Read KIMERU BIBLE PROTESTANT EDITION Isa 52 Bible Online

Isa 52 - KIMERU BIBLE PROTESTANT EDITION bible

Isa 52

¹ Ûkîîra! Ûkîîra na ûûjûrwe nî inya gwe Zaiûni. Îkîra nguû ciaaku irîa nthongi gwe Jerusalemu ntûûra îrîa ntheru. Nîkwîthîra antû batîîtîkîtie Mûrungu na batîtheri batîkorotonya ndeene yaaku kaîrî.

²Ûkîîra bwiringaringe tîîri buî mîgwate ya Jerusalemu; iriteeni mîkanda nkingo buî atae ba ntûûra ya Zaiûni.

³MWATHANI ariuga atîrî, “Nîkwîthîrwa gûtîkîo bwarîîrwe bûgiikua ûkombone-rî, gûtîkîo bûgeetua bûgîkûûrwa.”

⁴MWATHANI Mûrungu ariuga ûjû, “Rîa mbere, antû baakwa beetîre Misri bagîcwa ûtûûro nabo Asîria baracoka barabainyîîria ûtheri.”

⁵ Nandî MWATHANI Mûrungu ariuga atîrî, “Tega ûrîa gûkarîte. Antû baakwa baikîtue kîthamîrioone gûtî na îrîi. Barîa babaathaga batindaga kûbakururîra bakîthûmbagia riîtwa rîaakwa.

⁶Tontû bûû, antû baakwa rîu bakaamenya nî ni Mûrungu waao. Îgiita rîakinya bakaamenya nî ni mbarîtie mantû jaja. Bakaamenya atî ndî o.”

⁷ Nî bûbûthongi atîa kwoona mûtûmwa eejîrîte irîmeene îgûrû areetete nteto injega, ûrîa wîjîte gûtûmîîria nteto cia thîîrî; ûrîa ûreetete ntûmwa înjega ya wega; ûrîa wîjîte gûtûmîîria nteto cia wonokio; ûrîa wîjîte kwîra antû ba Zaiûni atîrî, “Mûrungu weenu nîwe ûkwaathana.”

⁸Thikîîreeni bwigue majû ja akaria beenu ba ntûûra. Ka-bakwina bonthe bagwîrîtue boona MWATHANI acokete Zaiûni.

⁹Ambîîrieni kwina bwinthe, buî gûntû kûrîa kwînyangie kwa Jerusalemu, Tontû MWATHANI nî aigîîrîtue antû baawe kîaao; nî oonoketie Jerusalemu.

¹⁰MWATHANI nî atûtambûrûkîrîtie njara yaawe întheru meethoone ja antû ba mîgongo yonthe, nabo antû ba nthîgûrû yonthe bakoona wonokio bwa Mûrungu weetû.

¹¹ Îteeni! Îteeni buume Babiloni, na bûgatonga gîntû noo kîrîkû gîtîtheri buî bûkamataga into bia kîûrû kîa MWATHANI, Umeeni gûntû kûu na bwitherie.

¹²Bûtiuma ku na mpwîî-mpwîî kana ta antû beengi, nîkwîthîrwa MWATHANI nîwe ûkaabûtongeeria; Mûrungu wa Israeli akeethîrwa arî nyuma yeenu abûkarîtie.

¹³MWATHANI ariuga atîrî, “Tega, nthûûmba yaakwa îkoombana; nayo îgeekagîîrwa na îkumague na îeewe gîtîîo.

¹⁴Antû babaingî nî baarigarîre rîrîa baamwonere. Kûgarûka kûrîa aagarûki kwaarî gûkûnene mono, atoonekaga ta muntû, ningî mûûmbîre jwaawe jwaarî na mwanya mono na jwa muntû.

¹⁵ Îndî nandî agaatûma mîgongo îmiingî îmaka. Anene bakaarigara baage bwa kuuga, nîûntû bagaacionera jarîa bateerwa, na baciûkîrwe nî jarîa bataigua.”