Read KIMERU BIBLE PROTESTANT EDITION Isa 46 Bible Online

Isa 46 - KIMERU BIBLE PROTESTANT EDITION bible

Isa 46

¹“Mûthia jwa Beli na Nebo, mîrungu ya Babiloni nîjûkinyîte; mîrungu yaao ya mîng'uanano nî ta mîrigo îkamati nî ntigiri na ng'ombe; bamîkamataga îkabanogia ta ûrîa nyomoo înogagua nî mîrigo.

²Îbaritûagîra bageeta bakunkuîte na batîûmba gûciaûra mûrigo jwaayo, nooka bacionaga barî ûkomboone.

³Nthikîîreeni buî nchiarwa cia Jakubu, mbigueeni buî matigari jonthe ja antû ba Israeli. Ntwîre mbûkamatîte kuuma wana bweenu; ntwîre mbûmenyeerete kuuma rîrîa bwaaciarîrwe.

⁴Kinya bwatindira, nooni Mûrungu weenu; kinya bwauma mbuî, ngeeta na mbere kûbûkamata. Nî ni ndaabûûmbîre na ntîremwa nî buî; ngeeta na mbere kûbûkamata na nkaabwonokia.

⁵Ga kûrî Mûrungu ûngî bûûmba kûng'uanania nawe, nûû ûngî ûkari taani kana ûng'aneene naani?

⁶Bamwe baritaga thaabu na fetha biondoone biaao, bakaithima na ratiri, bakarîa mûturi, akabathithîria mûrungu jwa mûng'uanano nacio, nabo bakajûturîria maru, bakajûthaathayia.

⁷Bajûûkagîîria, bakajwîkîra ituro biaao, bakajûkamata bakajûkinyithia antû arîa jûthithîrîtue a gûkaraga, na jûtîûmba kuumauma arîa jwîki. Kinya muntû akajwarîria, jûtîmûcokagîria kana jûmûrita thîîneene.

⁸Ririkaneni mantû jaja na bûthûgaanie bwega; jaririkaneni buî eeyia.

⁹Ririkaneni mantû jarîa jathithîkîte kuuma karaaja; menyeni atî ni nî ni Mûrungu na gûtî mûrungu ûngî tiga ni; Nî ni Mûrungu na gûtî ûngî ûûmba kûng'uananua naani.

¹⁰Nî ni ndaugîre o mbere jarîa jagaakarîka mûthieene; nî ni ndaarorerie mantûûne jau karaaja mbere ya jakarîka, ndîrauga, ‘Jarîa mbarîtie no mwanka jakarîke, na mîbango yaakwa no mwanka yûjûre.’

¹¹Nîmbîtîte nderi kuuma bwa Gaiti; nîmbîtîte muntû wa kûûjûria mîbango yaakwa kuuma nthî ya kûraaja. Tontû no mwanka nthithie bûrîa mbugîîte nkaathithia; no mwanka mûbango jwaakwa jûûjûre.

¹²Nthikîîreeni buî ndemi; buî bûtîîtîkagia atî wonokio bûrî akuî.

¹³Nî ndeetareetete wonokio bwaakwa akuî, bûtî kûraaja; ntîkarakara ntîonoketie antû baakwa. Nkaaretera Zaiûni wonokio na nkumithie Israeli.”