Read KIMERU BIBLE PROTESTANT EDITION Isa 43 Bible Online

Isa 43 - KIMERU BIBLE PROTESTANT EDITION bible

Isa 43

¹Îndî nandî MWATHANI ûrîa ûbûûmbîte buî nchiarwa cia Jakubu; ûrîa ûtûmîte bwîthîrwa bûrî o buî antû ba Israeli, ariuga ûjû: “Bûgáakîreni, nîkwîthîrwa nkaabwonokia; nî mbwijî bûbwega buru, na bûrî baakwa.

²Kinya bwagiitanîîria îrieene, nkeeethîrwa ndî amwe naabuî; ningî kinya bweetîîra ndûûjîîne itîbûkamata. Bwagiitanîîria mwankiine, bûtîya; kinya bweetîîra rûmûrîîne rwa mwanki rûtîbûîîthia.

³Nîkwîthîrwa ni nî ni MWATHANI Mûrungu weenu, Ûrîa Mûtheru wa Israeli, ûrîa ûbwonokagia. Nkaanenkanîra Misri mbûkûûre nayo; nkaanenkanîra Ethiopia na Seba antû eenu.

⁴Tontû buî bûrî ba bata mono kîrî ni, na nîmbûeete gîtîîo na nkabwenda rî, nkaanenkanîra antû mbûkûranie nabo; nkaanenkanîra mîgongo îngî antû eenu.

⁵Bûgáakîreni, nîkwîthîrwa ndî amwe naabuî; nkoothûrania antû beenu, mbacokanîîrie kuuma bwa gaiti na bwa rûgûrû.

⁶Nkeera nthî cia bwa-ûrîo atîrî, ‘Barekeerieni!’ Na mbîîre cia bwa-ûmotho atîrî, ‘Bûkaabagiria!’ Rekeerieni nthaka ciaakwa ciîeje kuuma nthî cia kûraaja; rekeerieni aarî baakwa beeje kuuma nteere cionthe cia nthî;

⁷bonthe barîa barî baakwa barîa mpûûmbîte nîûntû bwa ûkumio bwaakwa.”

⁸MWATHANI ariuga atîrî, “Antû baakwa nî baumagarue; barî meetho îndî bationaga; bau barî matû îndî batiigagua.

⁹Mîgongo yonthe nî îkuîrîîrie; antû bonthe nî boothûrane. Nî mûrungu jûrîkû jwaao jwaroria mantû jarîa jagûkarîka nandî; kana nî jûrîkû jûûmba kwîrana mantû jarîa jagaakarîka nyumeene? Mîrungu yaao nî îreete akûûjî baayo nîkenda bakûûjîîra nteto ciaayo bauga nî cia mma.

¹⁰MWATHANI arîîra antû ba Israeli atîrî, ‘Buî nî buî akûûjî baakwa; nî buî nthûûmba ciaakwa irîa nthuurîte, nîkenda bûmenyana naani na bûmbîtîkîa na bûciûkîrwa atî ni nî ni Mûrungu wengwa. Mbere kana nyuma gûtî mûrungu ûngî; gûtî we weethîrwa arî o, na gûtî we ûkoroethîrwa arî o.’

¹¹Ûûni nî ni MWATHANI, na gûtî mwonokia ûngî weenu tiga ni.

¹²Nî ni ndaarorerie ûrîa gûgaakarîka, ndîrabwîra na ndîrabwonokia. Gûtî mûrungu jûngî jweethîrwa jûrî amwe naabuî, na buî bûrî akûûjî baakwa,” nîu MWATHANI akuuga.

¹³“Nî ni Mûrungu, na ngaatûûra ndî Mûrungu. Gûtî we ûûmba kûûmbana îgûrû rîaakwa, na bûrîa nthithîtie, gûtî we ûûmba kûbûgarûra.”

¹⁴MWATHANI Ûrîa Mûtheru, Mwonokia wa Israeli ariuga atîrî, “Ngaatûmana Babiloni nîûntû bweenu na ntharie mpingîro ciaao cionthe. Nacio nkuuro cia Ababiloni ikaathira ciee irîro.

¹⁵Nî ni MWATHANI, Mûrungu weenu Ûrîa Mûtheru; nî ni ndaabûûmbîre buî antû ba Israeli, na nî ni mûnene weenu.”

¹⁶Ûjû nîu MWATHANI akuuga, “We ûrîa ûthithagia barabara îrieene, agatema njîra rûûjîre rûrûnene.

¹⁷We ûrîa ûrûjaga na njûûrî îrî na ngaarî cia ndwaa na mbarathi na nchamba cia ndwaa akamîkinyangîra nthî îtîûkîîre kaîrî; akamîthiria buru ta ûrîa taawa yoragua îgatiga kûmûrîka.

¹⁸Ûrîrueni nî mantû ja karaaja na bûtîkamakue nî jarîa jarîkîtie gûkûrûka.

¹⁹Tegeeni ûntû bûbwerû bûrîa nkûthithia; kinya nandî nî bwambîîrîtie kûthithîka ka bûtîkûbwona? Nkaathithia barabara rwanda na mbîkîre ndûûjî ku.

²⁰Kinya nyamû cia kîthaka igaampa gîtîîo; mbîrwa na ndwîgî îgankaatha, nîûntû bwa gwîkîra ndûûjî rwanda gûntû gûkûûmo. Nkaathithia ûu nîkenda antû baakwa barîa nthuurîte boona rûûjî rwa kûnyua;

²¹antû baakwa barîa ndaaithithîîrie bagaankumagia na ndwîmbo.”

²²MWATHANI ariuga atîrî, “Îndî buî nchiarwa cia Jakubu bûtînthaathagia; nî bwanogere nî ni buî antû ba Israeli.

²³Bûtînditagîra ng'ondu cieenu bûnkumithagia na igongwana bia gwakîîria; naani ntîbûnogagia na kûbwîtia igongwana kana ubaani.

²⁴Bûtîngûragîra ubaani îrîa îeeraga bwega na mbeecha cieenu kana bûnyiria mathuunya ja igongwana bieenu. Buî no mûrigo bûnkamatithîtie jwa meeyia jeenu mwanka bwanogia na weeyia bweenu.

²⁵Îndî ni nî ni Mûrungu weenu; mpangûraga meeyia jeenu na gûciendera, na ntîcoka kûririkana meeyia jeenu.

²⁶Njûûni tûgambe; ciarîrîrieni mwanka bûmbonie atî bûtî na maatia.

²⁷Abaagu wa mbere nî eeîîrie nabo atongeeria beenu bararega kûmbathîkîra.

²⁸Anene beenu nî beekîîre kîûûrû gîaakwa îgi, nîûntû bûu ndîrarekeeria nchiarwa cia Jakubu irathirua, ndîreekîrithia Israeli nthao.”