Read KIMERU BIBLE PROTESTANT EDITION Isa 55 Bible Online

Isa 55 - KIMERU BIBLE PROTESTANT EDITION bible

Isa 55

¹ MWATHANI ariuga atîrî, “Ûrîa wonthe ûrî na nyoonta, nî eeje anyue rûûjî, na ûrîa ûtî na mbeecha, nî eeje agûre biakûrîa arîe. Njûûni bûgûre ndibei na îria bûtî na mbeecha bûtîkwenderua.

²Nîkî bûtumagîra mbeecha cieenu kûgûra irio bitî bia mma? Nîkî bwinogagia bûkîrîmia into bitîûmba kûbûnyiria? Nthikîîreeni na bûthithie ûrîa nkûbwîra bwoone bûkaarîa birîa biega na bûng'anîrwe.

³ Kindeni matû na bwîje kîrî ni; igueni ûrîa nkûbwîra, këethîra nî bûkwenda gûtûûra mwoyo. Naani nkaathithia kîriîkanîro naabuî gîa gûtûûra, mbûe itharimo birîa ndeerîîre Daudi.

⁴Ndaaeetherie Daudi mûtongeeria na mwathi wa mîgongo îmiingî, na ndîramûtumîra kwonania inya yaakwa kîrî mîgongo îîu.

⁵Atîrî, buî bûgeetaga mîgongo bûtiijî, nayo mîgongo îîu îtîbwijî îkeeja kûbwîtîka na-rwîro, nîûntû bwa MWATHANI Mûrungu weenu; nîûntû bwa Ûrîa Mûtheru wa Israeli, ûrîa ûgaatûma bûgîa îgweta na bweewa gîtîîo.”

⁶Cûeeni MWATHANI rîrîa akwonora; mûkaîreni rîrîa arî akuî naabuî.

⁷Muntû ûrîa wîagia, nî atigane na meeyia jaawe, nawe ûrîa ûthithagia mantû jatîagîrîte nî atigane na mathûgaanio jaawe jamathûûku. Muntû ta ûu nî kaaba acokeere MWATHANI nîkenda amwigîîrua kîaao; nî kaaba acokeere Mûrungu, nîûntû akaamûrekera buru.

⁸MWATHANI ariuga atîrî, “Mathûgaanio jaakwa tî ûmwe na jeenu, ningî ûrîa nthithagia mantû jaakwa tî ûmwe na ûrîa bûthithagia mantû jeenu.

⁹O ta ûrîa îgûrû na nthî bitigeene, noou mathithio jaakwa jarî mwanya na jeenu, na noou mathûgaanio jaakwa jarî kûraaja na jeenu.

¹⁰ Mbura na nkamia bigûûjaga nthîgûrû biumîte îgûrû, îndî bitîcokaga naarîa biumîte bitîoroetie nthîgûrû, bigatûma imera biuma na matî jariiba, ningî antû bakoona biakûrîa na mûrîmi akoona mbeeû ya kwaanda.

¹¹Ûu no ta u nteto irîa ikauma kanyua gaakwa ikeethîrwa ikari; itîcokeera ûtheri o ûu itîthithîtie ûrîa nkwenda na ûntû bûrîa mbugîîte bûkarîa.

¹²Bûkaumagara bûgwîrîtue, na bwîte bûrî na thîîrî. Kûrîa bûgeetîîra, irîma na tûrîma bikethagîrwa bikiinaga ndwîmbo, nayo mîtî yonthe ya kîthaka ga îkaaringa mpîî.

¹³Kûrîa gûtwîre kuuma matî ja miigua, nî mîthithinda îgaakûraga ku; kûrîa gûtwîre kuuma nkonko, nî mîtî îrîa îtûûraga îriibîte îgaakûraga ku. Mantû jau jakeethîrwa jarî kîririkania kîa wîrane bwa MWATHANI, nakîo kîririkania kîu gîtîkoroeberua o noo rî.”