Read KIMERU BIBLE PROTESTANT EDITION Isa 49 Bible Online

Isa 49 - KIMERU BIBLE PROTESTANT EDITION bible

Isa 49

¹ Nthikîîreeni buî nthîgûrû cia kûraaja; igueni ûrîa nkuuga buî antû ba kûraaja. MWATHANI anthuurîre ndî kîu kîa maama; MWATHANI ambîtîre ntîciari.

² Aatûmîre nkaaragia nteto ikari ta rûchiû rûrûnoore, arakara ankunîkîrîte na njara yaawe ambithîte; ampeetherie mûgwî jûmûnoore, arambitha thigakiine yaawe.

³Ningî nî aambîrîre atîrî, “Ûrî nthûûmba yaakwa gwe Israeli; nîgwe ûgaatûma nkumagua.”

⁴Îndî ni ndaugaga atîrî, “Nî ngûgî ya ûtheri ntwîre kûrita; mbînyangîtie inya yaakwa ûtheri o ûu. Îndî gûtî nkaanja atî MWATHANI noowe wiijî bûrîa bûmbagîîrîte; Mûrungu waakwa noowe ûûmba kûndîa.”

⁵Nandî MWATHANI ûrîa wampeetherie nthûûmba yaawe o ndî kîu kîa maama ariuga atî nchiarwa cia Jakubu igaacoka kîrî we, na atî antû ba Israeli bonthe bakoothûranua kîrî we. MWATHANI nîwe ûtûmîte ngîa îgweta; Mûrungu waakwa nîwe ûtuîkîte inya yaakwa.

⁶ Ariuga atîrî, “Kwîthîrwa ûrî nthûûmba yaakwa na kûûthûrania nchiarwa cia Jakubu, na gûcokanîîria matigari ja antû ba Israeli tî ûntû bûbûnene. Nîkwîthîrwa ngaakûeethia weerû bwa mîgongo îngî yonthe; nîkenda wonokanio bwaakwa bûkinyîra antû ba nthîgûrû yonthe.”

⁷Ûjû nîu MWATHANI akuuga, We Ûrîa Mûtheru wa Israeli na Mwonokia waao: arîarîria ûrîa ûmeni mono na ûthwîrwe nî mîgongo îngî, ûrîa ûtwîre arî nkombo ya athani ba nthîgûrû ingî, akauga atîrî, “Anene bagaakwonaga bakarûngama; atongeeria kinya bo ka bagaagûturagîria maru, nîûntû MWATHANI Ûrîa Mûtheru wa Israeli, ûrîa waakûthuurîre nî mwîtîkua.”

⁸ MWATHANI ariuga ûjû: “Rîrîa rîagîîrîte rîakinya ngaacokia maromba jeenu; ntukû ya wonokio yakinya nkaabûteethia. Nkaabûmenyeera ngirie bwîjîîrwa nî ûgwati, na nî buî ngaatûmîra kûthithia kîrîkanîro gîaakwa na antû bonthe. Nkaabûcokia biigaine bieenu bia nthîgûrû birîa birîîkîtie kûthûûkangua, bûtûûre nthîgûrû yeenu bûrî kiindajî.

⁹Nkaarîria barîa barî ncheera mbeere, ‘Umagareni,’ nabo barîa barî muunduune mbeere ‘Umîreni werûûne.’ Bakoonaga biakûrîa njîreene îrîa bageetagîîra, na kinya irîmeene bitî mîtî.

¹⁰ Batîngîûmbwa nî mpara kana nyoonta; riûa kana ruuo rwa mwanki bitîbathangîkia. Nîkwîthîrwa ûrîa ûrî kîaao nabo akeethîrwa abatongeeretie, na akaabeetithagîîria gûntû kûrî na rûûjî.

¹¹Nkaathithia barabara irîmeene bionthe; nkaathuranîra njîra îmbariî îrîa antû baakwa bageetîîra.

¹²Bakauma nthî cia kûraaja bakîîjaga, bamwe baumîte bwa Ûrîo, bangî baumîte bwa-Rûgûrû, na bangî baumîte nthîgûrû ya Sîene.[8]

¹³Ina ûgwîrîtue gwe îgûrû, naagwe nthîgûrû ûkûngûîre; ineni na kajû gakanene buî irîma, Nîkwîthîrwa MWATHANI akaaboreria antû baawe, na akaigîîrua antû baawe barîa baiinyîîrîtua kîaao.

¹⁴Îndî Zaiûni îriuga atîrî, ‘MWATHANI nî aantiganîîrie; MWATHANI Mûrungu Mweneinya nî oorîîrue nî ni.’”

¹⁵MWATHANI arîûria atîrî, “Kinya mûka oomba kûûrîrua nî kaana kaawe karîa oonketie, akaaga kîaao na mwana aciere? Kinya gûkëethîrwa no oorîrue, ni ntîûmba kûûrîrua nî buî.

¹⁶Atîrî Jerusalemu; mpaandîkîte riîtwa rîaaku mpîîne cia njara ciaakwa, na nkûthûgaanagîria magiita jonthe.

¹⁷Barîa bagaagwaka nî beejîte kwînga barîa baakûmomorangîre, nabo barîa baakûmomorangîre bakaauma kîrî gwe beete buru.

¹⁸Tegeeni nteere cionthe ûcionere; antû baaku bonthe ka bakûûthûrana beejîte kîrî gwe.” MWATHANI ariuga atîrî, “Bunka ndî mwoyo; ûkaagwîrîrua kwona antû baaku kaîrî. Bagaakûgemia ûthongome ta mûgûrwa ntukû ya mûranû.

¹⁹Gûtî nkaanja atî nî waathûûkangîrue na nthîgûrû yaaku îreenyangua; îndî nandî ûtîûmba kûng'anagîîra antû barîa beejîte gûtûûra kûu, nabo bau baakûthûûkangîrie batîîthîrwa barî akuî.

²⁰Ûkaigua na matû jaaku aana barîa baciari ûrî kîthamîrioone bakiuga, ‘Gûntû gûkû gûkûnyiia mono; nî kwaraaramue twoone gwa gûtûûra.’

²¹Naagwe ûgaaciûragia atîrî, ‘Nûû ûnciarîrîte baba bonthe? Ndaakuîrîîrwe nî bonthe barathira ndîratigwa ndiithikîîrîte, ndîrathaamua ndîraikua nthî cia kûraaja; baba nabo nûû ûbarerete? Ndaatigîrwe ndî ninka buru; nandî baba bonthe nîkû baumîte?’”

²²Ûjû nîu MWATHANI Mûrungu akuuga: “Atîrî, ngookîîria njara mbenerie mîgongo na mbûkîîrie bendera yaakwa antû bonthe bamîone. Nabo bakaareeta nthaka cieenu bacikamatîte na njara na bareete aarî beenu babakamatîte na ituro.

²³Anene bagaatua kûbûmenyagîîra ta barî ba abaagu, nabo aka ba anene bakabûreraga ta babûciere. Bakaabûturagîria maru, bakeenamîîria mwanka mûthetuune, bagacûna tîîri magûrûûne jeenu. Rîu nîrîo bûkaamenya atî nî ni MWATHANI; barîa bambîrîgagîîra batîkorocokerwa nî nthao.

²⁴Nchamba ya ndwaa yoomba gûtunywa kîrîa îtaîte ndweene, kana mîgwate îtuunyûkua kuuma njareene cia muntû ûrî na inya?”

²⁵MWATHANI ariuga atîrî, “Gûtî nkaanja atî mîgwate îgaatuunyûkua kuuma njareene cia muntû ûrî na inya na kinya nchamba ya ndwaa îgaatunywa into birîa îtaîte ndweene. Nîkwîthîrwa ûûni nkaarwa na barîa barûjaga naabuî na nkoonokia aana beenu.

²⁶Ngaatûma barîa babûiinyagîîria bakare ta antû boogiti, batue kûûraganaga bongwa. Nabo antû bonthe bakaamenya atî ûûni MWATHANI, Ûrîa Mweneinya wa Jakubu, nî ni Mwonokia na Mûkûûri weenu.”