Read KIMERU BIBLE PROTESTANT EDITION Isa 6 Bible Online

Isa 6 - KIMERU BIBLE PROTESTANT EDITION bible

Isa 6

¹ Mwakeene jûrîa mûnene Uzia aakuîre, nî ndoonere MWATHANI. Nawe aakarîrîte rûriga rwa ûnene athûûngûûri îgûrû mono, naru rwambambio rwaawe rwoojûri kîûrûûne kîonthe.

²Aserafi nabo nî baarûngi îgûrû rîaawe. O Mûserafi aarî na mathagu jatantatû; jaîrî aaikunîkîrîte najo ûthiû, na jaîrî aikunîkîrîte najo magûrû, na jaîrî jangî nîjo aabuurûkaga najo.

³ Nabo nî baaranagîria na kajû bakiugaga atîrî, “Nî Ûmûtheru, nî Ûmûtheru, nî Ûmûtheru! MWATHANI Mûrungu Mweneinya nî Ûmûtheru! Nthîgûrû yonthe yûjûri ûkumio bwaawe.”

⁴ Najo majû jaao nî jaatûmaga itugî bia mwari bikainaina, nakîo kîûrû gîkoojûra toogi.

⁵Naani ndîrauga atîrî, “Wûi naanû, ndaûra atîa! Nîkwîthîrwa ndî muntû waaragia mantû jatîagîrîte na ntwîre gatîgatî ka antû baragia mantû jamathûûku. Rîu ndîkwona mûnene, MWATHANI Mweneinya na meetho jaakwa!”

⁶Nîrîo ûmwe wa Aserafi bau aabuurûkîre araambîjîîra arî na îkara rîa mwanki rîrîa aarî akûrita kuuma kîritîroone kîa igongwana na mîgwati ya chuuma.

⁷Araringithia mîromo yaakwa narîo, arambîîra ûjû, “Atîrî, nîûntû îkara rîrî rîkûringithia mîromo yaaku-rî, nandî îgi rîaaku rîkwangûrwa na warekerwa meeyia jaaku.”

⁸Ningî ndîraigua MWATHANI akîûria atîrî, “Nûû ngûtûma? Nûû ûgeeta antûûne eetû?” Naani ndîrauga, “Ndî aja! Ntûma.”

⁹ MWATHANI arambîîra atîrî, “Îta wîre antû bau ûjû, ‘Bûgatûûra kwigua, îndî bûtîkoromenya; kwigua bûkaigagua, na bûtûûre kwonaga na bûtîciûre.’”

¹⁰Aracoka arambîîra atîrî, “Ûmia nkoro cia antû bau, na ûrimanie matû jaao na ûbainge meetho; batîkeeje kwona na meetho jaao, kana baigua na matû jaao, kana baciûkîrwa nkoroone ciaao, beeja kûngarûkîra mbooria.”

¹¹Rîu ndîrooria atîrî, “Gûgaakara ûu mwanka rî MWATHANI?” Arambîîra atîrî, “O mwanka rîrîa ntûûra ikeenyangua itigwe itî na atûûri, na nyomba ciîthîrwe itî antû, na nthîgûrû îîthîrwe îrî întheri buru.

¹²Mwanka rîrîa MWATHANI akaathaamia antû abaikie nthî cia kûraaja, nthîgûrû îîjî îtigwe yûjûri maganjo.

¹³Kinya këethîra nî muntû ûmwe kîrî antû îkûmi ûkeethîrwa atigeere, noo îkaîîthua kaîrî, îndî Israeli îgatigwa ta gîtinkî kîa muuru kana mûgumo kîrîa gîtigagwa mûtî jwatemwa.” Gîtinkî kîu nîkîo gîkaa kîambîrîria gîa ûtûûro bûbwerû.