Read KIMERU BIBLE PROTESTANT EDITION Isa 54 Bible Online

Isa 54 - KIMERU BIBLE PROTESTANT EDITION bible

Isa 54

¹ Ina gwe Jerusalemu; ambîrîria kwina na gûkûngûîra gwe wîthîrîtwe ûkari ta mûka ûtî twaana; gwe ûtwîre waagîte maciara. Nandî mûka ûrîa wîrûkîri nîwe ûkeethîrwa arî na aana babaingî nkûrûki ya ûrîa ûtwîre na mûrûme.

²Ongeera ûnene bwa îema rîaaku; rîkuuchie mwanka rîarame. Menya ûgîa na nkaanja; reeyia mîkanda na ûringîre biango birike.

³Nîkwîthîrwa ûgaatamba na nteere cionthe; nchiarwa ciaaku ikaathaga antû ba mîgongo îngî, na ciûjûrie ntûûra irîa itwîre ciîrûkîri.

⁴Ûgákîra, nîûntû ûtîcokerwa nî nthao kaîrî; ûkámaka, nîûntû ûtîrîîwa nî nthoni kaîrî. Nthao irîa wacokeerwe nîcio mbereene ikoorîria buru; ûtîcoka kûririkana kaîrî rûmena rûrîa woonua rîrîa wîthîrîtwe ûkari ta mwekûrû ntigwa.

⁵Mûrungu ûrîa ûkûûmbîte nîwe mûkûrû waaku, na riîtwa rîaawe nî MWATHANI Mweneinya. Ûrîa Mûtheru wa Israeli nîwe Mwonokia waaku, na nîwe wîtagwa Mûrungu wa nthîgûrû yonthe.

⁶Nîkwîthîrwa gwe Israeli ûtwîre ûkari ta mûka wateerwe nî mûrûme na ûrî na kwithikîîra gûkûnene; ûtwîre ûkari ta mûka wîngi nî mûrûme arî ûmwîthî. Îndî nandî MWATHANI nî agwîtîte kaîrî ûcoka kîrî we. Mûrungu waaku ariuga atîrî,

⁷“Mbîthîrîtwe ngûtiganîrîtie kagiita gatî gakanene, îndî ngaagûcokia kîrî ni kaîrî na kîaao gîkînene.

⁸Nguutatîrîte kagiita gatî thau nîûntû bwa mûthûûro jûmûnene, îndî nandî ngaakwigîîrua kîaao na nkwonie wendo bûtîkorothira,” nîu MWATHANI na Mwonokia waaku akuuga.

⁹ MWATHANI ariuga atîrî, “Kîrî ni, îgiita rîrî no ta rîrîa rîa Noa; o ta ûrîa ndeekîre wîrane îgiita rîa Noa ndîrauga atî nthîgûrû îtîkorokûnîkanua nî rûûjî ta rûu kaîrî, noou nandî ngwîka wîrane atî ntîkorothûûra nîgwe kaîrî kana ngûkanûkia.

¹⁰Kînya irîma bigakûûka na tûrîma tûkaragana, ntîkorotiga kûbwonia wendo bwaakwa bûrîa bûtîthiraga, ningî ntîkorothûûkia wîrane bwaakwa bwa thîîrî,” nîu MWATHANI ûrîa ûrî kîaao naabuî akuuga.

¹¹ MWATHANI ariuga atîrî, “Gwe ûrîte thîîna wainya, ûkîgeragwa ndee na ndee ûtîkwona wa gûkwigîîrua kîaao; ngaaka mîsingi yaaku na maiga jarîa mathongi na mbake nyomba ciaaku na maiga ja goro.

¹²Ngaaka irîngo biaaku na maiga ja goro na mbake mpingîro ciaaku na maiga jakwenaenia na mbake nthingo ciaaku na maiga ja goro.

¹³ Nî ni ningwa nkaeejaga antû bonthe kîrîra na mbae ûthinyaari bûbûnene,

¹⁴Ûkethagîrwa ûûjûrîtwe nî mathithio ja waagîru na ûûma na ûrî na inya. Ûtîkoroigua ûguaa nîûntû mantû ja kûiinyîîrua na kûthangîkua jakethagîrwa jarî kûraaja naagwe; ûtîkoromaka nîûntû mantû ta jau jatîkorogûkuîrîria.

¹⁵Ûrîa ûgaakûthanga ûmenyage tî ni mûtûmîte ningî gwe ûkoombanaga kîrî barîa bonthe bagaakûthangaga.

¹⁶Atîrî, nî ni mpûûmbîte aturi barîa baîîthagia chuuma na mwanki bagatura mathaga ja ndwaa jarîa bakwenda; Ningî nooni mpûûmbîte nchamba cia ndwaa irîa irûjaga na mathaga jau.

¹⁷Tontû bûû, gûtî îthaga rîa ndwaa rîgaatumagîrwa kûrwaa naagwe rîkûûmba. Ningî gwe ûkaigambagîîra ûkoombana rîrîa rîonthe wathitangwa. Kîu nîkîo kiigai kîrîa nkaagaîra nthûûmba ciaakwa, na nî ni nkaabaeejaga ûûmbani,” nîu MWATHANI akuuga.