Read KIMERU BIBLE PROTESTANT EDITION Isa 51 Bible Online

Isa 51 - KIMERU BIBLE PROTESTANT EDITION bible

Isa 51

¹MWATHANI ariuga atîrî, “Thikîîreeni bwigue ûrîa nkûbwîra buî bwîtîkîtie MWATHANI na bûcûaga wonokio. Ririkaneni iiga rîrîa bwaajîrwe kuuma kîrî rîo na îrinyeene rîrîa bweenjîrwe.

²Ririkaneni abaagu Abrahamu na Sara ûrîa waabûciarîre. Nîkwîthîrwa rîrîa ndeetîre Abrahamu, ataarî na mwana, îndî nîndaamûtharimîre na ndîramwaa nchiarwa inyiingî.

³Tontû bûû, îtîkieni atî MWATHANI akaaboreria Zaiûni, na akaigîîrua barîa baathûûkangîîrue itûûro biaao kîaao. Akaagarûra gûntû kwaayo kûrîa gûtîtûûragwa nî antû gûkare ta muunda jwa Edeni; agaatûma rwanda rwaayo rûkare ta muunda jwa MWATHANI. Gîkeno na nkerû bikoojûra ku, ningî antû bakainaga ndwîmbo cia gûkaatha MWATHANI.

⁴Thikîîreeni ûrîa nkûbwîra buî antû baakwa; kindeni gûtû bwigue ûrîa nkuuga buî antû ba mûgongo jwaakwa. Nkaeejana Waatho bwaakwa, îota rîaakwa rîee weerû kîrî antû ba mîgongo yonthe.

⁵Wonokio bwaakwa nî bwîjîte na mpwîî; ndî akuî kûbûreetera ûteethio; naani nî ni nkaathanaga îgûrû rîa mîgongo yonthe. Barîa batwîre nthîgûrû cia kûraaja nî ni beeteerete; nî ni beerîgîîrîte mbaretera ûteethio.

⁶Ciûkieni meetho bûtege îgûrû na bûcoke bûtege nthî. Nîkwîthîrwa îgûrû rîkaathirîkîra ta toogi, nayo nthîgûrû îtaambûkange na îthire ta nguû înkûrû. Nabo antû barîa batwîre nthîgûrûûne bagaakua ta ngi bathire; îndî wonokio bwaakwa bûgaatûûra kenya na kenya na ûûmbani bwaakwa bûtîkorothira.

⁷Igueni ûrîa nkuuga buî barîa bwijî ûûma nîmbi; thikîîreeni buî antû barîa bwathîkagîra Waatho bwaakwa; bûgáakîreni antû kinya baabûmena kana bûmaka baabûthûmbia.

⁸Nîkwîthîrwa bau bakaarîîwa nî mûthwa na tûng'inyo ta nguû îndî wonokio bwaakwa bûgaatûûra kenya na kenya, na ûûmbani bwaakwa bûtîkorothira.”

⁹“Ûkîîra MWATHANI; ûkîîra na inya yaaku ûtûteethie. Ûkîîra ûthithie ta ûrîa wathithagîria antû baaku matukû ja karaaja. Anga tîgwe wagiitangîre Rahabu[9] machunchî? Anga tîgwe warûîre na nyamû îîu nthûûku ûramîûmba?

¹⁰Anga tîgwe waathûranîre rûûjî rwa îria, ûrathithîria antû baaku njîra înjûmo îrieene gatîgatî nîkenda ûboonokia?

¹¹Antû barîa MWATHANI aakûûrîre bagaacoka, batonye Zaiûni bakiinaga ndwîmbo, barî na gîkeno gîkînene na kûgwîrua gûtîkorothira mwanka kenya na kenya, na kîeba na mîthangîko bikaathira buru.”

¹²MWATHANI ariuga atîrî, “Ûûni nî ni mbûteethagia. Nîka bûkari atîa buî tontû bûkîraga muntû ûkuujaga? Nîmbi îtûmaga bûkîra muntû ûthiraga ntûtî ta nyaki?

¹³Ka-bûûrîrîtue nî MWATHANI Mûûmbi weenu ûrîa woombîre into bionthe bia îgûrû na aroomba nthîgûrû? Nîmbi îtûmaga bûtûûra bûrî na ûguaa magiita jonthe, bwona barîa babûthangîkagia bakiing'entia, kana bakiithuranîra nîûntû bwa ndwaa? Nandî bau batûthangîkagia ka batîkwing'entia nîî?

¹⁴Barîa baiingîri ncheera bakaarekeerua na mpwîî; batîkua baûra ûtheri, ningî batîkoroaga biakûrîa.

¹⁵Nîkwîthîrwa nî ni MWATHANI Mûrungu weenu, ûrîa uuruganagia îria rîkagîa mîgombe îkûruruma. Nî ni mbîtagwa MWATHANI Mweneinya.

¹⁶Nî ndaabwathîre kîrîra gîa kûbûtongagîîria, na ndîrabwithania, ndîrabûmenyeera. Nî ndoombîre into bionthe bia îgûrû, na nî ni ndoombîre nthîgûrû, na ndîreera antû ba Zaiûni atîrî, ‘Bûrî antû baakwa.’”

¹⁷ Ûkîîra! Ûkîîra! Rûngama gwe Jerusalemu. Gwe nîûrîîkîtie gûkunda îkanûkia rîa MWATHANI, rîrîa agûkanûkîtie na mûthûûro. Ûrîkundîte buru watugûra gîkombe, mwanka rîakwogitia.

¹⁸Antû babaingî nî baciarîri Jerusalemu, îndî gûtî we wonorekia wa kwonia bangî njîra. Antû babaingî nî bakûrîrîte ku, îndî gûtî we kîrî bo ûûmba kûbatongeeria.

¹⁹Mantû jaakwîjîrîre jaîrî-jaîrî, îndî ûrita wa gûkûgwatia kwithikîîra kû? Weejîrîîrwe nî mûthiro na wînyangia na mpara na ndwaa, îndî ûrita wa gûkûboreria kû?

²⁰Antû baaku nî baathirîre inya; bagwîte nteere cia njîra cionthe, ta ûrîa nkûrûngû igûûjaga mîtegoone. Nî barîîkîtie kûgwata îkanûkia rîa MWATHANI na baigua ûrîa mûthûûro jwa Mûrungu waaku jûng'ana.

²¹Tontû bûû, thikîîreeni nteto iji buî antû ba Jerusalemu, buî bûrî thîîneene; buî bwogiti na bûtînyuîte ndibei.

²²MWATHANI weenu, tawe MWATHANI na Mûrungu weenu, ûrîa ûtetagîîra antû baawe ariuga ûjû: “Atîrî, nkûbweberia mbogita îîu, na ntîkorobûkanûkia kaîrî na mûthûûro.

²³Barîa babûiinyagîîria nîbo ngacokeria îkanûkia rîu, barîa babwîraga, ‘Iringeni nthî tûkûrûkîîre îgûrû rîeenu,’ bakaeethia mîgongo yeenu tîîri kana njîra cia gwîtagîîra.”