Read KIMERU BIBLE PROTESTANT EDITION Isa 45 Bible Online

Isa 45 - KIMERU BIBLE PROTESTANT EDITION bible

Isa 45

¹Ûjû nîu MWATHANI akwîra mûnene Koreshi ûrîa athuurîte: “Ngaagûtongeeria nkûee ûûmbani kîrî mîgongo, naagwe ûgaatuunya anene waathani. Ngaakûrugûrîra mîrango, na mpingîro cia ntûûra itîgiria ûkûrûka ndeene.

²Ngeeta ndî mbere yaaku ngîkwaraganagîria irîma. Nkaunanga mpingîro cia îturutia na mbunjangie iburi biaacio bia chuuma.

³Ngaakûa mîthithû îrîa îîki ya mootonga na nkwithûrîre into bia goro birîa biithi, nîkenda ûmenya atî ûûni nî ni MWATHANI, Mûrungu wa Israeli, nî ni ningwa ngwîtîte na riîtwa rîaaku.

⁴Ngûtaarîte nîûntû bwa nthûûmba ciaakwa, nchiarwa cia Jakubu; nîûntû bwa antû ba Israeli barîa ndiithuurîrîte. Ngwîtîte na riîtwa rîaaku na nkaarîkumithia kinya këethîra gwe ûtîmbijî.

⁵Nî ni MWATHANI wengwa, na gûtî Mûrungu ûngî tiga ni. Ngaagwîkîra inya kinya këethîra gwe ûtîmbijî.

⁶Nkaathithia ûu nîkenda antû bonthe, kuuma mûthia jwa bwa Gaiti mwanka jwa bwa Rûgûrû bamenya atî gûtî Mûrungu ûngî tiga ni. Nî ni MWATHANI na gûtî MWATHANI ûngî.

⁷Nî ni nthithîtie weerû na ndathithia muundu; nî ni ndeetaga wega na nkareeta ûûî; nî ni MWATHANI ûrîa ûthithagia mantû jaja jonthe.

⁸Ûûmbani nî bwîtîke kuuma îgûrû; matu nî jaurithie waagîru ta ngai. Nthîgûrû nî îrugûke, wonokio buumîre; nî îrugûrîre îota kinya rîo rîonekane. Ni MWATHANI nî ni nkathithia ûntû bûu.”

⁹ Wûi kîrî ûrîa ûcindanaga na Mûûmbi waawe; nî ta nyongû ya yûmba îgîcindana na mûûmbi wa nyongû. Ka mûthetu jwa yûmba jûûragia ûrîa ûkûjûûmbaûmbania, “Nîmbi ûkûûmba?” Kana jûmwîra, “Ûtîreekîra mîgwati?”

¹⁰Gûtî mwana ûûragia îthe, “Nîmbi îgûtûma wenda kûndeeta nthîgûrûûne?” Kana ooria ng'ina, “Nîmbi îgûtûma ûnciara?”

¹¹Tontû bûû, MWATHANI, Ûrîa Mûtheru wa Israeli na Mûûmbi waao, arîûria atîrî, “Ga-kûrî we ûûmba kûmbûûria kîûria kegiî jarîa jagaakarîka kîrî aana baakwa, kana ambîîra ûrîa nthithia na kîrîa mpûûmbîte?

¹²Nî ni ndoombîre nthîgûrû, na nî ni ndoombîre antû barîa barî ku. Nî ni ndaathithîrie îgûrû ûu rîkari na nî ni mbathaga into birîa birî ku bionthe.

¹³Nî ni mbûkaûkîtie Koreshi nîkenda athithia mantû ja waagîru, naani nkaamûtongeeria mantûûne jonthe. Nîwe ûgaaka ntûûra yaakwa na arekeerie antû baakwa kuuma kîthamîrioone. We atîthithia ûu nîkenda aeewa kîewa kana îrîi,” Nîu MWATHANI Mweneinya akuuga.

¹⁴MWATHANI ariuga atîrî, “Ûtonga bwa Misri na into bia goro bia Ethiopia bikaa bieenu, ningî antû barîa baraaja ba Sheba bakaabûthingata baee beenu. Bakeeja kîrî buî batheeki na mînyororo babûturîrie maru. Bakaabwerenca bakiugaga, ‘Mûrungu weenu nîwe Mûrungu wa mma, na gûtî mûrungu ûngî tiga we.’”

¹⁵Nî mma gwe nîgwe Mûrungu na Mwonokia wa Israeli, gwe Mûrungu ûrîa ûtîonagwa na meetho.

¹⁶Barîa bonthe bathithagia mîrungu ya mîng'uanano bagaacokerwa nî nthao; bakaarigicanua beengwe barî amwe.

¹⁷Îndî Israeli îkoonokua nî MWATHANI, na wonokio bwaayo bûgaatûûra kenya na kenya; Israeli îtîkorocokerwa nî nthao kaîrî.

¹⁸MWATHANI ûrîa woombîre îgûrû nîwe Mûrungu. MWATHANI ûrîa woombîre nthîgûrû nîwe ûmîthithîtie ûu îkari. Ataamîûmbîre atîkûmenya ûrîa akûthithia, aamîûmbîre nîkenda îtûûragwa. Nîwe ûkuuga, “Nî ni MWATHANI, na gûtî Mûrungu ûngî tiga ni.

¹⁹Ntîaragia ndiiciithîte muunduune; mbitha mworoto jwaakwa, nteerîre nchiarwa cia Jakubu încwee ntîkûmenya ûrîa nkûthithia. Ni nî ni MWATHANI na mbaragia ûûma, mbugaga ûrîa kûrî.”

²⁰MWATHANI ariuga atîrî, “Buî barîa bûtigarîte kîrî antû ba mîgongo ûthûraneni kîrî ni. Barîa batindaga bakamatîte mîrungu yaao ya mîng'uanano bakarombaga mîrungu îtîûmba kûbateethia kana îbonokia.

²¹Njûûni bwigambîîre; ambeni bwaranîrie bwingwa bûciûrie atîrî, Nûû warorerie mantû jaja karaaja? Nûû waugîre jagaakarîka? Tî ûûni MWATHANI ndaajarorerie? Menyeni atî gûtî Mûrungu ûngî tiga ni; Gûtî Mûrungu ûngî wa mma na wonokanagia tiga ni.

²²Buî antû ba nthîgûrû yonthe, mbîtîkieeni naabuî bûkoonokua. Nîkwîthîrwa ni nî ni Mûrungu, na gûtî Mûrungu ûngî tiga ni.

²³ Bûrîa mbarîtie na kanyua gaakwa nî bwa mma, no mwanka bûkarîke. Nî ni ningwa nciîtîtie ndauga atî, ‘Muntû wonthe no mwanka anturîrie maru; muntû wonthe no mwanka auge na kanyua kaawe atî nî ni MWATHANI.’

²⁴Antû bakaaragia bwaakwa bakauga atîrî, ‘Nî MWATHANI wenka mwene waagîru na ûûmbani.’ Barîa bonthe batwîre bamûthwîre bakeejaga kîrî we barî na nthao.

²⁵Nchiarwa cionthe cia Israeli îkoombana nîûntû bwa MWATHANI na igîe îgweta.”