Read KIMERU BIBLE PROTESTANT EDITION Isa 58 Bible Online

Isa 58 - KIMERU BIBLE PROTESTANT EDITION bible

Isa 58

¹MWATHANI ariuga atîrî, “Tûmîîria buru. Ûgaatiga ûtiugîîte noo bûmwe. Ûgîîria na kajû gakanene ta tarumbeta; îra antû baakwa maatia jaao; menyithia nciara cia Jakubu meeyia jaao.

²Rigara atî bo banthaathagia ntukû cionthe bakîenda kûmenya mantû jaakwa; nî teeka barî mûgongo jûthithagia mantû jarîa jaagîrîte. Jûtiunaga Waatho bwa Mûrungu waao. Beendaga matua jarîa mbatujagîra jeethagîrwa jarî jameega; kîrîa bagwîragîrua nî Mûrungu eethagîrwa arî akuî nabo.”

³Booragia atîrî, “Gûciata biakûrîa kûrîa tûciataga nî gwakî këethîra ûtîonaga? Kwinyiiyia kûrîa twinyiiagia nî gwakî këethîra ûtîtindanagîra naku.” MWATHANI arîbacokeria akabeera ûjû: Ûrîa kûrî nî atî magiita jarîa bûciataga biakûrîa bwîthagîrwa bûkîînganaga na moobatu jeenu bwingwa, na bûkaiinyîîria ariti-ngûgî beenu.

⁴Atîrî, rîrîa bûciatîte biakûrîa nîrîo buî bûtetaga na bûkaringanaga makundi bûkîrwa. Bûkîthithagia mantû ta jau, kinya bûgaciata biakûrîa, maromba jeenu jatîûmba gûkinya îgûrû.

⁵Rîrîa mbathûrîte rîa gûciata biakûrîa nî ta rîu? Nîrîo îgiita rîa muntû kwinyiia na kwirira? Nîrîo îgiita rîa muntû gwîkîra mathango na gûkara mûjuune na kwînamîîria bwa nthî ta mûnyaki jûmûnyaaru? Ka bûkûthûgaania îgiita rîu rîa gûciata biakûrîa nî rîîtîkîrîkîte kîrî MWATHANI?

⁶“Îgiita rîa gûciata biakûrîa rîrîa mbathûrîte rîkari ûjû: nî îgiita rîa kûthaûra barîa batheeki ncheera batî na maatia; nî îgiita rîa kûrekeeria barîa baiinyagîîrua na kûbaa ûciathi.

⁷ Nî îgiita rîa kûgaîra barîa barî na mpara biakûrîa bieenu, na kûgwata athîîni barîa batî na gwa gûtûûra ûgeni nja cieenu; nîrîo bûbuîrîte kwona barîa bathirîri nî nguû bûkabaa nguû cia gwîkîra na bûtîbuîrîte gwiciithîra antû beenu.

⁸Bwathithia ûu nîrîo weerû bweenu bûkaatharaga ta rîrîa gûgûkîa, nabu wonokio bweenu bwîîje na mpwîî. Waagîru bweenu bûkoonekanaga nawe MWATHANI akaabûkaragia na inya yaawe.

⁹Rîu bweeta MWATHANI, akaabwîtîka; bwamûkaîra akaabwigagua akauga, ‘Ndî aja.’ Bweeberia mantû ja kûiinyanîîria gatîgatîîne keenu, na bwatiga kûgeranagîra maatia na kwaragia mîario îmîthûûku;

¹⁰Bwacieejana na nkoro cieenu gûteethia barîa barî na mpara na barîa barî thîîneene, weerû bweenu bûkaatharaga bwînge muundu, na muundu jûrîa jûbûrimanîtie jûkathira gûkare ta mûthenya gatîgatî.

¹¹MWATHANI akaabûtongagîîria magiita jonthe, na akaabûingagîria moobatu jeenu akîbûthithagîria mantû jameega na akîbwîkagîra inya, naabuî bûgaakara ta muunda jûrî na rûûjî rûrwingî; ta kîthima kîa rûûjî kîrîa gîtîûûjaga noo rî.

¹²Bûgaaka ntûûra cieenu kaîrî, irîa ciamomorangîrwe karaaja; bûgaaka mîsingi yaacio kaîrî. Bûgeetagwa aaki ba nthingo na aaki ba ntûûra.”

¹³MWATHANI ariuga atîrî, “Bûkëeja kûgarûka bûgacoka kûthithagia mantû jarîa jaagîrîte kûthithua ntukû ya sabatû, bûgatiga kwînganaga na moobatu jeenu bwingwa, na bûkaeethia sabatû ntukû ya kûgwîrua na ntukû îmbathûre na întheru ya MWATHANI; na ningî bûkeeja kûmîîkîîra, bûgatiga kûthithagia mantû jarîa bûkwenda, kana kwînganaga na moobatu jeenu bwingwa kana kwaragia ndwaria itî na gîtûmi;

¹⁴bûkathithia ûu, bûkaagwîragîrua MWATHANI. Ngaatûma nkuma yeenu yûjûre nthîgûrûûne kunthe, na ntûme bwîthîrwe bûrî na kûgwîrua na ûthinyaari bûrîa bûrî nthîgûrû îrîa ndaagaîîre abaagu Jakubu. Nî ni MWATHANI mbugîîte mantû jau.”