Read KIMERU BIBLE PROTESTANT EDITION Isa 47 Bible Online

Isa 47 - KIMERU BIBLE PROTESTANT EDITION bible

Isa 47

¹ MWATHANI ariuga ûjû: “Uma gîtîîne kîa ûnene, ûkare nthî tîîriine, gwe ntûûra ya Babiloni; kûrî rîo wakari ta mwarî karaiti, rîrîa ûtaarî ûkwithûkîrwa na ûûmbwa gwe ntûûra ya Ababiloni; îndî kuuma nandî ûtîkoroetwa ‘Mwega’ kana ‘Ûmûthongi’ kaîrî.

²Jûkia maiga ja kûthia ûthie mûtu; irite gîtambaa kîa ûthiû na nguû îrîa ndaaja, magûrû jatigwe îgûrû, ûtobie rûûjî uunîte.

³Ûkaaritwa nguû ûtigwe ûtheri na wonwe kîthûnû. Nkaareeta îkanûkia na gûtî we ngaacaîîra.

⁴Mwonokia weetû eetagwa MWATHANI Mweneinya; nîwe Ûrîa Mûtheru wa Israeli.

⁵Kara ûkiri ki na ûrî muunduune gwe nthîgûrû ya Babiloni; nîûntû ûtîkoroîtwa kaîrî ûnene bwa moonene.

⁶Ndaathûûrîre nî antû baakwa, ndîrateejanîria barîa ndaithuurîîre. Ndaabarekererie njareene ciaaku, naagwe ûrarega kûbaigîîrua kîaao, ûratua kûiinyagîîria kinya barîa akûrû.

⁷Waugaga ûgaatûûra ûrî ûnene bwa moonene mwanka kenya; nîûntû bûu, ûrarega gûtindanîîra na mantû jaja kana wîtîkia jagaakarîka mûthieene.

⁸ Tontû bûû, nandî thikîîra nteto iji, gwe mwendi ikeno; gwe ûtûûraga kiindaajî. Wîtîkîtie atî gûtî ûngî taagwe; uugaga atî gwaaku gûtîkorogîa ntigwa kana ûkuîrwa nî aana baaku.

⁹Îndî-rî; mantû jau jo-jaîrî jagaakwîjîîra ntukû o îmwe ûtîîrîgîrîte; kinya watumîra mîtheega îrîa îrî inya na ûragûri bwaaku bunthe, ûgaakuîrwa nî aana, na gwaaku kûgîe ntigwa o ta gwa antû bangî.

¹⁰Ûtwîre kûthithia mantû jamaaî ûtî na ûguaa ûkiugaga, ‘Gûtî we ûkûmbona.’ Wateerwe nî ûûme bwaaku gwengwa mwanka ûreetîkia atî gûtî ûngî taagwe.

¹¹Îndî ûthûûku bûgaakwîjîîra na ûtîûmba kûbûrigîîria; mathîîna jagaakûgwata na ûtîona bwa kûthithia; ûkaathirua na mpwîî ûtîîrîgîrîte.

¹²Îta na mbere gûtumîra mîtheega yaaku na ûragûri bwaaku bunthe, nîûntû nîbio ûtwîre gûtumîra kuuma ûrî mwana; biomba gûkûûmbanîîra kana bigagûteethia gwîkanîra ûguaa.

¹³Amwe na iroria biaaku bionthe, gûtî u ûgaaciûmbîra. Beere nandî beeje bagûteethie. Bau bataûraga mantû ja îgûrû, na bau baroragia mantû na njota na mweri, nî bakwîre jarîa jagaakwîjîîra.

¹⁴Îndî batîûmba nîûntû bakari ta rûûa rûrîa rûgeragwa mwankiine rûkaya rûkathira; rûtîûmbaga gûcionokia rwirita mwankiine rûtîkaaye. Rûtiuaga mwanki jwa gwota nîûntû rûtîûmba kuuma makara.

¹⁵Ûu nîu barîa ûtwîre wîtîkîtie bakari; bau nîbo ûtwîre ûtumagîra kuuma ûrî mwana. Bakaaragana muntû eete bwaawe, ûngî bwaawe, na ûtîona wa gûkwonokia.”