MWATHANI eejîte ta nchamba îrî inya; aumagarîte na marûrû ta muntû wîtîte ndweene; arîkûrûka, akagondoka, mwanka anthû baawe bakamûkîra.

¹⁴MWATHANI ariuga atîrî, “Ntwîre îgiita rîrîraaja nkiri ntwîre ndiigwete ntîkûgamba. Îndî nandî nkauga mbu; ngaikaîra ta mûka ûkûeewa mwana.

¹⁵Nkaaragania irîma na tûrîma buru, na mpûmie mîtî yonthe amwe na nyaki. Nkaawithia ndûûjî ciee nthî înjûmo, na nyaarie ithima buru.

¹⁶Ngaatongeeria atumuumu baakwa mboonie njîra batiijî; mbeetithîrie njîreene bataakinya kaîrî. Nkaabagarûrîra muundu jûtuîke weerû, na ntûme kûrîa kûrî na matiinkî kûng'ananîrie. Ûu ndauga, nîu nkaathithia, na ntîbatiganîria.

¹⁷Nabo barîa beetîkîtie mîrungu ya mîng'uanano; barîa bamîîraga, ‘Buî nî buî mîrungu yeetû’ bakoombwa buru, bacokerwe nî nthao.”

¹⁸MWATHANI ariuga, “Thikîîreeni buî itaigua! Raithîrieni bwega buî atumuumu!

¹⁹Nûû ûtumuumari ta nthûûmba yaakwa Israeli. Nûû ûtî matû ta mûtûmwa waakwa ûrîa ntûmîte? Nûû ûtumuumari ta ûrîa nthuurîte? Nûû ûtumuumari ta nthûûmba ya MWATHANI?

²⁰Jarîa oonete nî jamaingî, îndî atiiritanaga najo; nî aigîtue na matû îndî atîathîkaga.

²¹MWATHANI nîka aaciendeere wengwa kweejana Waatho bwaawe nîkenda akumithagua nîûntû we nî ûmwagîru.

²²Îndî nandî antû baba nî barîîkîtie gûkinyangîrwa ndweene na into biaao biatawa; bonthe buru nîbarîîkîtie kûgwatwa na baaiingîrwa ncheera. Nî batuîkîte ba kûthaakagîrwa o ûu na gûtî we wa kûbatunyûkia; nî batuîkîte ba gûtaagwa o ûu na gûtî we wa kuuga, ‘Nî bacokue.’

²³Kûrî we wa cieenu ûkaaigua mantû jaja? Bûkaajaigua na bûjeekîre nkoroone kuuma nandî gwîta na mbere?

²⁴Nûû warekererie nchiarwa cia Jakubu njareene cia eenyangia? Nûû wanenkanîîre Israeli kîrî atuunyani? Anga tî MWATHANI ûrîa beeîîrie; ûrîa baaregere kûthingata na bararega kwathîkîra Waatho bwaawe?

²⁵Kîu nîkîo gîatûmîre abatûrîkîria mûthûûro jwaawe na abareetera ndwaa cia kûbakanûkia. Mûthûûro jwa MWATHANI jwaabakirimanîrie bonthe ta mwanki, îndî bataaciûkîrwa, jûrabaîîthia, îndî bataatindanîîra.”