Read KIMERU BIBLE PROTESTANT EDITION Isa 53 Bible Online

Isa 53 - KIMERU BIBLE PROTESTANT EDITION bible

Isa 53

¹ Antû nabo bariuga atîrî, “Nûû ûrîngîîtîkia jarîa twaigîtue? Nûû ûrîngîmenya këethîra MWATHANI akoonania inya yaawe ûntûûne bûbû?

²Nîkwîthîrwa aakûrîre mbere ya MWATHANI ta ûrîa kîmera gîkûraga kana ta kamûtî kaumîte gûntû gûtî rûûjî. Ataarî na mûûmbîre kana mûkarîre jwa mwanya jwa gûtûma tûrigara nîwe, kana ûthongi bwa gûtûma tûmwenda.

³Antû baamûmenere na baramûrega; aarî wa mathîîna na mîthangîko magiita jonthe. Antû batîngîenda kûmûtega kinya na meetho; aamenerwe o kûmenwa, naatuî tûteenda kûmwîkîîra.

⁴ Îndî ûûma nî atî we nî oomîrîîrie îkanûkia rîrîa rîaarî rîeetû areetîkîra kûthangîkua antû eetû. Tuî naatuî twoonaga kûthangîkua kûu kwaawe taku kûmwagîrîte; twaugaga nî Mûrungu ûkûmwaa îkanûkia.

⁵ Îndî we eekîîrwe ironda nîûntû bwa maatia jeetû; eekîîrwe ngûma nîûntû bwa meeyia jeetû. Îkanûkia rîrîa aakanûkîrue nîrîo rîtweete mwoyo; mpûûrwa îrîa aaûûrîrwe nîyo îtûmîte twoorua.

⁶ Tuî twinthe tûtwîre tûkari ta mbûri kana ng'ondu ciûrîte; o muntû agwete njîra yaawe ûûngî yaawe. Îndî MWATHANI nî arîîkîtie gûkamatithia nthûûmba yaawe îkanûkia rîrîa tûrîngîkanûkua rîa meeyia jeetû twinthe.

⁷ Athangîkîrue na arakanûkua ûtheri, îndî we ataatumûra kanyua. Aakirîrîrie ta ûrîa gatûrûme gakiragîîria gaikîtue kîritîroone kîa igongwana, arakira-ki ta ûrîa ng'ondu iikirithagia îkîenjwa guee; we ataatumûra kanyua.

⁸Aathangîkîrue ûtheri na aratuîrwa ûrîa gûtîagîrîte. Gûtî we wamûmakaagîra kinya ooragwa atîtigîte nchiarwa. Ooragîrwe îgûrû rîa meeyia ja antû ba MWATHANI.

⁹ Nî ooragîrwe ta muntû ûmûûî na arathikwa mbîrîreene ya itonga, kinya këethîra we gûtî ûthûûku aathithîtie, kana aaria ûrongo.”

¹⁰Îndî MWATHANI ariuga atîrî, “Bwarî wendi bwaakwa athangîkue; nî ni ndeendere oona thîîna îîu, nîkenda atuîka kîgongwana gîa kûthiria meeyia. Naani nîmweete ûtûûro bûbûraaja, na akoona nchiarwa ciaawe. No mwanka oojûrie wendi bwaakwa ûrîa bûkari.

¹¹Akaang'anîrwa oona maciara ja mîthangîko yaawe. Nthûûmba yaakwa îrîa ntheru îkaamenya atî yathangîkîrue nîkenda antû barekerwa meeyia jaao, na baa babaagîru.

¹² Tontû bûû, nkaamûgaîra kiigai kîaawe amwe na barîa barî îgweta, mûng'ananie na barîa barî inya. Nîkwîthîrwa we nî eetîkîrîrie gûkua na aragiitîrwa îgamba ta ûmwe wa antû babaaî. Ningî areetîkîra gûkamata meeyia ja antû babaingî na araromba eeyia barekerwe meeyia jaao.”