Read KIMERU BIBLE PROTESTANT EDITION Isa 5 Bible Online

Isa 5 - KIMERU BIBLE PROTESTANT EDITION bible

Isa 5

¹ Ka-mbwinîre rwîmbo rwa mûcoore waakwa rwîmbo rwa wendo rwegiî muunda jwaawe jwa mîzabibû. Mûcoore waakwa nî aarî na muunda jwa mîzabibû karîmeene gakanoru mono.

²Ararita maiga jarîa jaarî ku, arajûrîma, arajûanda mîzabibû îrîa mîega buru. Araaka kîrîngo kîa akaria gatîgatî kaaju, na arathithia îrinya rîa gûkinyangagîra nzabibû kûu muundeene. Rîu areteera mîzabibû îciara nzabibû, îndî îraciara nzabibû irî na nchechû.

³Nandî buî atûûri ba Jerusalemu naabuî antû ba Juda, tueni gatîgatî gaakwa na muunda jwaakwa jwa mîzabibû,

⁴bûmbîîre nîatîa ûngî ndaabuîrîte kûthithîria muunda jwaakwa jwa mîzabibû? Rîrîa ndeeterere jûciara nzabibû injega rî, nîmbi yaatûmîre jûciara nzabibû irî na nchechû?

⁵Îndî nandî ka mbwîre ûrîa nkaathithîria muunda jwaakwa jwa mîzabibû. Nkaatharia rwego rwaaju, jûrîîwe nî nyomoo; ngaakobora rûthingo rûrîa rûjwirigîrîte jûkinyangwe.

⁶Nkaajwîrûkîra jwee kîgûndû; jûtîrîmîrwa kana jûcawa, no makamba na matî ja miigua jakethagîrwa jarî ku; Ningî nkaagiria matu jatîkajurithîrie ngai kaîrî.

⁷Nîkwîthîrwa Israeli nîyo muunda jwa mîzabibû jwa MWATHANI Mweneinya, nabo antû ba Juda nîbo mîzabibû îmîthongi îrîa mpaandîte. Eerîgagîîra bathithanîria mantû ja îota, arethîra nooka bakûûragana; eerîgîîrîte bathithanîria ûrîa kwagîrîte, akiigua, no irîro bia barîa bainyîîrîtue!

⁸Wûi kîrî barîa boongagîîra nyomba ingî kîrî iria barî nacio, miuunda îngî kîrî îrîa barî nayo, mwanka antû bangî bakaaga kaanya, nabo bagatûûra miuundeene îmînene batîgûkuîanîîria na antû bangî!

⁹MWATHANI Mweneinya aciîtîtie nkiigagua, auga atîrî, “Gûtî nkaanja nyomba inyiingî igaatigwa irî intheri, nyomba inene na inthongi igaatigwa itî na muntû wa gûtûûra ku.

¹⁰Nîkwîthîrwa muunda jwa mîzabibû jwa îka îkûmi jûgaatua kûumaga ndibei lita mîrongo îîrî na ijîîrî (22) akî, nacio mbeeû cia gîkabû ikauma maketha ja gakabû kamwe.”

¹¹Wûi kîrî barîa barookaga gûûkîîra beengeene na mbogita; bagatinda kûnyua gûgatuka mwanka ndibei îkoojûra mwîrî!

¹²Bainaga na wandîîndî na inanda bia ndigi, na tamburini na mîtûrirû na bakanyua ndibei biathoone biaao; îndî batîtindanagîra na mathithio ja MWATHANI kana boona ngûgî îrîa aaritîte na njara ciaawe.

¹³Tontû bûû, antû baakwa bagaikua kîthamîrioone nîûntû bwa kwaga ûmenyo antû ba kûu barîa barî îgweta bagaakua nî mpara nakîo kîrîndî kîu kîngî kîrîîwe nî nyoonta.

¹⁴Tontû bûû, gwa akuû ga kûbeeteerete, kwagamîtie kanyua konthe buru, nabo antû ba kûu barîa barî îgweta na kîrîndî kîu kîngî, bakaamerua, amwe na barîa baanjaanjaga ku bakiigwîragia, na aikumia

¹⁵Antû barîa baciitithagia bakeenîkwa, nabo aikumia bathirue rwikumio.

¹⁶Îndî MWATHANI Mweneinya ageekîîrwa nîûntû bwa gûtuujanîra na îota; Mûrungu, we ûrîa Mûtheru, akoonania atî nî ûmûtheru nîûntû bwa kûthithia ûrîa kwagîrîte.

¹⁷Natu tûng'ondu tûgaatua kûrîîjaga kûu maganjoone ta ûrîa tûrîîjaga kûrîa tûrîîthagua, natu tûtûrûme tûkaarîîthagua ku nî ageni.

¹⁸Wûi kîrî barîa baireetagîîra ûthûûku, babûkuucîtie na mîrigi ya waayia; barîa bakururanagia na meeyia ta ûrîa nyomoo ikururagia ngaarî ya mîrigo.

¹⁹Barîa baugaga: “Nî athithie mpwîî, aritange ngûgî yaawe tûmîone; mûbango jwa Ûrîa Mûtheru wa Israeli nî jûûjûre; nî jûûjûre tûmenye ûrîa jûkari!”

²⁰Wûi kîrî barîa beetaga ûthûûku wega, nabu wega bakabwîta ûthûûku. Barîa boonaga muundu jûrî weerû, nabu weerû bakabwona bûrî muundu. Barîa beendaga mûrîo jwaa ng'ana, nayo ng'ana yaa mûrîo!

²¹Wûi kîrî barîa bacionaga barî baboome; barîa baciîraga nîbo baijî mantû nkûrûki ya bangî.

²²Wûi kîrî barîa nchamba cia kûnyua ndibei; barîa baunganagia mîthemba îmingî ya birîa biogitanagia na bitîboombe.

²³Barîa bajûkagia nkukumo nîkenda barekeeria muntû ûrî na maatia, îndî ûrîa ûtî na maatia bakarega kûmûthithîria ûrîa kûbuîrîte!

²⁴Tontû bûû, o ta ûrîa rûmûrî rwa mwanki rûîîthagia matî jamoomo; na o ta ûrîa nyaki înjûmo îîjaga îgatuîka mûju no ta u mîri yaao îkoora najo marao jaao joorûrûke jeete na ruuo ta tîîri; nîûntû nî baregeete Waatho bwa MWATHANI Mûrungu Mweneinya, na baarega gûtindanîîra na kiugo kîa Ûrîa Mûtheru wa Israeli.

²⁵Tontû bûû, MWATHANI nî athûûri mono nî antû baawe, na nî ookîîrîtie njara aabaringa mwanka irîma biateetema. Biimba biaao biûjûri njîreene, îndî kinya nyuma ya jau jonthe, mûthûûro jwaawe jûtîrataûka; no ookîîrîtie njara abakanûkia.

²⁶Akeeneria mîgongo ya kûraaja, amîte na kîthiori kuuma ituri bia nthî; tîyo îîu îîjîte yûgîangi na mpwîî!

²⁷Gûtî wa ciaao ûkaanoga kana agiitara, gûtî we ûkaathinka kana amama; mîcibi yaao îtîregera, kana mîrigi ya iraatû biaao îtuîka.

²⁸Mîgwî yaao nî înoori; na moota jaao jonthe nîjakûmi; nchaaû cia mbarathi ciaao ciîkîri iraatû bia chuuma, nacio ngaarî ciaao cia ndwaa irîîta ta rweni.

²⁹Nkururo ciaao nî ta mûruumo jwa ngatûnyi, nî ta jwa ngatûnyi înjanake; irîa îrurumagîîra nyomoo, îkamîgwata, îkamîkururia, na gûtî we ûûmba kûmîtunyûkia.

³⁰Îgiita rîu rîakinya bakaarurumîîra Israeli ta ûrîa mîgombe ya îria îrurumaga. Kîrîa gîkoonekaga nthîgûrûûne no muundu na mîthangîko; muundu jûrîa jûkeethîrwa jûrî ku jûgatûma weerû bunthe bûthire.