Read KIMERU BIBLE PROTESTANT EDITION Isa 57 Bible Online

Isa 57 - KIMERU BIBLE PROTESTANT EDITION bible

Isa 57

¹Muntû ûmwagîru kinya agakua gûtî we ûtindanagîîra. Antû barîa beetîkîtie bajûkagua, îndî gûtî we ûciûkagîrwa amenya atî muntû ûmwagîru ka ajûkagua nîkenda auma thîîneene.

²Antû barîa baagîru bakaraga na thîîrî nî boonaga thîîrî na kînogoko baakua.

³Îndî buî, njûûni aja bûtûîre, buî nchiarwa cia aka arogi; buî mbeeû ya athûngîîri na maraya.

⁴Nûû bûkûthaaka nawe? Nûû bûgûcambia? Nûû bûkûthekera? Bûrî antû ba meeyia rûciara rwa waayia.

⁵Buî bûtûûraga kûthithia meeyia ja ûthûngîîri rungû rwa miuuru na rungu rwa mîtî îrîa îriribîte. Bûûragagîra twaana tweenu mîuroone makurunguune ja maiga bûgîtûrita igongwana.

⁶Maigeene jarîa mateenderu ja mûuro nîku mîrungu yeenu îkaraga; îîu nîyo bwîtîkîtie. Nîyo bûritagîra igongwana bia gwîtûûrîria na bia irio. Bûriuga ndoomba kûbwigîîrua kîaao bûkîthithagia mantû ta jau?

⁷Antû onthe arî gatûmbî kana karîma, gûtî o bûtîthithîrîtie meeyia ja ûthûngîîri kana bûritîra mîrungu ya mîng'uanano igongwana.

⁸Bwithîte mîrungu yeenu ya mîng'uanano nyuma ya mîrango yeenu. Nîbûmbîrûkîrîte, bwatuma itanda bibiariî, bwarita nguû bwamama ku. Babwonagia ithûnû biaao, naabuî bûgakuuchîîrua, bûkarita mbeecha iria bagwîtagia.

⁹Bûciakaga maguta na marashi jamaingî bûgeeta kûthathagia mûrungu jwa Moleki. Bûtûmanaga nthî cia kûraaja na kinya gwa akuû bwîta gûcûîrwa mîrungu ya kûthaathagia.

¹⁰Bûranoga nî ngendo irîa bwîtaga îndî bûtîîtîkagîra kuuga nî ngûgî ya ûtheri bûritaga. Bwîtaga o na mbere na mantû jau nîûntû gûtî rîo bûthiragîrwa nî inya.

¹¹MWATHANI arîûria atîrî, “Nûû bûkîraga na inya ûjû tontû bûmpaagia? Bûtîthûgaanagia bwaakwa kana bûndirikana. Nî ûrîa nkarîte nkiri îgiita rîrîraaja tontû bûtigîte gûnkîra?

¹²Ndîmenyithania ûrîa waagîru bweenu bûng'ana na ûrîa mathithio jeenu jakari, îndî bûu bûtîbûteethia.

¹³ Mîrungu îîu yeenu ya mîng'uanano bûciûthûranîrîtie nî îbûteethagie bwakaya bûrî thîîneene! Îkaurutwa nî ruuo îkamatwe îîte îgateewe kûraaja. Îndî muntû ûrîa ûgaiciitha kîrî ni, ûu agaatûûra nthîgûrû îîjî; akeethîrwa arî na kiigai kîrîmeene gîaakwa gîkîtheru.”

¹⁴MWATHANI ariuga gûkeeranwa atîrî, “Înjeni barabara! Înjeni barabara! Thuranîreni njîra îrîa antû baakwa bageetîîra, bweberie kîrîa kîonthe kîûmba kûbarigîîria.”

¹⁵Nîkwîthîrwa Mûrungu wa îgûrû, Ûrîa mûthûûngûûre na ûrîa wîtagwa Ûmûtheru ariuga atîrî, “Ntûûraga antû arîa athûûngûki na aatheru; ningî nîntûûranagia na barîa barî nkoro cia winyiiyia na bairirîte. Barîa barî nkoro cia kwinyiiyia nî mbeekagîra inya, na barîa bairirîte nî mbeekagîra mwoyo.

¹⁶Ntîkwenda gûtûûra nkararanagia na antû baakwa mwanka kenya, na ntîkwenda gûtûûra nthûûri nîbo. Tontû mwoyo jûrîa barî naju juumîte kîrî ni; nî ni ntûmîte beethîrwa barî o.

¹⁷Ndaathûûrîre nîbo nîûntû bwa meeyia jaao na ûmaramari bwaao, ndîrabakanûkia na mûthûûro na ndîrabaiciithîra. Îndî bo nooka beetîre na mbere kwîyia bakîthingataga mairîrîîria ja nkoro ciaao.

¹⁸Nîndîîkîtie kwona ûrîa mathithio jaao jakari, îndî nkaaboonokia. Nkaabaigîîrua kîaao, mbatongeerie, na mboorerie barîa barî na kwithikîîra.

¹⁹Thîîrî, thîîrî, kîrî barîa barî kûraaja na barîa barî akuî mborie antû baakwa,” nîu MWATHANI akuuga.

²⁰“Îndî antû babaaî bakari ta mîgombe ya îria; nîûntû yo îtîkiragîîria, îkaraga îkîgeraga ntaka na rûko mpwîroone.

²¹ Barîa baaî gûtî thîîrî bakoona,” nîu Mûrungu waakwa akuuga.